Што змянілася для ІП з 1 кастрычніка?

Ключавое новаўвядзенне, якое ўступае ў сілу з 1 кастрычніка, — вызначэнне ўрадам пералікаў відаў дзейнасці для індывідуальных прадпрымальнікаў, фізічных асоб, якія ажыццяўляюць самастойную прафесійную дзейнасць, і рамеснікаў. Пералікі відаў дзейнасці, вызначаныя ўрадам, уступілі ў сілу з 1 кастрычніка. З гэтага моманту дзяржаўная рэгістрацыя ІП па відах эканамічнай дзейнасці, якія не ўключаны ў пералікі, ажыццяўляцца не будзе. Для дзейных ІП, віды эканамічнай дзейнасці якіх не ўвайшлі ў пералікі, прадугледжаны пераходны перыяд (да 31 снежня 2025 года) для перарэгістрацыі ў камерцыйную арганізацыю ў спрошчаным парадку ў адпаведнасці з заканадаўствам.

У спіс дазволеных для ІП увайшла дзейнасць у галіне сувязі, па забеспячэнні пажарнай бяспекі, правядзенні судовых экспертыз, звязаная з уздзеяннем на навакольнае асяроддзе, з каштоўнымі металамі і каштоўнымі камянямі (за выключэннем афінажу каштоўных металаў, рэкуперацыі каштоўных камянёў, аптовага гандлю і каштоўных камянёў, скупкі ў грамадзян у вырабах і ломе, збору і перапрацоўкі такога лому і адходаў, якія паступаюць ад юрыдычных і фізічных асоб). Таксама ў пераліку для ІП прысутнічае дзейнасць, звязаная з працаўладкаваннем за межамі Беларусі, са зборам і распаўсюджваннем інфармацыі аб фізічных асобах у мэтах іх знаёмства, паліграфічная дзейнасць, экспертыза тавараў.

Акрамя таго, ІП дазволены пэўныя віды дзейнасці ў галіне сельскай, лясной і рыбнай гаспадаркі (напрыклад, вырошчванне збожжавых, бабовых і насення алейных культур, агародніны, бахчавых, караняплодных і клубняплодных культур, грыбоў, тытуню, развядзенне некаторых відаў жывёл, лесанарыхтоўкі), у апрацоўчай прамысловасці (у прыватнасці вытворчасць хлебабулачных вырабаў і мучных кандытарскіх вырабаў, гатовых кармоў для хатніх жывёл, мэблі, ювелірных вырабаў, біжутэрыі, музычных інструментаў, спартыўных тавараў, гульняў і цацак), у сферы будаўніцтва (у тым ліку электрамантажныя, санітарна-тэхнічныя, ізаляцыйныя, тынкавальныя, сталярныя і цяслярскія, малярныя і шкляныя работы), у галіне інфармацыі і сувязі (дзейнасць па вытворчасці кіна-, відэафільмаў і тэлевізійных праграм, камп’ютарнае праграмаванне) і інш.

Таксама ў спіс дазволеных для ІП відаў дзейнасці ўвайшлі збор і апрацоўка сцёкавых вод, тэхнічнае абслугоўванне і рамонт аўтамабіляў, рознічны гандаль аўтамабільнымі дэталямі, вузламі і прыладамі для аўто, тэхнічнае абслугоўванне і рамонт матацыклаў, дзейнасць па мясцовай дастаўцы тавараў дадому, паслугі па грамадскім харчаванні, здача ў наём уласнай і арандаванай нерухомай маёмасці, рамонт камп’ютараў, прадметаў асабістага карыстання і бытавых вырабаў і інш.

Што да самазанятых, у пералік увайшло больш за 80 відаў дзейнасці. У тым ліку арэнда, пракат забаўляльнага і спартыўнага абсталявання (веласіпеды, канькі, турыстычны рыштунак і іншае), відэаздымка, відэамантаж, аднаўленне камп’ютараў, ноўтбукаў, планшэтных камп’ютараў пасля збою, рамонт, тэхнічнае абслугоўванне камп’ютараў і перыферыйнага абсталявання, выпас жывёлы, кашэнне траў. Таксама самазанятыя могуць выконваць па замовах спажыўцоў нарыхтоўку драўніны на дровы, мур (рамонт) печаў і камінаў, малярныя, шкляныя, тынкавальныя, сталярныя і цяслярскія работы, ачыстку і афарбоўку даху, афарбоўванне агароджаў і гаспадарчых пабудоў, устаноўку (мантаж) столяў і г. д.

Сярод іншых відаў дзейнасці, дазволеных для самазанятых, — дастаўка спажыўцам тавараў дадому, пісьмовы і вусны пераклад, прыборка ад снегу і лёду, выраб дублікатаў ключоў, настройка і рамонт музычных інструментаў, цырульні і касметычныя паслугі, манікюр і педыкюр, пагрузка і разгрузка грузаў, распілоўка і колка дроў, рэалізацыя спажыўцам кацянят і шчанят пры ўмове ўтрымання хатняй жывёлы (кошкі, сабакі), рамонт і аднаўленне мэблі, рамонт абутку, гадзіннікаў, чамаданаў, сумак, парасонаў, швейных і трыкатажных вырабаў, галаўных убораў, дываноў, рэпетытарства і інш.

У пералік відаў рамеснай дзейнасці ўвайшлі аўтэнтычныя, самабытныя рамёствы — бондарства; выраб і рамонт гужавых павозак, саней і дзіцячых санак, вырабаў, выкананых у лапікавай тэхніцы, нацыянальнага беларускага касцюма (яго дэталяў) з захаваннем традыцыйнага крою і вышыўкі, нацыянальных музычных інструментаў, традыцыйных нацыянальных прылад лоўлі рыбы і інш.; выраб пражы; кавальская справа; мастацкая апрацоўка і роспіс вырабаў з дрэва, каменя, косці, скуры, рога, металу, бляхі, шкла, керамікі, фанеры, прадстаўленых спажыўцом. Тыя віды дзейнасці, якія не трапілі ў пералік, напрыклад, выраб вясельных аксесуараў, свечак, мыла, фізічная асоба зможа ажыццяўляць у якасці самастойнай прафесійнай дзейнасці.

Паводле БелТА