Янка Маўр (1883 — 1971) — з кагорты пісьменікаў, чые творы навечна ўвайшлі ў залаты фонд беларускай дзіцячай літаратуры, адным з найболей яркіх заснавальнікаў якой ён якраз і з’яўляецца. Пачаўшы друкавацца ў першай палове 1920-х гадоў, ён захапіў юнага чытача навукова-фантастычнай аповесцю «Чалавек ідзе», якая лічыцца першай навукова-фантастычнай аповесцю на беларускай мове.
У наступных творах — «У краіне райскай птушкі» і «Сын вады» — пісьменнік звярнуўся да адлюстравання правоў каланіяльных народаў Паўночна-Заходняй Афрыкі. Відаць, самым папулярным творам Янкі Маўра з’яўляецца аповесць «Палескія рабінзоны». І гэты твор і іншыя аповесці і апавяданні класіка перакладзены на многія мовы народаў свету: рускую, англійскую, армянскую, таджыкскую, азербайджанскую, літоўскую, польскую, кітайскую і іншыя.
Толькі што ў Мінску ў выдавецтве «Папуры» пабачыла свет кніга Янкі Маўра «Чалавек ідзе», куды ўвайшла аднайменная аповесць і апавяданні «Слёзы Тубі», «Незвычайная прынада», «Лацароні», «Шчасце», «Бярозавы конь», «Падарожжа вакол дома», «Васька Жукаў» і іншыя творы. Завяршаецца невялікага памеру зборнік асабліва шчымлівым апавяданнем, напісаным у 1946 годзе, — «Максімка». У цэнтры гэтага твора — хлопчык Максімка, які чакае з вайны свайго татку... Але так атрымалася, што ён спярша прызнаў за свайго бацьку чужога чалавека... Апавяданне — пра перажыванні дарослых і дзяцей, пра тое, якой цаной перамаглі фашыстаў нашы прашчуры. Твор напоўнены дабрынёю, эмацыйным перакананнем, што на самай справе з’яўляецца вечнай ісцінай у гэтым няпростым існаванні чалавека ў свеце. Вялікі мастак слова падбірае тыя словы, так выбудоўвае сюжэт, што і цяпер, праз многія дзесяцігоддзі пасля нараджэння апавядання, «Максімка» чапляе свядомасць, прымушае трывожацца сэрцу.
Новую кнігу Янкі Маўра, якая пабачыла свет накладам 1 500 экзэмпляраў, можна набыць у кнігарнях ААТ «Белкніга» па ўсёй краіне і ў кнігарні «Акадэмкніга» у Мінску па адрасе: праспект Незалежнасці, 72.
Добрага чытання! Новых адкрыццяў на старонках твораў Янкі Маўра!
Раман СЭРВАЧ
