Сеткавае выданне zviazda.by

У Нацыянальнай бібліятэцы Рэспублікі Беларусь дэманструецца выстаўка твораў выдатнай, назаўсёды юнай мастачкі Надзеі Рушавай (1952–1969), чыя творчая спадчына стала феноменам у гісторыі мастацтва ХХ стагоддзя. 

Прадукцыя беларускіх вытворцаў прадстаўлена ў фармаце калектыўнай экспазіцыі Made in Belarus на 9-й міжнароднай выстаўцы ЭКСПА «Кітай — Еўразія», якая праходзіць 26-30 чэрвеня ў горадзе Урумчы Сіньцзян-Уйгурскага аўтаномнага раёна Кітайскай Народнай Рэспублікі. Аб гэтым паведамілі ва УП «Белінтэрэкспа» БелГПП.

Калі надакучылі традыцыйны жывапіс і класічная фатаграфія, мастацкая галерэя «Высокае мѣста» запрашае на ўнікальны праект «Мастацтва галаграфіі», дзе можна пазнаёміцца з цікавай гісторыяй развіцця і замацавання гэтай тэхналогіі стварэння аб’ёмных выяў на тэрыторыі Беларусі. 

Рэспубліканская выстаўка «Лабірынт» працуе ў Палацы мастацтва. Галоўная мэта праекта — паказ сучаснай школы беларускага жывапісу, дэманстрацыя зробленага яе прадстаўнікамі, якія, што падкрэслена назвай экспазіцыі, заўсёды знаходзяцца ў творчым пошуку. Удзел гэтым разам узялі многія аўтары з абласных арганізацый Беларускага саюза мастакоў, а таксама моладзь, зацікаўленая ва ўступленні ў шэрагі арганізацыі. 

Час няўмольны, сыходзяць з жыцця ветэраны, а з імі і частка нашага быцця. Вядомая ў Магілёве фотакарэспандэнт Ірына Савосіна шмат чаго зрабіла, каб жыццё знакавых для вобласці людзей працягвалася нават за межамі іх фізічнага існавання. Яна член народнай абласной фотастудыі «Вясёлка», Беларускага саюза журналістаў, Беларускага грамадскага аб’яднання фатографаў, шмат гадоў адпрацавала і працягвае працаваць у СМІ. Яе здымкі і артыкулы размяшчаліся ў рэспубліканскай прэсе, атрымлівалі дыпломы і ўзнагароды. На рахунку фотамастачкі шмат цікавых праектаў. Апошні з іх — «Не гасне памяці свечка» — яна прысвяціла 80-годдзю Вялікай Перамогі.

На мінулым тыдні ў Мастацкай галерэі Міхаіла Савіцкага адбылося адкрыццё персанальнай выстаўкі жывапісу і фатаграфіі Аліка Замосціна «Грані рэальнасці». У экспазіцыі прадстаўлены работы, створаныя на працягу апошніх пяці гадоў. Плён творчасці аўтара — пейзажы, гарадскія і сельскія, а таксама партрэты — пераважна жаночыя. Ацаніць іх можна да 6 ліпеня. 

Абстрагавацца ад дажджлівага надвор’я і акунуцца ў атмасферу цёплых летніх дзянькоў прапануе выстаўка Таццяны Гузоўскай «Адлюстраванне рэальнасці», якая працуе ў мастацкай галерэі «Універсітэт культуры». У экспазіцыі — жывапісныя работы ў рэалістычным стылі, прысвечаныя прыгажосці навакольнага свету, якую можа заўважыць толькі мастак.

Адкрылася выстаўка рэпрадукцый работ мастака і філосафа Мікалая Рэрыха «Прыстанак Святла» ў арт-галерэі «Сфера» бібліятэкі № 18 (вул. Каліноўскага, 55). Праект арганізаваны Аддзяленнем Міжнароднай грамадскай арганізацыі «Міжнародны Цэнтр Рэрыхаў», які працуе ў Беларусі з 2000 года.

Да 2 ліпеня ў Музеі прыроды і экалогіі ёсць магчымасць пазнаёміцца з фотавыстаўкай «Экзотыка Беларусі: прырода». Аўтар — Сяргей Плыткевіч, падарожнік, журналіст, дырэктар выдавецтва «Рыфтур», рэспубліканскага фонду развіцця турызму і падтрымкі дзікай прыроды «Планета без межаў», заснавальнік партала «Планета Беларусь». Экспазіцыя фатографа, які, дарэчы, у свой час скончыў Полацкі лясны тэхнікум (сёння — каледж), прымеркавана да Сусветнага дня аховы навакольнага асяроддзя. Падчас яе адкрыцця майстар расказаў пра сваё моцнае захапленне беларускай прыродай.