У Белхімпрафсаюзе прайшоў круглы стол да Дня народнага адзінства

Удзел у рабоце круглага стала «Разам назаўжды. Дзень народнага адзінства» прыняло кіраўніцтва прафсаюза нафтавікоў, хімікаў і гарнякоў, а таксама маладзёжны і прафсаюзны актыў прадпрыемстваў галіны.

З прывітальным словам да прафактыву нафтахімікаў звярнулася старшыня Белхімпрафсаюза Святлана Клачок, якая нагадала ўсім прысутным аб важнасці захавання гістарычнай памяці, рацыянальнага погляду на актуальны стан спраў і перадачы гістарычнай праўды з пакалення ў пакаленне.

— 17 верасня — гэта адна з трох гістарычных дат Беларусі, разам з Днём Перамогі і Днём Незалежнасці, якія даюць нам магчымасць азірнуцца ў мінулае, каб моцна трымаць у руках сваю сучаснасць і абараняць будучыню, — падкрэсліў значнасць свята намеснік старшыні галіновага прафсаюза Валерый Цітоў.

Намеснік старшыні Пастаяннай камісіі па адукацыі, культуры і навуцы Палаты прадстаўнікоў Нацыянальнага сходу Рэспублікі Беларусь, доктар гістарычных навук, дацэнт Вячаслаў Даніловіч выступіў на мерапрыемстве ў якасці эксперта і абапіраючыся на гістарычныя факты расказаў аўдыторыі аб падзеях паміж Першай сусветнай і Вялікай Айчыннай войнамі.

— Свята народнага адзінства мае нашмат большы сэнс, чым проста Дзень уз’яднання Заходняй Беларусі і БССР. Ён сімвалізуе адзінства нацыі, якое грунтуецца на агульнай гісторыі, менталітэце і традыцыях. Нельга не адзначыць той факт, што менавіта адзінства, адноўленае ў 1939 годзе, дазволіла беларускаму народу выстаяць у гады Вялікай Айчыннай вайны, — адзначыў Вячаслаў Даніловіч.

Кожны ўдзельнік круглага стала добра ведае пра лёс свайго народа, які праз стагоддзі праносіць прынцыпы добрасуседства і міралюбнасці нават у самыя жудасныя часы.

— Майму старэйшаму сыну 10 гадоў і яго дзядуля, які быў лётчыкам, многія важныя рэчы да яго давёў. Таму ў дзіцяці ўжо ёсць разуменне пра тое, што беларусы выстаялі ў страшнай вайне, што тыя даўнія падзеі маюць вялікае значэнне і сёння, — лічыць Арцём Зіма, член прафкама і начальнік АЗС РУП «Беларуснафта-Мінскаўтазапраўка».

Як вядома, на тэрыторыі Беларусі ў міры і згодзе пражываюць прадстаўнікі 156 нацыянальнасцяў: працуюць, гадуюць дзяцей, атрымліваюць адукацыю і удзьнічаюць у развіцці краіны. Пры гэтым кожны чалавек мае права захоўваць сваю нацыянальную прыналежнасць.

-— Для мяне Дзень народнага адзінства дэманструе пераемнасць пакаленняў і падкрэслівае непахіснасць і самадастатковасць беларускай нацыі і дзяржаўнасці. У маіх дзіцячых успамінах дагэтуль мяне сагравае атмасфера душэўнасці і добразычлівасці, калі за сямейным святочным сталом збіраліся прадстаўнікі розных нацыянальнасцяў і веравызнанняў. Напярэдадні свята хачу пажадаць усім шанаваць моманты да таго, як яны стануць успамінамі! — дадала Ангеліна Станкевіч, галоўны спецыяліст па інфармацыйнай працы Мінскай абласной арганізацыі Белхімпрафсаюза.

Алена КРАВЕЦ

Фота ФПБ