Калі казаць проста, то гэта эвалюцыя ў філасофіі наменклатуры. Зноў жа падыход вядомы і дзейсны — ад жыцця. Выключаецца залішняя перапіска. Эпісталярны жанр — пераадрасацыя цыркуляраў, кабінетны марафон папер у кругавароце бюракратыі — крадзе час і нават энергію ўдзельнікаў працэсу. Пры такіх правілах гульні ў дзяржслужачых, нават у самых маладых і рамантычных асоб сучаснай плыні кіраўнікоў, гаснуць вочы і згортваюцца памкненні прынесці карысць грамадству і чалавеку.
Успамінаецца, як прагучала на нядаўняй нарадзе па кантрольна-рэвізійнай дзейнасці ўзрушаная споведзь галоўнага аўдытара краіны пра рознасць трактовак аднаго і таго ж дакумента. Пачулі, парады занатавалі і заканадаўча замацавалі. Разумныя парады — у жыццё. Асаблівая ўвага у дырэктыве ўдзелена пытанням нарматворчасці. Пры распрацоўцы праектаў законаў нас арыентуюць на тое, што неабходна выключыць залішнія ўзгадненні, строга трэба сачыць за тэрмінамі падрыхтоўкі нарматыўна-прававых дакументаў. Яны павінны быць напісаны простай, зразумелай мовай, каб усе дакладна выконвалі заканадаўства. Недапушчальна ўмяшанне дзяржаўных органаў і службовых асоб у кампетэнцыю адно аднаго.
Так, сістэма была выбудавана даўно і дапрацоўвалася ў выпадку неабходнасці. Сэнс цяперашніх змен — сістэмнае апярэджванне спрэчных момантаў. Напрыклад, дубліраванне паўнамоцтваў рознымі галінамі ўлады.
Па праўдзе кажучы, ад таго наменклатурскага духу стаміліся ўсе: і звычайныя грамадзяне, што звярталіся ў дзяржорганы па дапамогу, ды і самі клеркі з устаноў. Неаднойчы даводзілася чуць папрокі ў бок улады: навошта тыя цяжкасці? Але Прэзідэнт, наадварот, за спрашчэнне працэдур. Упэўнены, «лайкаюць» такія пазітыўныя і канструктыўныя перамены не толькі простыя людзі, але і чыноўнікі на ўсіх паверхах вертыкалі.
І гэта насамрэч беларуская адказнасць. Кіраўнікі розных узроўняў гатовыя праводзіць менш нарад і запытваць менш даведак. Па сутнасці, гэта яшчэ адзін удар па бюракратыі і ўзмацненне выканальніцкай дысцыпліны. Замест слоў — больш часу на справы, замест збораў штодзённай статыстыкі — выкананне неабходных даручэнняў.
Асноўнае патрабаванне дырэктывы — узмацненне выканальніцкай дысцыпліны, гэта і ёсць крытэрыі ацэнкі кіруючых кадраў краіны ўсіх узроўняў. Аптымізаваць кіраўніцкія працэсы будзем у тым ліку за кошт лічбавізацыі: сярод галоўных крытэрыяў — хуткая перадача інфармацыі і яе празрыстасць. Новы дакумент дазваляе рэалізоўваць дадатковыя магчымасці і функцыянал для мясцовых органаў улады. Пытанні на месцах павінны разбірацца максімальна хутка, каб прымаць аператыўныя і, галоўнае, эфектыўныя рашэнні.
«Нулявы бюракратызм» у пытаннях узаемадзеяння органаў улады і дзяржаўнага кіравання, а таксама работы з насельніцтвам — адна з асноўных задач дакумента. Гэта павінна палепшыць жыццё кожнага. Галоўнае, што размова ідзе аб скарачэнні тэрмінаў вырашэння пытанняў, з якімі звяртаюцца людзі.
Але дырэктыва павышае не толькі дысцыпліну і адказнасць дзяржслужачых, яна таксама накіравана на павышэнне сацыяльнай адказнасці ўсіх беларусаў. У пяцігодку якасці яна чарговы раз падкрэслівае: палепшыць наша жыццё мы зможам толькі разам, таму кожнаму варта пачынаць з сябе. Дакумент — толькі інструмент, але ўсё залежыць ад нас саміх.
