Казачныя апартаменты для Дзеда Мароза і Снягуркі ўзвялі на галоўнай плошчы Гомеля

Новая рэзідэнцыя Дзеда Мароза з’явілася ў Гомелі, паведамляе БелТА са спасылкай на гарвыканкам.

Навагодняя прапіска Дзеда Мароза і Снягуркі застаецца нязменнай — галоўная плошча абласнога цэнтра. Новая рэзідэнцыя — сучаснай планіроўкі, мае цікавы фасад нябесна-блакітнага колеру.

Акрамя атмасфернага выгляду, хатка мае арыгінальны інтэр’ер. «Цяперашняя рэзідэнцыя — больш прасторная, чым папярэднія, у ёй прадугледжана два пакоі. У адным дзяцей будзе прымаць Дзед Мароз, а ў другім будуць знаходзіцца навагоднія падарункі», — расказалі ў гарвыканкаме, не раскрываючы ўсіх задум стваральнікаў казачнай атмасферы ў горадзе.

Усіх ахвочых запрашаюць на сустрэчу з навагоднімі героямі. Адзіная ўмова — падрыхтаваць для Дзеда Мароза і Снягуркі тэматычны верш ці песню.

Усяго ў Гомельскай вобласці больш за 10 зімовых рэзідэнцый, іх можна знайсці па спецыяльна распрацаванай мапе.