Качанава сустрэлася з губернатарам Ніжагародскай вобласці

Найперш Старшыня Савета Рэспублікі павіншавала расійскіх калег з 25-годдзем Дагавора аб Саюзнай дзяржаве. «Жыццё пацвердзіла, што прынятае 25 гадоў таму рашэнне было абсалютна вернае», — лічыць Наталля Качанава. І гэта, па яе словах, датычыцца не толькі гандлёва-эканамічнага супрацоўніцтва, работы ў санкцыйным рэжыме. «Мы супрацоўнічаем абсалютна па ўсіх кірунках, мы сапраўдныя братэрскія народы, якія глядзяць у кірунку міру, стваральнай працы, супрацоўніцтва, — падкрэсліла спікер. — Гэта тое, што вызначае наша ўнутрыпалітычнае развіццё».

«Мы зацікаўлены ў міжрэгіянальным супрацоўніцтве» 

Наталля Качанава звярнула ўвагу, што Савет Рэспублікі з’яўляецца палатай тэрытарыяльнага прадстаўніцтва. «Таму мы шчыра зацікаўлены ў міжрэгіянальным супрацоўніцтве, — канстатавала яна. — З задавальненнем адзначаем, што ў гэтым кірунку, як і ва ўсіх астатніх, у нас супрацоўніцтва з Расійскай Федэрацыяй дастаткова паспяховае». Спікер акцэнтавала ўвагу, што за 9 месяцаў гэтага года ў нашу краіну было ажыццёўлена 40 візітаў кіраўнікоў рэгіёнаў Расійскай Федэрацыі. За гэты ж перыяд Расію наведалі 70 беларускіх дэлегацый.

«Для нас гэта важна яшчэ і таму, што вось ужо аддзінаццаць форумаў рэгіёнаў Беларусі і Расіі мы правялі сумесна з Саветам Федэрацыі», — патлумачыла спікер. ⅩⅠⅠ Форум рэгіёнаў Беларусі і Расіі пройдзе ў Ніжнім Ноўгарадзе ў 2025 годзе. Беларускі бок, як канстатавала Наталля Качанава, ужо рыхтуецца да гэтага мерапрыемства. У бліжэйшы час, па яе словах, будзе праведзена першае пасяджэнне арганізацыйнага камітэта.

Старшыня Савета Рэспублікі выказала ўпэўненасць, што Форум рэгіёнаў, які пройдзе ў Ніжнім Ноўгарадзе, надасць новы імпульс эканамічнаму супрацоўніцтву дзвюх краін. «Мы са свайго боку, па даручэнні Прэзідэнта, будзем выконваць і імкнуцца рабіць усё дзеля таго, каб наша супрацоўніцтва з Ніжагародскай вобласцю было яшчэ больш эфектыўным», — падкрэсліла яна. 

У сваю чаргу, Глеб Нікіцін адзначыў, што тэматыка форуму рэгіёнаў, якая заяўлена як «Моладзь Расіі і Беларусі», абсалютна блізкая іх вобласці. «Мы былі першай маладзёжнай сталіцай Расіі ў мінулым годзе, — патлумачыў ён. — Па ўсіх флагманскіх праектах у нас рост моладзі. У нашага рэгіёна профіль — моладзь на дзяржслужбе». 

У Ніжнім Ноўгарадзе — Генконсульства Беларусі

У размове з журналістамі губернатар Ніжагародскай вобласці падвёў вынікі плённага працоўнага дня, праведзенага ў нашай краіне. «Прайшоў 19-ты Савет дзелавога супрацоўніцтва, па ўсіх абсалютна галінах, па якіх створаны падгрупы, — канкрэтызаваў ён. — Дамовіліся і аб дадатковых сферах ужо ўнутры буйных галін. Натуральна, гэта супрацоўніцтва ў высокатэхналагічных галінах прамысловасці, сельскай гаспадарцы. Знакамітую беларускую бульбу будзем садзіць у Ніжагародскай вобласці. Гуманітарная сфера: абмен студэнцкімі дэлегацыямі, работа міжвузаўскіх камісій і камітэтаў, узаемнае прыцягненне хлопцаў і дзяўчат для атрымання адукацыі». 

Кажучы аб Форуме рэгіёнаў Беларусі і Расіі, які прыме Ніжні Ноўгарад, Глеб Нікіцін лічыць асабліва важным, што ён праходзіць пад патранажам верхніх палат парламентаў дзвюх краін. «З Наталляй Іванаўнай Качанавай падрабязнейшым чынам абмеркавалі, якія патрабаванні ў Савета Рэспублікі Нацыянальнага сходу Рэспублікі Беларусь да правядзення форуму, — удакладніў губернатар. — Дамовіліся, што ў Ніжнім Ноўгарадзе форум павінен прайсці на самым высокім узроўні, каб задаць планку на наступныя гады». 

Кіраўнік Ніжагародскай вобласці паведаміў, што ў рамках Форуму рэгіёнаў плануецца адкрыць Генеральнае консульства Рэспублікі Беларусь. «Для нас гэты форум надзвычай важны, бо настолькі шчыльнага ўзаемадзеяння ў нас з ніякімі іншымі краінамі няма, — рэзюмаваў губернатар. — Калі казаць пра эканоміку, то Беларусь — на другім месцы пасля Кітайскай Народнай Рэспублікі. Акрамя эканомікі, ёсць сувязі — гуманітарныя, гістарычныя. І, вядома, для нас беларусы абсалютна родныя. Таму мы на самым высокім узроўні будзем і далей удзяляць увагу нашаму супрацоўніцтву». 

Вераніка КАНЮТА

Фота БелТА