Кітайскі тэатр ценяў налічвае больш за 2000 гадоў

Старажытны горад Сіань — гістарычны калейдаскоп. Гэта зыходны пункт Вялікага Шаўковага шляху і важны вузел ініцыятывы «Пояс і шлях» у новую эпоху. Тут можна не толькі атрымаць асалоду ад велічных краявідаў, дакрануцца да старажытнай гарадской сцяны і пачуць шэпт гісторыі, але і ўбачыць галавакружныя сучасныя небаскробы, і акунуцца ў ажыўленае жыццё мегаполіса, перадае «Сіньхуа».

Тэатр ценяў правінцыі Шэньсі — традыцыйная нематэрыяльная культурная спадчына Кітая са шматвяковай гісторыяй. Ён увабраў у сябе сучасныя элементы, што толькі надала больш каларыту і прынесла новых прыхільнікаў.

У дажджлівы дзень мы сустрэліся з майстрам Ван Хаянь у яе студыі. Спадчынніца «Тэатра ценяў сям’і Ван» у чацвёртым пакаленні расказала аб непарыўнай сувязі сваёй сям’і з тэатрам ценяў і Сіанем. Яе бацька Ван Цяньвэнь прыехаў сюды ва ўзросце адзінаццаці гадоў і навучыўся рабіць фігуркі для тэатра ценяў. Пасля дзесяцігоддзяў упартай працы ён стаў прадаўжальнікам мастацтва «Тэатра ценяў сям’і Ван» і зрабіў яго вядомым брэндам у рэгіёне і па ўсім Кітаі.

Пад уплывам бацькі Ван Хаянь з дзяцінства захаплялася стварэннем фігурак для тэатра ценяў. Яна доўга ўпрошвала бацьку, і ён нарэшце пагадзіўся яе навучыць. Выразанне фігурак патрабуе вялікай сілы, таму Ван Хаянь прыйшлося няпроста. Яна ўпарта вучылася, прывязваючы цэглу да запясцяў, і ў выніку пераадолела цяжкасці і стала годнай спадчынніцай «Тэатра ценяў сям’і Ван».

Дан Фэйхуа, сын Ван Хаянь, з дзяцінства назіраў за тым, як дзед і маці робяць фігуркі, а калі паступіў ва ўніверсітэт, стаў сам гэтаму вучыцца. Цяпер ён — спадчыннік «Тэатра ценяў сям’і Ван» у пятым пакаленні. Ван Хаянь расказала, што «Тэатр ценяў сям’і Ван» выкарыстоўвае традыцыйны для Шэньсі 24-этапны працэс вырабу фігурак і класічную тэхніку «паварочвання скуры і выразання нажом», а таксама прымяняе своеасаблівы «метад фаскі», каб зрабіць фігурку больш гладкай. Пры размалёўванні яны выкарыстоўваюць пяць традыцыйных колераў. Майстры ўжываюць метад плоскага размалёўвання і растушоўку, каб паменшыць насычанасць колераў і стварыць больш варыяцый.

Тэатр ценяў перадаецца з пакалення ў пакаленне ўжо больш за 2000 гадоў, а спалучэнне з сучаснымі трэндамі надае яму новых жыццёвых сіл, адзначыла Ван Хаянь. У апошнія гады «Тэатр ценяў сям’і Ван» супрацоўнічае з кампаніямі з розных сфер, уключаючы вытворчасць прадметаў раскошы і анлайн-гульні, выкарыстоўваючы інавацыйныя тэхнікі для інтэрпрэтацыі вобразаў і канцэпцый брэндаў. Майстры паспяхова павышаюць пазнавальнасць як брэндаў, так і свайго тэатра.

Толькі спалучаючы тэатр ценяў з папулярным кантэнтам, які падабаецца людзям, можна атрымаць новую аўдыторыю, упэўнены Дан Фэйхуа. Ён завёў акаўнты ў сацсетках, каб паказаць, што цені могуць быць моднымі і крутымі, а ў традыцыйнай кітайскай культуры ёсць разнастайныя інтэрпрэтацыі. Малады майстар публікуе відэа, у якіх фігуркі танчаць пад поп-музыку, а таксама паказвае ценявыя варыянты папулярных герояў відэагульняў, анімэ, кіно і тэлесерыялаў, набіраючы мноства лайкаў.

За віртуальным светам Дан Фэйхуа не забываецца і пра рэальны. Ён злучае тэатр ценяў з іншымі традыцыямі нематэрыяльнай спадчыны і камерцыялізуе свой прадукт, укараняючы паўсюль культурны вопыт і надаючы сацыяльнай прасторы вялікую культурную глыбіню.