Ганаровая грамадзянка горада Полацка, яна праслаўляе свой горад у вершах і песнях. Паэтэса з вялікай літары, аўтар трох дзясяткаў паэтычных зборнікаў, многія з якіх адзначаны прэміямі імя Уладзіміра Караткевіча, Петруся Броўкі і іншымі ўзнагародамі. 

Кніга «Я плюс Я» з першых радкоў хвалюе шчырасцю пачуццяў, несумненным талентам і валоданнем мовамі. Так, менавіта мовамі — рускай і беларускай, бо ў гэтай кнізе аўтар паказала сябе ў розных моўных стыхіях. Надзея Салодкая не называе гэта перакладамі, а лічыць перастварэннем па-беларуску раней напісанага на рускай мове. Напрыклад, у вершы «Ну што мне палітыка...»

Я — женщина, слабая сущность 

Вселенной.

Я женщина, слабостью этой сильна.

Пою о любви в чистоте вожделенной,

Желанием радости вечно хмельна.

І тое ж самае па-беларуску:

Жанчына я — слабая сутнасць Сусвету,

І гэтая слабасць мне права дае

Спяваць пра каханне прыветнаму

ветру,

А хмелю мне неба дажджом наліе...

Цудоўна! Заўсёды бяру кнігі Надзеі Салодкай у рукі з трапяткім прадчуваннем таго, што вершы ўскалыхнуць душу, усхвалююць аж да дрыжыкаў. 

І пры гэтым адбудзецца паглыбленне ў свет прыгожага, у свет сапраўднай шчырай паэзіі. З гэтай кнігай адбылося тое самае. Гартаю наўздагад. Кожны верш прыцягвае ўвагу, чапляе, інакш і быць проста не можа.

Што пакіну для вас? —

Смутак сноў і літанняў,

Калі ветах да рання брыдзе.

Тэрмін ёсць для віны і для тайны,

Ад яго не схавацца нідзе.

Можа, толькі ў раскрыленасць верша,

Што ў піке апантана ляціць,

Не апошні пры гэтым, не першы,

Хто ірве між тайніцамі ніць...

Надзея Салодкая піша пра веру, каханне, прыроду, пра родны горад і сваё патаемнае, перажытае і надзённае. Яе паэзія прымушае да роздуму і разам з тым дазваляе атрымаць асалоду. Якое багацце пачуццяў, дабрыні і таленту! 

Валянціна СОПІКАВА