Сеткавае выданне zviazda.by

Ад сённяшняга дня і па 25 красавіка Мінск будзе цэнтрам прыцягнення для таленавітых танцораў і балетмайстраў Беларусі. Спартыўна-культурны цэнтр Беларускага дзяржаўнага ўніверсітэта культуры і мастацтваў прыме V Рэспубліканскі харэаграфічны конкурс «Дэнс-кангрэс». Гэта знакавая падзея для тых, хто сочыць за развіццём дадзенага віду мастацтва, арганізаваная Міністэрствам культуры і БДУКМ. Звычайна конкурс дапамагае адкрываць новыя імёны і выяўляе кірункі, па якіх развіваецца харэаграфічнае мастацтва краіны. Адбор, як і ўзровень удзельнікаў, сур’ёзны, ацэньваць іх майстэрства будзе прафесійнае журы пад старшынствам народнага артыста Беларусі Юрыя Траяна.