Чым заняць дзяцей на канікулах?

Зусім нядаўна, вераснёўскай раніцай, мы выпраўлялі школьнікаў у краіну ведаў. Прайшло няшмат часу, і вось лістота змяніла афарбоўку, цёплыя курткі і шалікі — лёгкае адзенне, на вуліцы на ўсю моц уладарыць залатая восень, а ў школьныя журналы паволі выстаўляюцца чацвяртныя адзнакі. Гэта значыць, што зусім хутка ў школьнікаў пачнуцца першыя ў навучальным годзе вакацыі. Васьмідзённы перадых — якраз тое, што трэба пасля першай адаптацыйнай чвэрці, калі яшчэ свежыя ўспаміны аб трохмесячнай вольніцы. Для першакласнікаў гэтая чвэрць і зусім стрэсавая: у іх жыцці пачаўся новы перыяд — з раскладам, дысцыплінай, з чужымі дарослымі і незнаёмымі дзецьмі. Таму асабліва важна, як будзе арганізаваны гэты невялікі адпачынак, з якімі ўражаннямі дзеці вернуцца ў школу.

Вольнаму часу школьнікаў падчас канікул традыцыйна ўдзяляюць шмат увагі. На момант пачатку адпачынку, а то і раней кожная школа падрыхтавала план мерапрыемстваў у дні канікул. 

Як расказалі ў Міністэрстве адукацыі, самым папулярным, бяспечным і беспраблемным для бацькоў відам адпачынку іх дзяцей застаюцца аздараўленчыя лагеры дзённага знаходжання. Толькі ў Мінску такія лагеры змогуць прыняць каля 14 тысяч школьнікаў. Наведванне лагера прадугледжвае розныя актыўнасці і пазнавальныя экскурсіі, спартыўныя мерапрыемствы і развіццёвыя гульні. 

Дзеці прадоўжаць займацца любімай справай у клубах па інтарэсах. А могуць свой адпачынак прысвяціць добраўпарадкаванню роднай зямлі. У прыватнасці, старшакласнікам прапануюць стаць удзельнікамі рэспубліканскага праекта «#ЗаДело», дзе справай для сапраўдных патрыётаў стане навядзенне парадку на малой радзіме. У рамках праекта можна таксама наведаць пажылых людзей і дапамагчы ім з нарыхтоўкай агародніны на зіму, напрыклад, даставіць вітамінныя прадукты з восеньскіх кірмашоў.

11 кастрычніка кіраўнік дзяржавы даў старт рэспубліканскай акцыі — «Дай лесу новае жыццё!» Далучыцца да яе можа кожны школьнік і пасадзіць сваё дрэва ў агульным беларускім лесе, дапамагаючы такім чынам аднаўленню ўчасткаў ляснога фонду, якія пацярпеў ад летняй стыхіі.

Канікулы — зручны час для вучняў выпускных класаў задумацца аб сваёй будучыні і вызначыцца з прафесіяй. Дапамагаюць у гэтым дні адчыненых дзвярэй у ВНУ і ўстановах сярэдняй спецыяльнай адукацыі. 

У першыя лістападаўскія дні ў сценах беларускіх універсітэтаў і каледжаў можна назіраць групы школьнікаў, якія з цікавасцю знаёмяцца з жыццём навучальных устаноў. Старшакласнікі з усіх рэгіёнаў краіны размаўляюць са студэнтамі, выкладчыкамі, задаюць пытанні членам прыёмнай камісіі, наведваюць музеі універсітэтаў і каледжаў.

Наведванне месцаў гістарычнай памяці — яшчэ адзін важны момант адпачынку дзяцей на канікулах. У кожным рэгіёне Беларусі ёсць знакавыя мясціны. Важна, каб дзеці аб іх ведалі, цікавіліся гісторыяй краіны ў цэлым і сваёй малой радзімы ў прыватнасці. Школьнікі з рэгіёнаў — частыя госці сталіцы. У Мінску яны знаёмяцца з экспазіцыямі музея гісторыі Вялікай Айчыннай вайны, наведваюць Нацыянальную бібліятэку, сталічныя тэатры, іншыя месцы.

Аб тым, як будзе наладжаны восеньскі адпачынак дзяцей у шостай гімназіі Мінска, расказвае дырэктар установы адукацыі Наталля КАЗАК.

— У гімназіі вучацца больш за дзве тысячы дзяцей, і, вядома, іх вольны час у канікулы — гэта наш клопат. Запланавана мноства мерапрыемстваў для максімальнай занятасці дзяцей. Хочам зрабіць канікулы актыўнымі і карыснымі. Па-першае, на гэты перыяд у гімназіі будзе адкрыты аздараўленчы лагер, які наведаюць больш за сто дзяцей, у асноўным вучні малодшых класаў. Для іх прадугледжаны сняданак, абед і падвячорак. Дзённы сон у рэжыме таксама ёсць.

У лагеры будуць профільныя атрады: тэатральна-танцавальны, ваенна-патрыятычны і спартыўны — дзеці, такім чынам, будуць не толькі атрымліваць асалоду ад адпачынку, але і ўдзельнічаць у цікавых, пазнавальных і карысных мерапрыемствах, — зазначыла дырэктар гімназіі.
Паводле яе слоў, для кожнага класа складзена свая праграма, аб гэтым паклапаціліся класныя кіраўнікі. 

Там ёсць і паездкі па гістарычных і памятных мясцінах, экскурсіі ў музеі, пешаходныя экскурсіі па Мінску і гэтак далей. Што датычыцца работы самой гімназіі, то, як і ва ўсіх установах сярэдняй адукацыі краіны, гурткі і секцыі, творчыя майстэрні, спартыўная зала і музейны пакой будуць працаваць у звычайным рэжыме.

Таксама Наталля Казак адзначыла, што для часткі нашых вучняў канікулы стануць часам падрыхтоўкі да чарговага, раённага, алімпіяднага этапу. 

А для тых, каму трэба падцягнуць веды, арганізаваны дадатковыя заняткі.

Завершацца восеньскія канікулы 3 лістапада. Адукацыйны працэс другой чвэрці пачнецца 4 лістапада і працягнецца да 24 снежня. 

Зімовы адпачынак будзе больш працяглым — 14 дзён. На канікулы школьнікі адправяцца 25 снежня 2024 года і вернуцца да заняткаў 8 студзеня 2025 года. 

Па традыцыі самай доўгай застаецца трэцяя навучальная чвэрць — амаль тры месяцы — з 8 студзеня да 22 сакавіка. Вясновыя канікулы будуць такімі ж непрацяглымі, як і восеньскія, — восем дзён — з 23 да 30 сакавіка 2025 года. 

Чацвёртая чвэрць будзе самай кароткай — з 31 сакавіка да 30 мая. Завяршаюць яе раней 23 мая толькі навучэнцы 9 і 11 класаў.

Самы доўгачаканы і працяглы адпачынак школьнікаў чакае ўлетку. 
Асноўная маса навучэнцаў будзе адпачываць 92 дні — з 1 чэрвеня да 31 жніўня. Дзевяцікласнікаў у першай дэкадзе чэрвеня чакаюць іспыты за курс базавай школы, таму на вакацыі яны адправяцца на 82 дні — з 11 чэрвеня да 31 жніўня. 

Дадатковыя канікулы прадугледжаны для самых маленькіх школьнікаў — 1-2 класаў, а таксама 3 класаў з ліку вучняў з асаблівасцямі псіхафізічнага развіцця з пяцігадовым тэрмінам навучання на І ступені агульнай сярэдняй адукацыі. Адпачываць яны будуць сем дзён — 
з 17 да 23 лютага.

Алена ВІНАГРАДАВА

Фота Лізаветы Голад