Лукашэнка падпісаў указ аб пераўтварэнні асабліва ахоўных прыродных тэрыторый

Прэзідэнт Беларусі Аляксандр Лукашэнка падпісаў указ нумар 439 «Аб пераўтварэнні асабліва ахоўных прыродных тэрыторый». Аб гэтым БелТА паведамілі ў прэс-службе кіраўніка дзяржавы.

Дакументам удакладнены межы, плошчы і склад зямель Бярэзінскага біясфернага запаведніка, нацыянальных паркаў «Браслаўскія азёры» і «Прыпяцкі» ў сувязі са змяненнем межаў раёнаў і абласцей.

Са складу асабліва ахоўных прыродных тэрыторый выключаны землі, спецыяльнае прызначэнне якіх не адпавядае прыродаахоўным мэтам. Гэта землі населеных пунктаў, землі пад транспартнымі камунікацыямі (нафтаправоды, лініі электраперадачы і сувязі, дарогі агульнага карыстання).

Пры гэтым у склад асабліва ахоўных прыродных тэрыторый уключаны землі, занятыя драўняна-хмызняковай расліннасцю (насаджэннямі), якія прымыкаюць да меж  гэтых тэрыторый, і некаторыя дробнаконтурныя зямельныя ўчасткі, якія не могуць эфектыўна выкарыстоўвацца ў сельскагаспадарчай вытворчасці.

• У цэлым у выніку пераўтварэнні плошчы асабліва ахоўных прыродных тэрыторый павялічаны, што спрыяльна адаб’ецца на экасістэме. Увядзенне дадатковых абмежаванняў і забарон на рэжым аховы і выкарыстання гэтых зямель не прадугледжваецца.