У чацвёрты раз галоўная палітычная пляцоўка краіны гасцінна расчыніла дзверы для прадстаўніц прыгожага полу. Старт рэспубліканскаму праекту «Мы розныя, але мы адзіныя» далі гамяльчанкі, пасля іх эстафету падхапілі жанчыны Брэсцкай і Гродзенскай абласцей. Палац, дзе штодня пішацца гісторыя беларускай дзяржаўнасці, наведалі прадстаўніцы ГА «Беларускі саюз жанчын» з Мінскай вобласці.
У Палацы Незалежнасці заўсёды ярка, цікава і прыгожа. Так было і ў гэты дзень, калі галоўная палітычная пляцоўка краіны зноў прымала гасцей. Прадстаўніцы Беларускага саюза жанчын, якія звярнуліся да Прэзідэнта з просьбай наведаць Палац Незалежнасці. Адмовіць дамам, ды яшчэ і ў Год беларускай жанчыны кіраўнік дзяржавы, вядома ж, не мог.
Па словах старшыні Беларускага саюза жанчын Вольгі Шпілеўскай, ідэя нарадзілася ў прадстаўніц БСЖ Гомельскай вобласці, калі падчас сустрэчы ў Доме БСЖ з прэс-сакратаром Прэзідэнта Наталляй Эйсмант яны агучылі жаданне пабываць у Палацы Незалежнасці на экскурсіі. Так нарадзіўся праект, які аб’яднаў жанчын усёй краіны.
У Палацы Незалежнасці ужо пабывалі дэлегацыі ад трох абласцей: настаўніцы, урачы, аграрыі, работніцы прамысловасці і культуры — жанчыны, якія кожны дзень сваёй працай робяць нашу краіну лепшай. Гэтым разам чарга — Мінскай вобласці. Такім чынам, праект паступова ахоплівае ўсе рэгіёны краіны, аб’ядноўваючы жанчын розных прафесій і лёсаў.
Жанчыны ад кожнай вобласці, наведваючы Палац Незалежнасці, вырашылі стварыць унікальны арт-аб’ект «Карту адзінства» — пано, якое паўтарае контур Беларусі. Яно запаўняецца фатаграфіямі жанчын у абрамленні самабытнай выцінанкі. Розныя твары, розныя лёсы і характары — усе разам яны ствараюць вобраз Беларусі — моцнай і прыгожай, як і нашы жанчыны. Цяпер карту Беларусі дапоўнілі фатаграфіямі прадстаўніцы Мінскай вобласці.
Старшыня БСЖ расказвае пра сімволіку і ўспрыманне карты жанчынамі:
«Наша жаночая карта, якая застанецца тут, у Палацы Незалежнасці, паступова запаўняецца. Гэта не глянцавы часопіс. Гэта сапраўдныя жанчыны, якія жывуць і працуюць на нашай зямлі. Для кожнай асаблівы гонар — апынуцца на гэтай карце. Жанчыны з нецярпеннем разглядаюць сябе, шукаюць, фатаграфуюць, каб гэта засталося на доўгую памяць».
Вольга Шпілеўская адзначыла, што, на жаль, карта не можа ўмясціць усіх нашых выдатных жанчын. Але самыя яркія, самыя лепшыя будуць на ёй. Гэта застанецца ў Палацы Незалежнасці. «Магчыма, калі-небудзь сюды прыйдуць дзеці, унукі. І ўявіце, як будзе для іх ганарова і прыемна ўбачыць сваіх бабуль ці мам на гэтай карце», — сказала яна.
Старшыня БСЖ расказвае пра разнастайнасць жаночых лёсаў і прафесій:
«Беларускія жанчыны вельмі розныя. Мы працуем у розных сферах: сельская гаспадарка, прадпрымальніцтва, банкаўская сфера, вайскоўцы, работнікі пракуратуры. Сёння няма такіх галін, якія былі б жанчынне не пад сілу. Паглядзіце на ўборку ўраджаю — колькі жанчын-камбайнераў, колькі жанчын на адвозцы! Жанчына бярэ на сябе адказнасць за ўраджай». Вольга Шпілеўская падкрэслівае, што ўмовы для рэалізацыі жанчын сёння лепшыя, чым раней:
«Умовы зараз зусім іншыя. Усё значна лепш, і створана для таго, каб жанчына магла сябе рэалізаваць. Законапраекты, якія прымаюцца ў краіне, таксама прымаюцца з аглядкай на жанчыну: каб паляпшалася дэмаграфічная сітуацыя, каб у жанчын з’яўлялася жаданне спалучаць мацярынства, працу і кар’еру».
Старшыня БСЖ звярнула ўвагу на тое, што Палац Незалежнасці — гэта не закрытая рэзідэнцыя, а месца, адкрытае для народа:
«Палац Незалежнасці — заўсёды месца прыцягнення. Сотні, тысячы людзей хочуць сюды трапіць. І галоўнае, што гэта месца не закрытае, а народнае. Гэта сімвал нашага адзінства, месца, якое аб’ядноўвае ўсіх беларусаў».
Вольга Шпілеўская падкрэсліла, што такія экскурсіі — гэта не проста знаёмства з палацам:
«Многія кажуць, што вельмі хочацца, каб Год беларускай жанчыны працягваўся. Таму што ахвотных наведаць Палац Незалежнасці не становіцца менш. Гэта ўжо сакральнае месца для кожнай жанчыны. Тыя, хто пабываў тут, расказваюць пра свае ўражанні — і адразу прыходзяць лісты ў наш Беларускі саюз жанчын з жаданнем працягнуць гэту гісторыю».
«Гэта была адна з самых яркіх мар»
Сваімі эмоцыямі ад экскурсіі падзялілася Юлія Сячко, дырэктар Валожынскага жылкамгаса:
«Ведаеце, эмоцыі настолькі яркія і перапаўняльныя, што губляюцца словы, блытаюцца думкі. Гэта была адна з такіх яркіх і нязбытных мар — трапіць у Палац Незалежнасці. Трапіць сюды і адключыцца ад праблем, убачыць гэту прыгажосць і велічнасць — нешта неверагоднае для мяне. А тым больш — менавіта ў Год беларускай жанчыны».
«Я ганаруся сваёй краінай, нашым Прэзідэнтам, таму што гэта чалавек, які любіць сваю краіну, як сваё дзіця. І гэта відаць па вачах, таму што, як маці расказвае пра сваіх дзяцей, так і ў яго мяняецца выраз твару, калі ён гаворыць пра краіну», — расказала Юлія Сячко.
Вольга Карбалевіч, кіраўнік па ваенна-патрыятычным выхаванні Навапалескай сярэдняй школы Салігорскага раёна, таксама дзеліцца ўражаннямі:
«Я тут упершыню. І, вядома, прыемна ўбачыць дасягненні нашага беларускага народа. Можна яшчэ раз пераканацца, наколькі таленавіты і працавіты наш народ».
На пытанне, як выхоўваць пачуццё патрыятызму, жанчына адказала, што толькі асабістым прыкладам.
«Калі кіраўнік вядзе за сабой — няважна, гэта чужыя дзеці альбо сваё дзіця. Калі ты ад свайго сэрца ўкладаеш кавалачак сэрца ў яго, тады ўсё атрымаецца, тады любая перашкода пераадольная».
Уражанні захопліваюць і Таццяну Чуйкову, начальніка аддзела ідэалагічнай работы і па справах моладзі Барысаўскага раённага выканаўчага камітэта:
«Я другі раз у палацы і хачу сказаць: адчуванні тыя ж. Трапляеш у нейкую іншую атмасферу, і бярэ гонар за нашу краіну. Разумееш, што мы сапраўды з’яўляемся пляцоўкай міру, пляцоўкай стваральнай працы, дружалюбнай краінай.
Беларуская жанчына — яна ўнікальная. Яна працаздольная, працавітая, жаноцкая, цярплівая. Яна маці, кіраўнік, сябар. І мы сёння гаварылі: выхадны, хочацца адпачыць і пабыць у коле сям’і. Але калі ты разумееш, які шанц у цябе ёсць, у якое месца трапіць, адразу перастройваешся, і ўсё ідзе па-іншаму. Таму, напэўна, здольнасць беларускай жанчыны — хутка пераключацца, хутка адаптавацца, адказна рабіць сваю працу і быць добрай маці».
Экскурсія, якая робіць дзень ярчэйшым
Госці азнаёміліся з усімі заламі, дзе кожны дзень ствараецца гісторыя нашай краіны, даведаліся прадрабязнасці работы кіраўніка дзяржавы і натхніліся талентамі беларускіх майстроў. Тут, у сэрцы палітычнага жыцця Беларусі, кожная з іх магла адчуць сябе не проста госцяй, а членам вялікай сям’і.
Убачыць на свае вочы вядомыя на ўвесь свет залы, прагуляцца па калідорах, якія бачылі дзясяткі сусветных лідараў, адчуць атмасферу, у якой працуе кіраўнік дзяржавы — значыць, адчуць сваю датычнасць да лёсу краіны. І госцям пашчасціла ўдвая: экскурсія ў Палац Незалежнасці стала найлепшым спосабам зрабіць пахмурны дзень ярчэйшым.
У завяршэнні мерапрыемства важнай часткай экскурсіі стаў працяг праекта «Мы розныя, але мы адзіныя»: жанчыны з Мінскай вобласці дапоўнілі сваімі фатаграфіямі сімвалічную карту Беларусі, якая аб’ядноўвае ў Год беларускай жанчыны разумных і таленавітых беларусак. З пано глядзяць сотні жаночых вачэй, у якіх адначасова жывуць сіла і мяккасць, працавітасць і мацярынскае цяпло.
На працягу некалькіх месяцаў у Палацы Незалежнасці яшчэ пабываюць дэлегацыі БСЖ. Услед за Гомельскай, Брэсцкай, Гродзенскай і Мінскай эстафету прымуць прадстаўніцы ад Магілёўскай і Віцебскай абласцей, і кожная пакіне свой след на «Карце адзінства».
Гэта экскурсія стала не проста знаёмствам з рэзідэнцыяй кіраўніка дзяржавы, а сімвалічным актам, які падкрэслівае ролю жанчыны ў жыцці краіны. Розныя лёсы, розныя прафесіі, розныя вобласці — але ўсе яны аб’яднаныя адной мэтай: паказаць, што Беларусь — гэта адзіная і непадзельная краіна, дзе кожная жанчына — яе галоўны скарб.
Надзея ЗУЕВА
Фота БелТА
