Творчы праект, якім апякуюцца ў Дзяржаўным літаратурна-мемарыяльным музеі Якуба Коласа і Саюзе пісьменнікаў Беларусі, будзе рэалізаваны на пачатку 2026 года. Расказвае галоўны захавальнік фондаў музея, кандыдат сацыялагічных навук Васіліна Міцкевіч: «Кніга пра прататыпа галоўнага героя коласаўскай паэмы „Міхасёвы прыгоды“, руплівага захавальніка памяці пра народнага песняра Беларусі, аўтара многіх артыкулаў, прысвечаных жыццю і творчасці Коласа, даўно наспела. Мы збіраемся сабраць разам артыкулы і ўспаміны самога Міхася Канстанцінавіча. А ён друкаваўся і ў „Родным слове“, і ў „Полымі“. У свой час выдавецтва „Літаратура і мастацтва“, а пасля і Выдавецкі дом „Звязда“ выдалі кнігі ўспамінаў „Апалены золак“ і „Табой я жыў, табой жыву“. Першая прысвечана сярэдняму сыну Коласа — Юрку, які загінуў у полымі Вялікай Айчыннай вайны, другая — жонцы народнага паэта Марыі Дзмітрыеўне Каменскай. Абодва выданні сталі важнымі падзеямі ў коласазнаўстве, у гісторыі беларускай літаратуры. І ў кожным з іх выступаў з успамінамі Міхась Міцкевіч. У Выдавецкім доме „Звязда“ выйшла кніга ўспамінаў „Доўгая дарога ад дома Янкі Маўра да дома Якуба Коласа“. Яе аўтар — жонка Міхася Канстанцінавіча Наталля Міцкевіч, нявестка Коласа і дачка легенды беларускай дзіцячай літаратуры Янкі Маўра. І ў гэтым зборніку ёсць тэкст Міхася Міцкевіча — „Па слядах Янкі Маўра“. Усе гэтыя матэрыялы стануць асновай будучай кнігі...» 

Асобны раздзел — творы Якуба Коласа, якія прысвечаны сыну Міхасю: побач з паэмай «Міхасёвы прыгоды» — вершы «Рагатка», «Не тужы», «Дронік», «Сыну», «Міхасю», «...Адстану я і час разлукі». Завяршаюць кнігу паэтычныя прысвячэнні Міхасю Канстанцінавічу. Аўтарамі вершаў з’яўляюцца Сымон Белы, Міхась Башлакоў, Мікола Маляўка, Яўген Хвалей, Казімір Камейша, Мікола Мятліцкі, Уладзімір Скарынкін, Ніна Шклярава, Анатоль Зэкаў, Васіль Зуёнак, Людміла Дзіцэвіч, Дзмітрый Дземідовіч, Віктар Шніп. 

Мяркуецца, што ў кнізе будзе шмат фатаграфічных матэрыялаў. Дарэчы, адно з захапленняў таленавітага навукоўца і надзвычай творчага чалавека Міхася Міцкевіча — фатаграфічная справа. Дзякуючы гэтаму ў гісторыі беларускай культуры, літаратуры засталіся многія памяткі пра жыццё Якуба Коласа, яго сям’і, звязаныя з коласаўскімі мясцінамі Беларусі. 

Сяргей ШЫЧКО