«Трэмс-тамс-та́ць!» — прамовіць чараўнік, узмахне чарадзейнай палачкай і — адбудзецца нешта казачна неверагоднае. Але ў жыцці магічныя замовы, як вядома, не працуюць... А фантазія? На яе забыліся? Варта толькі крыху памарыць — і пачнуць з’яўляцца на свет рыжыя коткі на пуантах, ружовыя пяшчотазаўры, пацешныя хатнічкі Прачну́ці, якія нябачна будзяць людзей уранку, і іншыя смяшлівыя асобіны дзівакаватага выгляду. Так што, сябры, кожны з нас можа стаць чараўніком, калі вельмі таго захоча. Адкрываем новую кнігу — прыйшла пара чараваць!