Рэспубліканскі прававы прыём пройдзе 31 кастрычніка па ўсёй краіне

Любы ахвотны зможа бясплатна атрымаць кансультацыі прафсаюзных юрыстаў па пытаннях, звязаных з працоўнымі адносінамі.

Месца правядзення — арганізацыі, якія знаходзяцца на тэрыторыі раёнаў, гарадоў краіны, а таксама, раённыя, гарадскія аб’яднанні прафсаюзаў. Час і месца прафсаюзнага прыёму можна даведацца на афіцыйным інтэрнет-партале ФПБ. Таксама ажыццяўляецца і папярэдні запіс: запісацца можна асабіста, па тэлефоне, праз сайт ці па адрасе электроннай пошты абласных (Мінскага гарадскога) аб’яднанняў прафсаюзаў.

— Выязныя прававыя прыёмы — адна з актуальных форм работы прававой інспекцыі працы. Практыка прымянення заканадаўства аб працы, у тым ліку пытанні ўстанаўлення індывідуальнага рэжыму рабочага часу, устанаўленне норм працы і парадку выплаты заработнай платы, асаблівасці кантрактнай формы найму, парадку разліку пры звальненні, гарантыі работнікам пры часовым пераводзе да іншага наймальніка — гэта найбольш частыя пытанні, з якімі звяртаюцца грамадзяне. Разам з тым нямала пытанняў, якія датычацца і іншых сфер. Напрыклад, асаблівасці пенсійнага ці жыллёвага заканадаўстваў, — расказалі ў прэс-службе Федэрацыі прафсаюзаў.

Неабходна адзначыць, што да вырашэння праблем, з якімі звяртаюцца людзі, падключаюцца і пракурорскія работнікі, якія таксама прысутнічаюць у прававых прыёмах.

Нагадаем, звярнуцца па дапамогу да прафсаюзных юрыстаў можна па тэлефоне, прыйсці на асабісты прыём, у тым ліку на выязны, які праходзіць кожны апошні чацвер месяца ў кожным рэгіёне краіны, пакінуць пісьмовы зварот або звярнуцца праз спецыяльны сэрвіс на Інтэрнет-партале ФПБ.

Алена КРАВЕЦ

Прэв’ю: БелТА