Калектыўны дагавор — у азначаныя тэрміны

На рабочай сустрэчы Старшыні Савета Рэспублікі Нацыянальнага сходу Рэспублікі Беларусь Наталлі Качанавай са Старшынёй Фэдэрацыі прафсаюзаў Юрыем Сянько абмеркаваны пытанні далейшага ўдасканалення працоўнага заканадаўства.

Як падкрэсліў Юрый Сянько, прафсаюзы на пастаяннай аснове ўдзельнічаюць у распрацоўцы праектаў нарматыўных прававых актаў, уносяць свае заўвагі і прапановы. Ініцыятывы нацыянальнага прафцэнтра, як правіла, падтрымліваюцца заканадаўцамі.

— Усе нашы прапановы ідуць ад жыцця — ад працоўных калектываў, нашых членаў прафсаюза. Адно з актуальных пытанняў на сёння — стварэнне на заканадаўчым узроўні дадатковых умоў для пашырэння практыкі заключэння калектыўных дагавораў, — адзначыў Юрый Сянько. — Сёння ў краіне падпісана каля 18 тысяч такіх лакальных дакументаў. Дзякуючы гэтаму работнікі прадпрыемстваў і арганізацый гарантавана атрымліваюць дадатковыя водпускі, выплаты, падтрымку ў розных сітуацыях. Разам з тым у сваёй працы мы бачым выпадкі, калі наймальнікі адмаўляюцца ад заключэння калектыўнага дагавора ці зацягваюць перагаворы па іх заключэнні. Пры гэтым недзе работнікам даюць нейкія выплаты, прэміі. Але гэта эпізадычная, неабавязковая падтрымка. А ў выпадку калі заключаны калдагавор, усё, што ў ім прапісана, работнікі атрымаюць стопрацэнтна.

Прафсаюзны лідар краіны дадаў, што сёння ў шэрагу краін ЕАЭС ёсць практыка, калі на заканадаўчым узроўні замацаваны тэрмін, на працягу якога павінен быць падпісаны калектыўны дагавор, — тры ці шэсць месяцаў. «Мы мяркуем, што такую ??норму неабходна ўнесці і ў наша заканадаўства. Гэта адназначна пойдзе на карысць людзям, працоўным калектывам, павысіць узровень гарантый для чалавека працы», — падзяліўся старшыня ФПБ.

Таксама на працоўнай сустрэчы абмяркоўвалася пытанне працы з моладдзю. Як расказаў Юрый Сянько, прафсаюзы аддаюць асаблівую ўвагу пытанням сацыяльнай падтрымкі маладых людзей. У першую чаргу праз уключэнне ў пагадненні і калектыўныя дагаворы спецыяльных гарантый для маладых людзей. Рэалізуюцца і праекты па падтрымцы таленавітай моладзі.

Напрыклад, штогод ФПБ прызначае стыпендыі навучэнцам і студэнтам, якія сумяшчаюць добрыя паказчыкі ў вучобе і актыўную грамадзянскую пазіцыю. Праводзіцца і пастаянная работа па навучанні прафсаюзнага маладзёжнага актыву. Так, за апошнія гады больш як шэсць тысяч маладых людзей прайшлі тэматычныя навучальныя курсы, дзе нараўне з прафсаюзнымі тэмамі разглядаюцца пытанні грамадска-палітычнага, сацыяльна-эканамічнага развіцця краіны і грамадзянска-патрыятычнага выхавання.

Чалавек — на першым месцы

Беларусь сёння займае адно з вядучых месцаў у працэсе сацыяльнага развіцця, заявіў Нацыянальны каардынатар па дасягненні Мэт устойлівага развіцця, намеснік Старшыні Савета Рэспублікі Сяргей Хаменка журналістам перад пачаткам пасяджэння Савета па ўстойлівым развіцці.

«Гэта планавае мерапрыемства па падвядзенні вынікаў дзейнасці па дасягненні Мэт устойлівага развіцця, — адзначыў Сяргей Хаменка. — Нам ёсць чым ганарыцца і, дзякуючы кіраўніку дзяржавы, нашаму ўраду, дзейнасці рэгіёнаў, Беларусь на сёння займае адно з вядучых месцаў у працэсе сацыяльнага развіцця. Прынцып „усё для чалавека і ўсё ў імя чалавека“ рэалізуецца ў поўнай меры. Сёння мы падводзім вынікі ў галіне эканомікі, аховы здароўя, адукацыі. Асноўнае пытанне — разгляд праекта Нацыянальнай стратэгіі развіцця на найбліжэйшую будучыню. Усё накіравана толькі на тое, каб наша краіна развівалася, захоўвала ўсё, што мы маем».

На Савеце па ўстойлівым развіцці прадстаўнікі рэгіёнаў таксама расказалі пра тое, як будзе арганізавана работа на месцах зыходзячы з той стратэгічнай лініі, якую праводзяць кіраўнік дзяржавы і ўрад.

Паводле прэс-службы Савета Рэспублікі