Наталля Андрасюк родам з Брэста, скончыла філалагічны факультэт Брэсцкага педагагічнага ўніверсітэта. Доўгі час пісала толькі невялікія эсэ, але ў адзін момант зразумела, што саспела і для кнігі.
— Гісторыя пра двух сяброў нарадзілася з малюсенькай ідэі, якая паступова вырасла ў цэлы сусвет. Мне захацелася прыдумаць чарадзейную краіну. Калі выбірала назву, спадабалася слова «Сідус». У перакладзе з лацінскага яно азначае «зорка», «сузор’е». Нарадзіўся казачны сусвет, які я засяліла чароўнымі персанажамі. А вось галоўныя героі з’явіліся самымі апошнімі. Мне хацелася, каб яны былі рознымі, каб іх характар дапаўняў адзін аднаго.
Так з’явіліся разважлівы, спакойны Гаўвар і імпульсіўны, няўрымслівы Кундас. Аўтар вырашыла, што за іх узаемадзеяннем будзе цікава назіраць. У дзяцінстве яна любіла герояў, якія крыху парушаюць правілы: Карлсана, Тома Соера...
— Яны неідэальныя, але ў гэтым іх чароўнасць. Мы любім іх не за дасканаласць, а за жвавасць, харызму і за тое, як яны змяняюцца па ходзе гісторыі, — дзеліцца аўтар і дадае, што ёй важна, каб у кнігах не было прамых настаўленняў аб тым, што з’яўляецца добрым або дрэнным. Так больш імпульсіўны і няўрымслівы персанаж Кундас, які ўцягвае Гаўвара ў свае авантуры, паступова мяняецца дзеля сяброўства.
Пачынаючы аўтар упершыню апублікавала свае кнігі дзякуючы перамозе ў рэспубліканскім літаратурным конкурсе для аўтараў LitUP, арганізаваным Міністэрствам інфармацыі Рэспублікі Беларусь. Першая кніга з серыі была выдадзена ў лютым бягучага года, а трэцяя кніга ўжо рыхтуецца да выпуску. Выданні апавядаюць пра асобныя прыгоды герояў, таму іх можна чытаць у любым парадку.
Наталля расказвае, што першыя старонкі пісала амаль без плана:
— Атрымалася, што не я іх вяла праз гісторыю, а яны мяне. Ішла за іх характарамі і, вядома, перажывала за рабят. Так аднойчы прачнулася сярод ночы з думкай аб тым, як жа яны выйдуць з небяспечнага месца. Я вось сплю, а яны там! Паступова сюжэт пачаў выбудоўвацца сам сабой, прыгоды сталі афармляцца ў сапраўдную гісторыю.
Творы аўтара падыходзяць для сямейнага чытання: яны могуць стаць чароўнымі дзвярыма ў захапляльны свет кнігі. Наталля адзначае, што ў сучасным свеце вельмі важна далучаць дзяцей да чытання, і, нягледзячы на багацце лічбавых забаў, гэта цалкам рэальна зрабіць.
— На мой погляд, дзіцячая кніга ніколі не страціць сваёй актуальнасці. Важна, каб дзеці бачылі прыклад бацькоў. Калі маці і тата будуць з кнігай у руках, то і дзіця стане браць з іх прыклад. Можна схадзіць з малымі ў бібліятэку, кнігарню. Абсалютна ўсё ідзе з сямейных каштоўнасцей. Не бывае дзяцей, якія не чытаюць. Значыць, не знайшлося той кнігі, якая зацікавіць, пакажа, што чытаць — вельмі класна.
Кнігі суправаджаюцца яскравымі ілюстрацыямі, якія ствараліся пры дапамозе штучнага інтэлекту.
Мастак вельмі ўмела выкарыстаў сучасныя тэхналогіі. Акрамя таго, перайшоўшы па QR-кодзе, можна паглядзець невялікі мультфільм пра прыгоды галоўных герояў.
Кожная гісторыя Наталлі пачынаецца з эпіграфаў, якія акумулююць сутнасць гісторыі і задаюць ёй настрой. Першая кніга пачынаецца са слоў «Не варта недаацэньваць важнасць добрых гісторый». Наталля адзначае, што сапраўдныя каштоўнасці трэба даносіць праз цікавую гісторыю, без жорсткіх настаўленняў. Назіраючы за героямі, дзіця само зробіць выснову і знойдзе для сябе нешта новае.
Вераніка КАЗЛОЎСКАЯ
Фота аўтара
