Нягледзячы на тое, што на мінулым тыдні кіраўнік дзяржавы не выязджаў за межы краіны, пытанні міжнароднага парадку дня ў рабочым графіку Прэзідэнта гучалі неаднаразова. Аб тым, што хвалюе кожнага на планеце, — умовах бяспечнага існавання — Аляксандр Лукашэнка гаварыў у чацвер на сесіі высокага ўзроўню II Мінскай міжнароднай канферэнцыі па еўразійскай бяспецы, у якой прынялі ўдзел каля 600 высокапастаўленых гасцей і аўтарытэтных экспертаў з 40 краін свету. Развіццё ўзаемадзеяння з Расійскай Федэрацыяй у цэлым і з Сахалінскай вобласцю ў прыватнасці ў панядзелак абмяркоўвалася ў Палацы Незалежнасці.
Унутраны парадак дня на гэтым тыдні абмяркоўваўся і ў рабочым кабінеце кіраўніка дзяржавы, і падчас паездкі ў горад Масты Гродзенскай вобласці, дзе праходзілі абласныя Дажынкі. Аляксандр Лукашэнка не толькі павіншаваў і ўзнагародзіў аграрыяў, а і ў цэлым агучыў пытанні, актуальныя як для Гродзеншчыны, так і для краіны ў цэлым.
1. «Нам трэба быць незалежнымі па ўсіх кірунках. Нам трэба зрабіць так, каб не да нас везлі шматлікага роду тавары, а ад нас везлі і прыязджалі сюды, у Расію і Беларусь, прасілі, каб мы ім прывезлі тыя ці іншыя тавары». Аб гэтым кіраўнік дзяржавы гаварыў на перагаворах з дэлегацыяй Сахалінскай вобласці на чале з губернатарам Валерыем Лімарэнкам. Перад гэтым перспектыва сумесных імпартазамяшчальных праектаў абмяркоўвалася на сустрэчы з першым віцэ-прэм’ерам Расійскай Федэрацыі Дзянісам Мантуравым.
2. «Ідучы да людзей сёння на экзамен (яны ў нас прымуць экзамен за пяцігодку), мы павінны сказаць, што мы зробім. Канкрэтна. Вось і ўся палітыка. А прыгожа гаварыць, балбатаць мы ўсе ўмеем». У аўторак у Палацы Незалежнасці абмяркоўвалася сітуацыя ў аграпрамысловым комплексе краіны, найперш — у сельскагаспадарчых арганізацыях. Размова ішла аб выніках, з якімі аграрыі завяршаюць сельскагаспадарчы год. Закраналася дарожная тэма, пытанне якасці айчыннай прадукцыі. Гаварыў Аляксандр Лукашэнка і аб будучых прэзідэнцкіх выбарах: у адрас будучых кандыдатаў у Прэзідэнты прагучала канкрэтная парада — «проста расказваць і гаварыць ужо недастаткова».
3. «Нам усім патрэбен такі свет, у якім хочацца жыць і развівацца. Свет, які не сорамна перадаць будучым пакаленням». Падчас II Мінскай міжнароднай канферэнцыі па еўразійскай бяспецы кіраўнік дзяржавы агучыў умовы бяспечнага існавання на планеце, канкрэтызаваў першарадныя захады па дээскалацыі напружанасці ў свеце, пазіцыю Беларусі па ўстанаўленні мірнага светаўладкавання і іншых пытаннях.
4. «Мінск павінен быць за перагаворным сталом, калі гэта будзе датычыцца ўрэгулявання канфлікту ва Украіне. Гэта пытанне гарантый нашай бяспекі». Падчас II Мінскай міжнароднай канферэнцыі па еўразійскай бяспецы Прэзідэнт выказаўся па ўкраінскім пытанні і агучыў у гэтай сувязі інтарэс Беларусі, паколькі, па яго словах, мы тут побач і гэта тое, што нас датычыцца. Пачутая з першых вуснаў інфармацыя па ўкраінскім канфлікце, яго прычынах дазволіць аўдыторыі, якая прадстаўляла 40 краін, у тым ліку Еўрапейскага Саюза, сфарміраваць правільнае ўяўленне аб падзеях, якія ў шэрагу дзяржавах транслююць толькі з выгадных аднаму боку пазіцый.
5. «Беларусь — краіна хлеба, тэрыторыя міру, узаемаразумення і павагі адзін да аднаго. Гэта наша філасофія. Так было і так будзе заўсёды», — сказаў Прэзідэнт падчас урачыстай цырымоніі ўшанавання аграрыяў фестывалю-кірмашу «Дажынкі-2024», якія ў суботу прымалі Масты. Асаблівыя словы падзякі з вуснаў кіраўніка дзяржавы прагучалі ў адрас аграрыяў, дзякуючы ў тым ліку якім, па словах Аляксандра Лукашэнкі, беларусы жывуць у раі.
Вераніка КАНЮТА
Фота БелТА
Хораша там, дзе моладзь ёсць!
Карэкціроўкі па аплаце жыллёва-камунальных паслуг закрануць чатыры катэгорыі жыхароў.
