Стабільнасць на спажывецкім рынку, павышэнне канкурэнтаздольнасці нацыянальнай эканомікі — вынік дзяржаўнай палітыкі падтрымкі айчыннага вытворцы і гнуткага рэгулявання. Гэта дае магчымасць рынку заставацца надзейным арыенцірам для бізнесу і пакупнікоў, падкрэсліваюць у Міністэрстве антыманапольнага рэгулявання і гандлю.
Надзейнае, сваё
Нагадаем: у красавіку 2025 года профільнае міністэрства распрацавала пагадненне аб супрацоўніцтве ў галіне павышэння эфектыўнасці продажу айчынных тавараў да 2030 года, якое ўжо дае свае станоўчыя вынікі.
Намеснік міністра антыманапольнага рэгулявання і гандлю Святлана Караткевіч падкрэсліла, што шырокі асартымент беларускіх тавараў, які ахоплівае як харчовыя, так і нехарчовыя групы, сёння здольны задаволіць самыя вытанчаныя запыты пакупнікоў. Ключавая роля тут належыць менавіта якасці прадстаўленых прадуктаў: дзякуючы ёй брэнд «Зроблена ў Беларусі» заваяваў давер спажыўцоў унутры краіны і далёка за яе межамі.
Актыўна рэалізуецца стратэгія развіцця цяплічнай гаспадаркі. Гэта асабліва важна для міжсезоннага перыяду, калі запатрабаванасць свежай плодаагародніннай прадукцыі найбольш высокая.
На рынку — без узрушэнняў
Як адзначыла начальнік упраўлення арганізацыі гандлю і грамадскага харчавання МАРГ Наталля Мельнікава, усплёскаў попыту на асобныя катэгорыі тавараў не фіксуецца, а гандаль традыцыйна ўтрымлівае другое месца сярод галін эканомікі па ўкладу ў ВУП, уступаючы толькі апрацоўчай прамысловасці. «Па выніках першага паўгоддзя, рознічны тавараабарот праз усе каналы рэалізацыі склаў 54,2 млрд рублёў, або 107,6 %.
У рознічным тавараабароце ўдзельная вага харчовых тавараў склала 45,6 %, нехарчовых — 54,5 %», — падзялілася Наталля Мельнікава.
Паводле яе слоў, у студзені — чэрвені доля продажу беларускіх тавараў склала 54,6 % (прырост да першага паўгоддзя на 0,1 працэнтнага пункта). Па харчовых таварах доля склала 75,4 %, па нехарчовых — 35,9 %.
У плюсе — «баршчовы набор», мяса, рыба, кандытарскія вырабы, сыры, а таксама аўтамабілі, веласіпеды, верхняе адзенне і касметыка.
Дарэчы, прырост гандлёвых плошчаў да мінулага года склаў 14 тысяч «квадратаў», але, як падкрэсліла спецыяліст, рынак афлайн-гандлю ўсё часцей саступае месца новым фарматам.
Цана пытання
Стабільнасцю можа пахваліцца сітуацыя з цэнамі на спажывецкім рынку. Як расказала начальнік аддзела каардынацыі кантрольнай дзейнасці МАРГ Ірына Мурончык, прырост індэкса спажывецкіх цэн у чэрвені 2026 года да снежня 2025 года склаў 2,9 %, што з’яўляецца гістарычным мінімумам для гэтага перыяду за апошнія
20 гадоў: «Харчовыя тавары ў сярэднім па краіне за мінулыя 6 месяцаў падаражэлі на 1,8 %, нехарчовыя — на 1,5 %, — адзначыла Ірына Мурончык. — У снежні 2025 года гадавая інфляцыя складала 6,8 %, а ў чэрвені 2026-га яна запаволілася да 4,3 %».
У першай палове года, па словах спецыяліста, інфляцыю цягнула ўверх перш за ўсё сфера паслуг — рост цэн тут дасягнуў 6,7 %. Яе ўнёсак у індэкс спажывецкіх цэн склаў 1,6 працэнтнага пункта, або 55 % агульнага паказчыка інфляцыі.
Характэрна, што садова-агародная прадукцыя, цэны на якую традыцыйна растуць у міжсезонне, за апошнія 12 месяцаў патаннела на 10,9 %. Гэта стала вынікам цэлага комплексу мер, у тым ліку цэнавага рэгулявання і спрыяльнай кан’юнктуры знешніх рынкаў.
Аміна НАЗАРАВА
Фота з адкрытых крыніц
