«Мінскі трактарны завод. 80 гадоў» стала першай беларускай памятнай манетай, адчаканенай на айчынным прадпрыемстве. Раней наша краіна мела вопыт выпуску толькі інвестыцыйных залатых і сярэбраных манет «Славянка» на ўласнай вытворчасці: «Тэхнічныя моманты, звязаныя з вырабам, дастаткова складаныя, — расказаў Алег Філіпаў. — І не кожнае прадпрыемства гатова на такія складаныя тэхнічныя рашэнні на дзеючым абсталяванні». У сваю чаргу, ААТ «Гомельскае ВА «Крышталь» — кіруючая кампанія холдынга «Крышталь-Холдынг» ужо прайшло частковую і рыхтуецца да далейшай мадэрнізацыі, што дасць магчымасць і далей выконваць амбіцыйныя праекты Нацыянальнага банка.

Для вырабу манеты выкарыстоўвалася тэхналогія чаканкі якасці «пруф-лайк» — адсюль яе люстраны бляск. «Мінскі трактарны завод. 80 гадоў» прадстаўлена ў двух варыянтах: сярэбраная мае намінал 20 рублёў, масу 31,10 грама, дыяметр 38,60 міліметра, пробу сплаву 999,9 і тыраж 2000 экзэмпляраў, а нейзільберавая манета наміналам 1 рубель важыць 22,00 грама пры такім жа дыяметры і выпушчана тыражом 3000 штук. На адваротным баку манеты размешчана выява трактара МТЗ — самага магутнага ў свеце для сельскагаспадарчых работ, выпушчанага заводам у 2025 годзе. 

Дарэчы, нейзільбер для чаканкі манеты быў выкарыстаны ўпершыню — гэта каразійна-ўстойлівы сплаў медзі з нікелем і цынкам, які вонкава нагадвае серабро. «Ён больш коўкі, лепш блішчыць і падобны на серабро, — адзначыў Алег Філіпаў. — Манета прадстаўлена абмежаваным тыражом, і сам завод вельмі зацікаўлены ў яе набыцці. Думаю, яна таксама будзе цікавая аматарам нумізматыкі і беларускай гісторыі». У цэлым такі гонар выпадае далёка не кожнаму прадпрыемству, і з’яўленне памятнай манеты ў азнаменаванне юбілею Мінскага трактарнага завода — падзея незвычайная і значная.

Кошт сярэбранай манеты складае 400 рублёў, нейзільберавай — 60 рублёў. Абедзве яны з’яўляюцца законнымі плацежнымі сродкамі Рэспублікі Беларусь і абавязковыя да прыёму па намінальным кошце пры любых відах плацяжоў без абмежаванняў.

Аміна НАЗАРАВА 

Фота БелТА