Мы сабралі для вас 10 галоўных трэндаў, якія дакладна заслугоўваюць месца ў вашым гардэробе.

Яго вялікасць дэкор

Не варта хаваць бляск і ззянне! Сукенкі, дэкарыраваныя бліскаўкамі, стразамі і камянямі — «галоўныя героі» летняга гардэробу. Каб зрабіць іх больш практычнымі, спалучайце з паўсядзённай верхняй вопраткай — курткамі, вятроўкамі, трэнчамі. Эклектыка тэкстур — вось сакрэт моднага вобраза: напрыклад, спалучэнне нейлону і бліскавак можа стаць самым цікавым трэндам сезона. А ў больш прахалодныя дні надзеньце дэкарыраваную празрыстую сукенку на яшчэ адну — з шчыльнага матэрыялу.

У стылі бялізны

Тэндэнцыя на бачную ніжнюю бялізну не абыйшла бокам і сукенкі. Мадэлі-камбінацыі з карункавымі дэталямі, з празрыстых тканін, якія адсылаюць нас да піжамнага стылю — усе яны будуць на піку папулярнасці.

Ружовая мара

Актуальныя пудровыя адценні. Калі казаць пра сукенкі, то ружовы — галоўны колер сезона. Яго можна сустрэць ва ўсіх варыяцыях: ад далікатных і пастэльных да насычаных і яркіх. Менавіта пудрова-ружовы колер надае строям асаблівую рамантычнасць, ствараючы летуценны і кранальны вобраз.

У стылі боха

Багемны шык застаецца фаварытам моды і ў гэтым сезоне. Сукенкі з бруістых тканін, такіх як шыфон, ствараюць адчуванне лёгкасці і дынамікі. Мяккія і далікатныя, яны стануць ідэальнай «уніформай» для тых, хто хоча збегчы ад рэальнасці. Выбірайце мадэлі ў натуральных адценнях або аддайце перавагу беламу колеру.

Экстрааб’ёмныя

Смелыя аб’ёмы — адзін з самых яркіх трэндаў летняга сезона. Пашыраныя сілуэты, шматслойнасць і незвычайныя формы — усё гэта робіць сукенкі экстравагантнымі і запамінальнымі.

Скульптурныя

 Гэтыя сукенкі — сапраўдны твор мастацтва. Яны здзіўляюць незвычайнымі формамі, знарочыстай асіметрыяй і гульнёй з аб’ёмамі. Калі вы хочаце вылучыцца з натоўпу, выбірайце мадэлі з кветкавымі ўзорамі або архітэктурнымі сілуэтамі.

З рушамі і валанамі

Рамантыка і дынаміка — у трэндзе! Рушы і валаны ўпрыгожваюць падолы, рукавы і дэкальтэ сукенак, надаючы ім асаблівую жаноцкасць. 

Выбірайце мадэлі з вялікай колькасцю фальбонаў ці абмяжуйцеся невялікімі дэталямі, якія падкрэсліваюць патрэбныя зоны.

Вязаныя

Інтэрпрэтацыя «голых» сукенак — мадэлі, звязаныя кручком або спіцамі. Ажурная прыгажосць стане выдатным выбарам для летняга гардэробу. Такія сукенкі можна насіць як самастойна, так і ў спалучэнні з іншымі прадметамі адзення.

Скураны шык

Смелае рашэнне — скураныя сукенкі. Асабліва актуальныя мадэлі чорнага і чырвонага колераў. Выбірайце сукенкі са смелымі разрэзамі, якія падкрэсляць вашу фігуру і дададуць вобразу сексуальнасці.

Сукенкі-кашулі

У гэтым сезоне яны становяцца карацейшымі, ствараючы новыя сілуэты. У трэндзе таксама мадэлі ў стылі пола, натхнёныя тэніснай эстэтыкай. Выдатны выбар для тых, хто аддае перавагу камфорту і дынамічнасці.

Марыя АСМАЛОЎСКАЯ