У прыватнасці, спікеры верхніх палат парламентаў азнаёміліся з прадукцыяй ААТ «Н Холдынг». Старшыні Савета Рэспублікі Нацыянальнага сходу Беларусі і Старшыні Савета Федэрацыі Федэральнага сходу Расіі прадэманстравалі інавацыйныя магчымасці холдынга, які прадстаўляе сучасную адкрытую вытворчую экасістэму і пазіцыянуецца як прастора для развіцця.
На пляцоўках холдынга працуе 16 прадпрыемстваў. Сярод асноўных кампетэнцый — вытворчасць спажывецкай тэхнікі (тэлевізары, ноўтбукі, маніторы, ЗВЧ-печы), святлодыёдная прадукцыя, апрацоўка металу, работа з палімерамі, мантаж друкаваных плат, аказанне шырокага спектра медыцынскіх паслуг у сучасным медыцынскім цэнтры. Найноўшую тэхніку, якая выкарыстоўваецца ў машынабудаванні, аграпрамысловым комплексе і ў побыце, прадставілі высокім гасцям.
Валянціна Матвіенка пацікавілася, ці рэалізаваны дагавораў ІX Форуму рэгіёнаў Беларусі і Расіі, які ў 2022 годзе адбыўся ў Гродне, або яны засталіся на паперы. Маецца на ўвазе падпісанне камерцыйных кантрактаў «Заводам электронікі і бытавой тэхнікі Гарызонт» на пастаўку тэлевізараў у Расійскую Федэрацыю, а «Інстытутам лічбавага тэлебачання Гарызонт» — на пастаўку ў брацкую краіну камплектуючых.
Як паведаміў генеральны дырэктар ААТ «Кіруючая кампанія холдынга «Гарызонт» Юрый ПРАДКО, кантракты выкананы ў поўным аб’ёме. Больш за тое, як заверыў гендырэктар, пастаўка прадукцыі холдынга ажыццёўлена ў большым памеры, чым першапачаткова планавалася.
У размове з журналістамі Старшыня Савета Федэрацыі Федэральнага сходу Расіі Валянціна МАТВІЕНКА агучыла мэту візіту на ААТ «Н Холдынг»: «Мы з Наталляй Іванаўнай (Качанавай. — „Зв“.) вырашылі паглядзець, як на практыцы рэалізоўваюцца дагаворы, што заключаюцца на нашым форуме, як у вельмі важнай для Расіі і Беларусі сферы рэалізоўваюцца саюзныя праграмы. І яшчэ раз пераканаліся, што ў рамках Саюзнай дзяржавы мы супрацоўнічаем у самых розных сферах, у тым ліку ў такой адчувальнай, як высокатэхналагічная сфера».
Па словах спікера, група прадпрыемстваў холдынга «Гарызонт» паказвае цудоўныя вынікі ў прасоўванні да тэхналагічнага лідарства, да чаго імкнецца як Беларусь, так і Расія. «І ў нас для гэтага ёсць усе ўмовы, — падкрэсліла Валянціна Матвіенка. — У нас вельмі разумныя людзі, суперталенавітая моладзь, выдатныя вучоныя і навуковыя школы. І сёння бачым, як сур’ёзна мы рушылі наперад у плане імпартазамяшчэння».
Старшыня Савета Федэрацыі звярнула ўвагу на сучасныя ўзоры прадукцыі электронікі, бытавой тэхнікі, якую выпускае холдынг. У гэтым плане, па яе словах, прадпрыемства сур’ёзна прасунулася. «Я рада таму, што прадпрыемства „Гарызонт“ супрацоўнічае з вялікай колькасцю прадпрыемстваў, кампаній Расіі, — дапоўніла Валянціна Матвіенка. — Гэта ўзаемавыгаднае супрацоўніцтва з многімі рэгіёнамі. Тыя пагадненні, якія былі падпісаны ў рамках форуму, не толькі выкананы, але і перавыкананы».
Спікер адзначыла важнасць праграмы па суфінансаванні важных кірункаў узаемадзеяння ў рамках Саюзнай дзяржавы. «Вытворчасць бытавой тэхнікі, электронікі, суперновых распрацовак, безумоўна, патрабуе падтрымкі, у тым ліку фінансавай з боку Саюзнай дзяржавы, што і рэалізоўваецца на гэтым прадпрыемстве, — канкрэтызавала яна. — Гэта добрая дапамога, дапамога ў абмене вопытам, узаемадзеянні, супрацоўніцтве. Калі мы такімі ж крокамі і тэмпамі пойдзем далей (сёння ўжо ёсць тэхналагічнае лідарства Расіі і Беларусі, Саюзнай дзяржавы ў цэлым па шэрагу напрамкаў), колькасць такіх кірункаў пашырыцца дзякуючы нашым таленавітым людзям і нашаму ўзаемавыгаднаму супрацоўніцтву».
Прадпрыемствы холдынга ўдзельнічаюць у выкананні саюзнай праграмы «Інтэлаўта», якая фінансуецца за кошт сродкаў бюджэту Саюзнай дзяржавы. У рамках праграмы ствараецца электроніка для аўтатранспартных сродкаў спецыяльнага прызначэння, іншага транспарту.
«Гэта разумнае кіраванне збожжаўборачным камбайнам, іншай тэхнікай, якая выкарыстоўваецца на палях для вырошчвання ўраджаю, — канкрэтызаваў у размове з журналістамі генеральны дырэктар ААТ «Кіруючая кампанія холдынга „Гарызонт“. — Электроніка з’яўляецца рухальнай тэмай у вытворчасці аўтапрама. Вы бачыце, з якой хуткасцю мяняюцца тыя ж тэлефоны. Мы павінны быць у трэндзе і з гэтай хуткасцю рухацца. Саюзная праграма і накіравана на тое, каб аўтамабілі сталі „разумнымі“. Галоўная задача — працаваць на спажыўца, атрыманне сінэнергіі, якая адлюстроўваецца на дабрабыце жыхароў краін».
Менавіта расіяне з’яўляюцца асноўнымі спажыўцамі прадукцыі холдынга на знешнім контуры: каля 80% экспарту ідзе ў Расійскую Федэрацыю.
Вераніка КАНЮТА.
Зрабіўшы якасць неад’емнай часткай іміджу Беларусі як краіны, займацца ёй неабходна пастаянна і ва ўсіх напрамках.
Дом з краявідам на будучыню.
Сабраны мільёны рублёў, але самае галоўнае — увага і клопат
