«Вы можаце быць абсалютна ўпэўнены, што тут у вас надзейныя сябры»

Прэзідэнт Беларусі Аляксандр Лукашэнка сустрэўся са старшынёй Следчага камітэта Расійскай Федэрацыі Аляксандрам Бастрыкіным. Сустрэча пачалася з прыемнага абавязку. Аляксандр Бастрыкін ўручыў беларускаму лідару медаль Следчага камітэта Расіі — «За вернасць службоваму абавязку». «У гонар вашага юбілею і за тое, што вы ўмацоўваеце наша супрацоўніцтва — следчых камітэтаў Беларусі і Расіі — і ўносіце ў гэта ў тым ліку свой неацэнны ўклад», — сказаў старшыня расійскага СК.

«Грэх быў бы, калі б мы не сустрэліся, калі вы ў Беларусі знаходзіцеся. Маё стаўленне да вас вы ведаеце. Нашы погляды абсалютна ідэнтычныя, разыходжанняў практычна няма», — адзначыў Прэзідэнт.

Гаворачы пра адносіны следчых ведамстваў дзвюх краін, Аляксандр Лукашэнка адзначыў: «Вы заўсёды адгукаецеся на мае просьбы, у тым ліку, можа быць, якія і не датычацца Следчага камітэта Расіі. Я вам за гэта вельмі ўдзячны». Кіраўнік дзяржавы запэўніў, што беларусы ў любы момант гатовы адказаць такім жа чынам. Ён падкрэсліў, што Следчы камітэт Расіі можа разлічваць на беларускіх партнёраў у самых розных накірунках — падрыхтоўка спецыялістаў, абмен вопытам, падтрымка на міжнароднай арэне ініцыятыў, у сумеснай дзейнасці. «Мы будзем дзейнічаць разам, што б тут не казалі, як бы нас ні спрабавалі расцягнуць у розныя бакі, хаця гэта менш тычыцца кіраўнікоў следчага камітэта аднаго і другога, і ўвогуле, ведамстваў. Гэта больш тычыцца палітыкаў, але тым не менш, па-за палітыкай сёння нічога няма, у тым ліку і вашы ведамствы гэтак жа не могуць быць па-за палітыкай... Вы можаце быць абсалютна ўпэўнены, што тут у вас надзейныя сябры», — сказаў беларускі лідар. 

Аляксандр Бастрыкін расказаў, што прыбыў у Мінск, каб падвесці вынікі работы на сумеснай калегіі Следчага камітэта Беларусі і Расіі. Мерапрыемства штогадовае. «Актыўнасць нашая толькі нарастае, у добрым сэнсе гэтага слова. Мы ўзаемадзейнічаем па розных напрамках. Я дзякую вам за аператыўную рэакцыю на нашы просьбы», — сказаў ён.

У тэму 

Галоўная тэма — абмен вопытам

Журналістам Аляксандр Бастрыкін расказаў, што абмяркоўваў з Прэзідэнтам Беларусі. Галоўная тэма — абмен вопытам у тых накірунках, па якіх працуе Следчы камітэт Расіі. «Першы накірунак — гэта спецыяльная ваенная аперацыя. Мы вядзём расследванні злачынстваў кіеўскага рэжыму. Яны здзяйсняюць цяжкія злачынствы супраць мірнага насельніцтва. На жаль, і нашы следчыя гінуць. Але мы працягваем настойліва працаваць, і я аб гэтым расказаў. І другая праблема — гэта праблема міграцыйнай злачыннасці. На жаль, у Расіі ў сувязі з заездам мігрантаў гэта праблема становіцца ўсё большай. Зараз Дзяржаўная Дума Расіі прымае шмат рашэнняў па гэтым пытанню. Я расказаў Аляксандру Рыгоравічу аб нашым досведзе, ён мяне ўважліва выслухаў. Спадзяюся, кіраўніцтву Беларусі спатрэбіцца гэты вопыт з пункту гледжання прафілактыкі росту міграцыйнай злачыннасці ў Беларусі», — расказаў Аляксандр Бастрыкін. 

Валерыя СЦЯЦКО

Фота БелТА