У Беларусі завяршаецца збор подпісаў у падтрымку вылучэння кандыдатаў у Прэзідэнты

Сёння завяршаецца збор подпісаў у падтрымку вылучэння кандыдатаў у Прэзідэнты Рэспублікі Беларусь, паведамляе БелТА.

Па ўсёй краіне з 7 лістапада праходзяць пікеты па зборы подпісаў у падтрымку вылучэння кандыдатаў у Прэзідэнты: дзейнага Прэзідэнта Рэспублікі Беларусь Аляксандра Лукашэнкі, старшыні Ліберальна-дэмакратычнай партыі Беларусі Алега Гайдукевіча, старшыні Рэспубліканскай партыі працы і справядлівасці Аляксандра Хіжняка, індывідуальнага прадпрымальніка Ганны Канапацкай, першага сакратара Цэнтральнага камітэта Камуністычнай партыі Беларусі Сяргея Сыранкова.

Ініцыятыўным групам неабходна сабраць не менш як 100 тыс. подпісаў. Пры гэтым выбаршчык павінен уласнаручна паставіць дату подпісу і распісацца. Выбаршчык мае права паставіць подпіс у падтрымку некалькіх кандыдатур, якія прапануюцца для вылучэння кандыдатамі ў Прэзідэнты, але толькі адзін раз у падтрымку адной і той жа кандыдатуры.

Падпісныя лісты трэба прадставіць у адпаведныя раённыя, гарадскія (у гарадах абласнога падпарадкавання, акрамя гарадоў з раённым дзяленнем), раённыя ў гарадах камісіі не пазней за 6 снежня 2024 года. Гэта значыць, сёння заключны дзень для прадстаўлення падпісных лістоў. У дзесяцідзённы тэрмін будзе праходзіць праверка дакладнасці подпісаў выбаршчыкаў у падпісных лістах, здадзеных каардынатарамі ініцыятыўных груп. Калі колькасць выяўленых пры праверцы несапраўдных подпісаў выбаршчыкаў складзе больш за 15% ад колькасці правераных подпісаў (першапачаткова адбіраецца не менш за 20%), праводзіцца дадатковая праверка яшчэ 15% подпісаў выбаршчыкаў ад колькасці подпісаў у падпісных лістах, здадзеных у адпаведную камісію. У выпадку, калі сумарная колькасць несапраўдных подпісаў выбаршчыкаў, выяўленых пры праверках, складзе больш за 15% ад агульнай колькасці правераных подпісаў, усе подпісы выбаршчыкаў у здадзеных у адпаведную тэрытарыяльную камісію падпісных лістах не ўлічваюцца.

З 7 па 21 снежня ўключна асоба, вылучаная кандыдатам у Прэзідэнты Рэспублікі Беларусь, павінна прадставіць у Цэнтральную камісію дакументы, неабходныя для рэгістрацыі кандыдата ў Прэзідэнты.

З 22 па 31 снежня 2024 года ўключна пройдзе рэгістрацыя кандыдатаў у Прэзідэнты Рэспублікі Беларусь (пачынаецца за 35 дзён і заканчваецца за 25 дзён да выбараў).

З 1 да 25 студзеня 2025 года пройдзе перадвыбарная агітацыя.

Выбары Прэзідэнта Беларусі назначаны на 26 студзеня 2025 года.