Атмасферная летняя экспазіцыя працуе ў Нацыянальным мастацкім музеі Рэспублікі Беларусь. Маштабны выставачны праект «Лета. Спякота» (куратар — Кацярына Калянкевіч) знаёміць з чароўнымі жывапіснымі творамі беларускіх мастакоў з калекцыі музея, аб’яднанымі цеплынёй і ласкавым сонейкам, якога сёлета так не хапае.
У Нацыянальным мастацкім музеі ўпэўнены: нягледзячы на тое, што сёння ў Беларусі склалася высокапрафесійная школа акварэльнага жывапісу, публіка мала знаёма з яе дасягненнямі. Таму менавіта здабыткі мастакоў мінулага і сучаснасці дэманструюцца на выстаўцы «Акварэль. Варыяцыі», створанай пад куратарствам Франца Корзуна, навуковага супрацоўніка выставачнага аддзела НММ. Да 29 верасня ёсць магчымасць пазнаёміцца з ледзь не сотняй акварэльных твораў з майстэрань аўтараў і фондаў музея.
У наступным годзе будзе адзначацца векавы юбілей жывапісца, графіка і педагога Барыса Аракчэева. Сям’я заслужанага дзеяча мастацтваў пачала рыхтавацца да святкавання юбілею загадзя. Так, сёлета выйшла рускамоўная кніга «Барыс Аракчэеў. Ішлі эшалоны» — прысвячэнне 80-годдзю Вялікай Перамогі. Выданне дазваляе пазнаёміцца з тэматычнымі жывапісам і графікай аўтара. А зусім нядаўна ў Дзяржаўным літаратурна-мемарыяльным музеі Якуба Коласа нашчадкі Барыса Уладзіміравіча прэзентавалі каляндар на 2026 год «Мінск. Барыс Аракчэеў». Пра яго падрыхтоўку і вынік працы расказалі дачка творцы — мастачка ды ілюстратар Аксана Аракчэева і яе муж Хельмут Кіпхарт, які падтрымаў праект у тым ліку фінансава.
Да 24 жніўня ў прасторы ZAL#2 Палаца мастацтва ёсць магчымасць пазнаёміцца з выставачным праектам «Vuž. Вобраз змяі ў сучасным беларускім мастацтве». Куратар Кацярына Янкоўская сабрала разам творы, аб’яднаныя шматзначным сімвалам. Свае работы дэманструюць Кацярына Коўзусь, Фёдар Шурмялёў, Уладзімір Клімушка, Вольга Мельнік-Малахава, Андрэй Пяткевіч ды іншыя аўтары.
Сёння ў наведвальніка Нацыянальнага мастацкага музея ёсць магчымасць пазнаёміцца з работамі юных мастакоў. «Спадчына беларусаў у традыцыйных святах і абрадах» — такую назву носіць выстаўка, якую склалі творы навучэнцаў дзяржаўнай установы адукацыі «Гімназія № 75 г. Мінска імя П. В. Масленікава». Праект будзе працаваць да 7 верасня.
Нацыянальны гістарычны музей Рэспублікі Беларусь запрашае на часовую экспазіцыю «Качэўнікі данскіх стэпаў. На стыку дзвюх цывілізацый» са збору Растоўскага абласнога музея краязнаўства. Праект прысвечаны культуры качавых народаў Еўразіі — скіфаў і сарматаў, якія жылі ў раннім жалезным веку на вялізнай тэрыторыі ад Кітая да Паўночнага Прычарнамор’я.
Станаўленне дыпламатычных адносін паміж Беларуссю і Кітаем не адразу набыло такі маштабны характар, які назіраем сёння. Усё пачыналася з амаль незаўважных, аднак вельмі важных для гісторыі Беларусі і Кітая культурных сувязяў, якія чырвонай ніткай спалучылі народы дзвюх краін, дазволіўшы ў ХХІ стагоддзі сфарміраваць цесныя ўзаемаадносіны ў розных сферах. Нацыянальны гістарычны музей Рэспублікі Беларусь прапануе вярнуцца ў мінулае стагоддзе і ўбачыць першыя крокі да моцнага міжнацыянальнага сяброўства.
Да 24 жніўня ў выставачным корпусе Нацыянальнага мастацкага музея працуе часовая экспазіцыя «Сведкі Вялікай Гісторыі. Беларускі і замежны жывапіс XVI — XІX стст.», якая змяшчае чатыры дзясяткі твораў беларускага, рускага і заходнееўрапейскага жывапісу з калекцыі музея на тэму Старога запавету і Новага запавету Бібліі, а таксама работы, прысвечаныя хрысціянскім святым.
У Нацыянальнай бібліятэцы Рэспублікі Беларусь працуе выставачны праект «Блакада. Карткі», прымеркаваны да 80-годдзя Перамогі ў Вялікай Айчыннай вайне. Выстаўка арганізавана па ініцыятыве Дабрачыннага фонду імя Аляксея Талая. Куратар праекта — расійскі калекцыянер і грамадскі дзеяч Аляксей Семянцоў.
