Петрышэнка аб прыёмах грамадзян

Прыёмы грамадзян дазваляюць даведацца, што непакоіць людзей, дапамагчы ім у вырашэнні праблемных пытанняў, выслухаць іх прапановы. Аб гэтым заявіў намеснік прэм’ер-міністра Ігар Петрышэнка па выніках прыёму грамадзян, перадае БелТА.

«Наша заканадаўства пастаянна ўдасканальваецца ў плане разгляду лістоў, скаргаў і іншых зваротаў грамадзян. Кіраўнікі ўсіх рангаў праводзяць асабістыя прыёмы грамадзян, каб пачуць тыя пытанні, якія вырашаюцца не ў поўнай меры або недастаткова хутка. Прымаючы людзей у Мінску і рэгіёнах, мы бачым, што ўся вертыкаль улады ўнікае ў праблематыку і выконвае законныя пажаданні людзей, якія сапраўды маюць патрэбу ў дапамозе. Падкрэсліваю — законныя пажаданні. Таму што людзі могуць прыйсці і сказаць: хачу тое і тое, а гэта выходзіць за межы норм заканадаўства. Напрыклад, у сферы жылля, зямельных адносін грамадзяне могуць хацець аднаго, а заканадаўства рэгулюе гэтыя пытанні па-іншаму. Мы ўсе павінны дакладна выконваць нормы, якія дзейнічаюць у нашай дзяржаве», — сказаў Ігар Петрышэнка.

Паводле яго слоў, прыёмы праводзяцца перш за ўсё для абароны правоў і законных інтарэсаў грамадзян, вырашэння праблемных пытанняў. Такія сустрэчы дазваляюць даведацца, што непакоіць людзей, выслухаць іх прапановы. Гэта дапамагае і рабоце па ўдасканаленні заканадаўства. Многія пытанні вырашаюцца на мясцовым узроўні, у тым ліку па асфальтаванні дарог, у сферы грамадскага транспарту, аказанні сацыяльных паслуг, медыцынскага забеспячэння.

Сёння на прыёме ў Ігара Петрышэнкі быў інвалід-калясачнік з Маладзечна. «Ён трапіў у ДТЗ у 1991 годзе і з таго часу знаходзіцца ў інваліднай калясцы. Мы абмеркавалі, у чым яму трэба дапамагчы, і ўзялі на кантроль. Праграму рэабілітацыі, прадпісаную яму ўрачамі, яшчэ раз прааналізуюць з улікам бягучага стану здароўя, унясуць у яе карэктывы. Ён праходзіць абследаванні ў мясцовай установе аховы здароўя, але мы дамовіліся, што і рэспубліканскі цэнтр, які займаецца пытаннямі рэабілітацыі, таксама акажа садзейнічанне. Што да сацыяльнага забеспячэння (інвалідны вазок, адрасная сацыяльная дапамога), усё што належыць, выконваецца. У нашай краіне за апошнія гады ўдасканалілася безбар’ернае асяроддзе, пазітыўна змянілася стаўленне да асоб з абмежаванымі магчымасцямі», — зрабіў акцэнт віцэ-прэм’ер.

Ён таксама звярнуў увагу на тое, што псіхалагічны настрой вельмі важны, таму неабходна ўключаць інвалідаў у грамадскае жыццё. «Звернемся ў Мінпрацы, грамадскую арганізацыю інвалідаў, Паралімпійскі камітэт, каб яны аказалі садзейнічанне. Ён можа паўдзельнічаць у дзейнасці грамадскай арганізацыі, творча сябе праявіць, плюс ён спартсмен. Калі чалавек будзе ўцягнуты ў актыўную дзейнасць, гэта дапаможа яму справіцца з псіхалагічным надломам і глядзець толькі наперад. Інваліды-калясачнікі ў Беларусі працуюць, творча сябе рэалізуюць, грамадскія арганізацыі ім у многім дапамагаюць.

Часам грамадзяне звяртаюцца з пытаннямі, якія не адносяцца да сферы дзейнасці ўрада. Напрыклад, сёння на прыём грамадзян звярнуўся мужчына з Фаніпаля з просьбай аб аб’ектыўным расследаванні ДТЗ. Ягоны зварот будзе перададзены ў Генеральную пракуратуру.

«Пералік пытанняў, якія абмяркоўваюцца на прыёмах грамадзян, даволі шырокі. Вялікае дасягненне нашай краіны дзякуючы Прэзідэнту ў тым, што ўлада ў нас сапраўды народная. Мы маем зносіны з людзьмі, унікаем у іх праблемы. Гэтая праца будзе працягвацца. Неабходна быць уважлівымі да пажаданняў і спадзяванняў людзей. Бачым, што паток скаргаў і прапаноў зніжаецца. Усе пытанні ў асноўным вырашаюцца на месцах. Важна, што людзі адчуваюць, што іх чуюць і імкнуцца ім дапамагчы», — рэзюмаваў Ігар Петрышэнка.