Надвор'е: Снежань стартуе анамальным цяплом

У апошнія гады пачатак зімы надыходзіць у нас значна пазней, чым звычайна. І гэты год не выключэнне. У пачатку снежня ў краіне захаваецца цёплае надвор’е, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

Першы тыдзень месяца пачаўся з цёплага надвор’я з сярэднесутачнай тэмпературай паветра, якая на 3-5 градусаў перавышае шматгадовыя значэнні. Пры ваганнях тэмпературнага фону месцамі па краіне будуць утварацца туманы і слабыя галалёдныя з’явы. 
Асобныя ўчасткі дарог стануць слізкімі, прагназуюць сіноптыкі.

У аўторак надвор’е ў Беларусі ў асноўным будзе вызначаць вобласць павышанага атмасфернага ціску, сфарміраваная ў вільготнай паветранай масе. Раніцай і днём па паўночным захадзе краіны адаб’ецца ўплыў франтальнага падзелу, які ссоўваецца з боку Балтыйскага мора. Чакаецца воблачнае з праясненнямі надвор’е. Ноччу пераважна без ападкаў, раніцай і днём месцамі па краіне пройдуць кароткачасовыя ападкі ў выглядзе дажджу і мокрага снегу.

Ноччу і раніцай у асобных раёнах краіны будуць адзначацца туман, слабы галалёд. Вецер паўднёвы ўмераны. Тэмпература паветра ўначы — ад мінус 3 да плюс 3 градусаў, максімальная днём — ад 1 марозу да 4 цяпла. Атмасферны ціск будзе слаба падаць.

У сераду надвор’е ў асноўным будзе вызначаць маларухомы франтальны раздзел. Чакаецца воблачнае надвор’е. На большай частцы тэрыторыі краіны пройдуць ападкі ў выглядзе мокрага снегу і дажджу. У асобных раёнах краіны будуць адзначацца слабыя туман і галалёд, на дарогах галалёдзіца. Вецер няўстойлівы ўмераны. Тэмпература паветра ўначы ад 5 марозу да 2 цяпла, максімальная днём складзе ад мінус 2 градусаў да 4 цяпла.

У чацвер месцамі па Беларусі чакаецца невялікі кароткачасовы снег, мокры снег. На асобных участках дарог прагназуецца галалёдзіца. Ноччу і раніцай месцамі па захадзе краіны чакаюцца слабыя туман і галалёд. Тэмпература паветра мінімальная ноччу — ад мінус 6 градусаў па ўсходзе рэгіёна да плюс 2 градусаў па захадзе, максімальная днём — мінус 3 — плюс 3 градусы.

У пятніцу часова пахаладае. У гэты дзень месцамі па краіне чакаюцца невялікі кароткачасовы снег, мокры снег, на асобных участках дарог галалёдзіца. Тэмпература паветра ўначы ад нуля да мінус 7 градусаў, ды і максімальная днём складзе ад мінус 4 градусаў да 3 цяпла.

Паводле папярэдняга прагнозу айчынных сіноптыкаў, ужо ў гэтыя выхадныя ў фарміраванне надвор’я зноў уключыцца цёплая Атлантыка. Тэрыторыя краіны апынецца ва ўладзе атмасферных франтоў, за якімі пачне паступаць цёплае акіянічнае паветра.

Таму ў суботу на большай частцы тэрыторыі краіны ападкі будуць у выглядзе снегу і мокрага снегу, днём з дажджом. У асобных раёнах могуць быць слабыя туман і галалёд, на дарогах галалёдзіца. Тэмпература паветра ўначы — ад мінус 5 градусаў да 2 цяпла, а ўдзень — мінус 2 — плюс 4 градусы.

Мокры снег з дажджом прагназуецца і ў нядзелю. У асобных раёнах можа быць слабы галалёд, на дарогах галалёдзіца. Тэмпература паветра ўначы складзе мінус 3 — плюс 2 градусы, а ўдзень — ад мінус 1 градуса да 5 цяпла.

Сяргей КУРКАЧ