«Мы павінны быць незалежнымі ў эканоміцы. І думаю, што за наступную пяцігодку (калі, вядома, на нас будуць так ціснуць) мы выйдзем на практычнае поўнае імпартазамяшчэнне. Калі ціску не будзе — можам расслабіцца. Таму гэтыя ўсе санкцыі — яны і час магчымасцяў».
Аляксандр Лукашэнка на сустрэчы з губернатарам Сахалінскай вобласці Валерыем Лімарэнкам 28 кастрычніка 2024 года.
Вадзім Краўчук, намеснік старшыні Брэсцкага аблвыканкама:
— Сапраўды, санкцыі становяцца часам магчымасцяў. І як паказала жыццё, эканамічныя санкцыі спрыяюць яшчэ большаму згуртаванню Расіі і Беларусі. Год ад году мы канстатуем, што расце тавараабарот паміж Брэсцкай вобласцю і рэгіёнамі Расійскай Федэрацыі. Прадпрыемствы Брэстчыны пастаўляюць свае тавары больш чым у 80 краін свету, але Расія была і застаецца нашым асноўным гандлёвым партнёрам. Кожны год адбываецца падпісанне новых двухбаковых дакументаў па развіцці гандлёва-эканамічнага, навукова-тэхнічнага, культурнага і іншага супрацоўніцтва. Брэстчына падтрымлівае знешнегандлёвае супрацоўніцтва з 78 рэгіёнамі Расійскай Федэрацыі.
Даўно і трывала мы сябруем з Пензенскай вобласцю. Сведчаннем таму нядаўні візіт у Брэст прадстаўнічай дэлегацыі з Пензы. Важным выглядае той факт, што нашы партнёры і сябры прымеркавалі свой прыезд да юбілею вобласці, скарысталі гэтую магчымасць, каб павіншаваць нас. Але і дзелавая частка візіту выдалася даволі прадуктыўнай.
У Брэсце прайшло трэцяе пасяджэнне рабочай групы па супрацоўніцтве Беларусі і Пензенскай вобласці Расіі. З беларускага боку гэтую групу ўзначальвае старшыня Брэсцкага аблвыканкама Пётр Пархомчык. У складзе дэлегацыі былі прадстаўнікі дзелавых колаў расійскага рэгіёна. Яны ўзялі ўдзел у кантактна-кааперацыйнай біржы, арганізаванай Брэсцкім аддзяленнем Беларускай гандлёва-прамысловай палаты. Свае напрацоўкі прывезлі больш за два дзясяткі прадпрыемстваў з розных галін народнай гаспадаркі. Былі прадстаўлены прамысловасць, гандаль, высокатэхналагічныя вытворчасці. Таксама госці выказалі жаданне наведаць брэсцкія прадпрыемствы. З некаторымі нашымі вытворцамі яны пазнаёміліся раней. Гэтым разам пабывалі на прадпрыемстве «Брэстмаш».
У выніку работы накрэслены пэўныя пункты росту далейшага супрацоўніцтва, якое заклікана стаць яшчэ адным сур’ёзным крокам на шляху імпартазамяшчэння.
Нам было прыемна пачуць ад кіраўніка дэлегацыі, віцэ-губернатара Пензенскай вобласці Сяргея Фядотава, што Беларусь для расійскага рэгіёна застаецца прыярытэтным стратэгічным партнёрам. Сведчаннем таму — тавараабарот, які за апошнія тры гады вырас удвая.
На двухбаковай сустрэчы падкрэслівалася актывізацыя ўзаемадзеяння ў галіне аховы здароўя. Заключаны кантракты на пастаўку з Пензы ў медустановы Беларусі высокатэхналагічных медыцынскіх вырабаў, у тым ліку штучных клапанаў сэрца. Дарэчы, сёлета ў Брэсцкай абласной клінічнай бальніцы спецыялісты Пензенскага федэральнага кардыяцэнтра правялі шэраг аперацый з выкарыстаннем названых клапанаў. Вось яшчэ адзін удалы прыклад супрацоўніцтва на карысць імпартазамяшчэння.
Эканамічнае супрацоўніцтва, як правіла, падштурхоўвае на кантакты ў культурнай, гуманітарнай галінах. У гэтым кірунку мы маем таксама добры вопыт работы. І сёння ў рамках сустрэчы творчыя калектывы Пензы выступілі ў Бярозе і на канцэрце ў гонар 85-годдзя Брэсцкай вобласці. Наогул культурны абмен у нас стаў пастаянным і плённым.
Яшчэ з пензенскімі калегамі мы абмеркавалі работу па сумесным ўдзеле ў патрыятычных праектах для моладзі. Напрыклад, у Брэсцкай крэпасці завяршыўся першы этап будаўніцтва Рэспубліканскага цэнтра патрыятычнага выхавання моладзі. Туды будуць запрашаць і школьнікаў з Расіі.
Святлана ЯСКЕВІЧ.
Зрабіўшы якасць неад’емнай часткай іміджу Беларусі як краіны, займацца ёй неабходна пастаянна і ва ўсіх напрамках.
Дом з краявідам на будучыню.
Сабраны мільёны рублёў, але самае галоўнае — увага і клопат
