Эфектыўны інструмент двухбаковага супрацоўніцтва

У Мінску адбылося VII Сумеснае пасяджэнне калегій Міністэрства прыродных рэсурсаў і аховы навакольнага асяроддзя Рэспублікі Беларусь і Міністэрства прыродных рэсурсаў і экалогіі Расійскай Федэрацыі, прымеркаванае да 25-годдзя падпісання Дагавора аб стварэнні Саюзнай дзяржавы Беларусі і Расіі.

Падчас пасяджэння разглядаліся пытанні супрацоўніцтва ў галіне аховы і рацыянальнага выкарыстання трансгранічных водных аб’ектаў, біяразнастайнасці і развіцця трансгранічнай сеткі асабліва ахоўных прыродных тэрыторый, правядзення дзяржаўнай экалагічнай экспертызы, гідраметэаралогіі і маніторынгу навакольнага асяроддзя, сферы геалогіі і нетракарыстання, абыходжання з адходамі вытворчасці і спажывання.

Паводле словаў міністра прыродных рэсурсаў і аховы навакольнага асяроддзя Беларусі Сяргея Масляка, паміж прыродаахоўнымі ведамствамі Беларусі і Расіі наладжана эфектыўнае ўзаемадзеянне.

— Штогадовае правядзенне сумеснага пасяджэння калегій з’яўляецца не толькі добрай традыцыяй, але і стала эфектыўным інструментам пастаяннага паглыблення двухбаковага супрацоўніцтва ў прыродаахоўнай сферы, а таксама пляцоўкай для таго, каб зверыць гадзіннікі, — адзначыў Сяргей Масляк.

Кіраўнік прыродаахоўнага ведамства звярнуў увагу на тое, што ахова навакольнага асяроддзя і рацыянальнае выкарыстанне рэсурсаў з’яўляюцца адным з ключавых напрамкаў узаемадзеяння. Так, наладжана супрацоўніцтва паміж гідраметэаралагічнымі службамі, здзейснены чатыры праграмы Саюзнай дзяржавы, арыентаваныя на развіццё сістэмы гідраметэаралагічнай бяспекі. 

— Мы традыцыйна заўсёды ішлі плячом да пляча і ў пытаннях прыродаахоўнага заканадаўства, і па экалагічным парадку дня. Мы былі і будзем па-сяброўску настроенымі суседзямі, брацкімі народамі. І наша развіццё павінна быць сінхронным, — падкрэсліў міністр прыродных рэсурсаў і экалогіі Расійскай Федэрацыі Аляксандр Казлоў і адзначыў, што Беларусі і Расіі неабходна аб’яднаць намаганні для прасоўвання сваіх інтарэсаў на сусветных рынках. Павінна быць і ўзаемная падтрымка на міжнародных форумах.

На пасяджэнні былі падпісаны Праграма расійска-беларускага супрацоўніцтва ў галіне аховы навакольнага асяроддзя і рацыянальнага прыродакарыстання на 2024–2026 гады, Дарожная карта мерыпрыемстваў у прыгранічных абласцях Расійскай Федэрацыі і Рэспублікі Беларусь па ахове і рацыянальным карыстанні трансгранічнымі водамі і па іншым смежным пытанням на перыяд да 2030 года, Пагадненне аб супрацоўніцтве ў галіне навукова-тэхнічнай дзейнасці РНДУП «Бел НДЦ «Экалогія» і ФДБУ «УНДІ ЭКОЛОГІЯ».

Александрына ПАРШЫНА

Фота Віктара ІВАНЧЫКАВА