У ходзе пасяджэння разгледжана 16 пытанняў, паведамілі ў прэс-службе ўрада. Дэталёва абмеркаваны пытанні рэалізацыі стратэгічных кірункаў развіцця еўразійскай эканамічнай інтэграцыі да канца 2025 года.

Падведзены таксама вынікі выканання ў 2024 годзе плана гарманізацыі заканадаўстваў дзяржаў-членаў у сферы фінансавага рынку, у тым ліку па кірунках банкаўскага і страхавога сектараў, рынку каштоўных папер, фарміравання агульнай біржавой прасторы.

Акрамя таго, прынята рашэнне аб унясенні змяненняў у правілы правядзення фармацэўтычных інспекцый, што дасць магчымасць устанавіць агульныя падыходы да працэдур кантролю выпрабавальных цэнтраў (лабараторый, пляцовак), якія ажыццяўляюць даклінічныя даследаванні, на адпаведнасць правілам лабараторнай практыкі, што гарантуе прызнанне вынікаў інспектавання ўпаўнаважанымі органамі іншых дзяржаў-членаў.

Адначасова ўнесены змяненні ў правілы належнай клінічнай практыкі Еўразійскага эканамічнага саюза.

Як патлумачылі ва ўрадзе, прынятыя змены дазволяць выключыць магчымасць падачы недакладных даных аб бяспецы або эфектыўнасці лекавых прэпаратаў і парушэнні правоў суб’ектаў даследавання пры правядзенні клінічных выпрабаванняў лекавых прэпаратаў; выяўляць небяспечныя і (або) неэфектыўныя лекавыя прэпараты на перадрэгістрацыйным этапе і не дапускаць выпуск такіх прадуктаў у абарачэнне.

На пасяджэнні зацверджаны таксама парадак фарміравання і вядзення рэестра хімічных рэчываў і сумесяў Еўразійскага эканамічнага саюза.

— Гэтае рашэнне накіравана ў першую чаргу на абарону жыцця і здароўя чалавека, маёмасці, навакольнага асяроддзя, жыцця і здароўя жывёл, раслін, папярэджанне дзеянняў, якія ўводзяць у зман спажыўцоў (набытчыкаў) хімічнай прадукцыі, — патлумачылі распрацоўшчыкі дакумента.

Сярод іншага адобраны і праект Пратакола аб унясенні змяненняў у Пагадненне аб адзіных прынцыпах і правілах абарачэння медыцынскіх вырабаў (вырабаў медыцынскага прызначэння і медыцынскай тэхнікі) у рамках Еўразійскага эканамічнага саюза ад 23 снежня 2014 года. Змены, у прыватнасці, прадугледжваюць, што не будуць падлягаць рэгістрацыі любыя медыцынскія вырабы, якія зроблены па індывідуальных заказах пацыентаў выключна для асабістага карыстання і да якіх ставяцца спецыяльныя патрабаванні ў адпаведнасці з прызначэннем, выдадзеным медыцынскім работнікам, незалежна ад краіны іх вырабу.