Аляксандр Лукашэнка: «І Беларусь, і Расія павінны абараняць свой рынак»

Прэзідэнт правёў сустрэчу з першым віцэ-прэм’ерам Расійскай Федэрацыі. Размова, у прыватнасці, ішла аб сумесных беларуска-расійскіх праектах, якія найперш датычацца авія- і аўтамабілебудавання. Як звярнуў увагу Аляксандр Лукашэнка, апошнім часам з расійскім кіраўніцтвам шмат гаворыцца аб тым, што Захаду так і не ўдалося паставіць Беларусь і Расію на калені, прыціснуць і нахіліць. У гэтым, па словах кіраўніка дзяржавы, вялікая заслуга тых сектараў эканомікі, якія ўзначальвае Дзяніс Мантураў.

«Перш за ўсё — прамысловасць, — канкрэтызаваў беларускі лідар. — Мы паставілі перад сабой амбіцыйную задачу — зноў разам з расіянамі пераадолець залежнасць ад імпарту — і сур’ёзна заняліся імпартазамяшчэннем. Я думаю, што гэта вялікі кавалак работы вашай у Беларусі з нашым урадам, каб вызначыцца, як будзем дзейнічаць далей». 

Аляксандр Лукашэнка ўдзячны Прэзідэнту і ўраду Расіі за фінансаванне многіх сумесных імпартазамяшчальных праектаў. Сярод іх — такі знакавы і глабальны праект, як вытворчасць самалёта «Асвей». «Для нас гэта ўвогуле, можна сказаць, новая гісторыя, — адзначыў Прэзідэнт. — Можа быць, з гэтага самалёта і пачнецца эра авіябудавання ў Беларусі. Вы чалавек вядомы ў гэтай сферы, у прамысловасці ў тым ліку, і, думаю, ваша падтрымка для нас будзе вельмі важная». 

Па словах кіраўніка дзяржавы, сумесных праектаў дастаткова. «Нават больш, чым мы дамаўляліся, аб’ёмаў грошай, якія Расія вылучыла ў якасці крэдытаў, — удакладніў ён. — Магчыма, мы дамовімся аб тым, што Расія будзе зацікаўлена ў новых нашых праектах і будзе павялічана гэтае фінансаванне». 

Аляксандр Лукашэнка нагадаў, што калісьці ў Беларусі адкрывалі новую эру ў вытворчасці аўтамабіляў. «Таксама вельмі важнае пытанне, — звярнуў увагу Прэзідэнт. — Вы ў Расіі больш, чым хто-небудзь, разумееце ў гэтай справе. Хацелася б, каб тыя непаразуменні або нейкія недагаворкі ў сувязі з імпартазамяшчэннем па легкавых аўтамабілях мы маглі пераадолець і на нашым сумесным рынку мы б выраблялі беларускія і расійскія аўтамабілі перш за ўсё».

Кіраўнік дзяржавы падкрэсліў, што ні для каго не сакрэт, што і Беларусь, і Расія павінны абараняць свой рынак. «А каб не трапіць з агню ды ў полымя, як я часта кажу (нашы калегі гэта разумеюць цудоўна), шляхі супрацоўніцтва з такімі дзяржавамі пазначаны, яны ёсць, каб не атрымалася так, як з заходнікамі: сышлі, усё кінулі, „працаваць не будзем“, — канкрэтызаваў ён. — Праўда, сышлі — дзякуй. Няхай сыходзяць. Кампетэнцыі і людзі засталіся, сыравіны і рэсурсаў у нас хапае. Будзем вырабляць і замяшчаць іх тавары сваімі».

Аляксандр Лукашэнка заўважыў, што ад гэтага візіту першага намесніка старшыні ўрада Расійскай Федэрацыі ў Беларусь многае залежыць. «Мы з Прэзідэнтам Пуціным аб гэтым гаварылі і чакаем ва ўрадзе Расіі вынікаў вашага візіту ў Беларусь, — удакладніў ён. — Для таго, калі будуць нейкія пытанні да прэзідэнтаў, мы маглі ў бліжэйшы час іх вырашыць. 5 студзеня — саюзны Вышэйшы дзяржсавет. Таму трэба расставіць усе кропкі над „і“. Пажадана на ВДС. Каб і будучыя, і наступныя гады былі зразумелыя для Беларусі і Расіі ў супрацоўніцтве».

У сваю чаргу, Дзяніс Мантураў падзякаваў за магчымасць абмяняцца меркаваннямі па пытаннях, якія стаяць у двухбаковым парадку дня. «Вы абсалютна правільна адзначылі, што эра развіцця Беларусі як дзяржавы з авіяцыйнай прамысловасцю актыўна сёння развіваецца, — акцэнтаваў увагу першы віцэ-прэм’ер Расіі. — І не толькі з улікам праекта „Асвей“. Мы актыўна ўзаемадзейнічаем з прадпрыемствамі грамадзянскіх авіяцыйных заводаў Беларусі па вытворчасці кампанентаў. Гэта датычыцца і самалёта „Іл-76“, і „Ту-214“. Я разлічваю, што гэта тэндэнцыя будзе захоўвацца. Мы лінейку і самалётаў, і наменклатуры, і колькасць кампанентаў будзем пашыраць. У вас вельмі кампетэнтныя спецыялісты. Ёсць і тэхналагічнае абсталяванне і, самае галоўнае, калектывы людзей, якія гатовы рэалізоўваць гэты праект». 

Па словах Дзяніса Мантурава, у планах — абмеркаваць і сумесныя кірункі па імпартазамяшчэнні. «Нашай сумеснай тэхналагічнай незалежнасці ад заходніх краін, — удакладніў ён. — Сапраўды, гэта больш за 100 мільярдаў рублёў прадастаўленых пазык з боку Расійскай Федэрацыі па многіх сектарах прамысловасці. Гэта і мікраэлектроніка, і машынабудаванне, і металургія, хімія. Гэта сапраўды будзе добры ўнёсак у нашу з вамі агульную скарбонку Саюзнай дзяржавы па нарошчванні кампетэнцый і індустрыяльнага патэнцыялу». 

Вераніка КАНЮТА

Фота БелТА

У тэму

Як адзначыў у размове з журналістамі першы намеснік старшыні ўрада Расійскай Федэрацыі Дзяніс МАНТУРАЎ, узаемадзеянне паміж дзвюма краінамі актыўна развіваецца. Асабліва, па яго словах, цяпер, калі Захад імкнецца аказваць максімальны ціск на Расію і Беларусь з пункту гледжання пастаўкі тэхналагічнага абсталявання і камплектуючых агрэгатаў. «Мы паставілі перад сабой задачу — выйсці на ўзровень тэхналагічнага суверэнітэту, які будзе дазваляць мець і свае асноўныя фонды (маюцца на ўвазе станкі, абсталяванне, свае агрэгаты і камплектуючыя) для таго, каб забяспечыць вытворчасць той прамысловай прадукцыі, у якой ёсць неабходнасць дзвюх эканомік — Расіі і Беларусі, — канкрэтызаваў першы віцэ-прэм’ер Расіі. — Мы з Аляксандрам Рыгоравічам зверылі гадзіннікі па тых праектах, па якіх Расія прадаставіла пазыку на 100 мільярдаў рублёў. Гэта датычыцца галіны мікраэлектронікі ў першую чаргу, хіміі, металургіі, машынабудавання — там, дзе мы бачым сумеснае выкарыстанне той прадукцыі, якая будзе вырабляцца на тэрыторыі Беларусі».

Кажучы аб узаемадзеянні ў авіяцыйнай індустрыі, Дзяніс Мантураў паведаміў, што самалёт «Асвей» ужо знаходзіцца ў актыўнай фазе распрацоўкі і будзе вырабляцца на тэрыторыі дзвюх краін. 

Акрамя таго, на сустрэчы з Прэзідэнтам абмяркоўваліся пытанні рэалізацыі дэкрэта № 3 Саюзнай дзяржавы па адзінай прамысловай палітыцы ў частцы выкарыстання мер, інструментаў фінансавай падтрымкі дзвюх дзяржаў. 

Што датычыцца павелічэння аб’ёмаў фінансавання сумесных праектаў, Дзяніс Мантураў паведаміў, што гэтае пытанне будзе абмяркоўвацца і ў далейшым на перагаворах ва ўрадзе Беларусі з прэм’ер-міністрам Раманам Галоўчанкам і профільным віцэ-прэм’ерам. Пры гэтым наведванне ў рамках гэтага візіту першым намеснікам старшыні расійскага ўрада прадпрыемстваў «БЕЛАЗ» і «БЕЛДЖЫ», па яго словах, таксама дасць дадатковую магчымасць для разумення, у якіх кірунках можа быць пашырана індустрыяльная кааперацыя, у тым ліку ў частцы магчымых дадатковых крыніц фінансавання гэтых праектаў.