Зваротаў на «гарачую лінію» ФПБ ад удзельнікаў жніва стала менш

Нагадаем, з 1 ліпеня нацыянальны прафцэнтр запусціў «гарачую лінію» ФПБ па пытаннях, звязаных з уборачнай кампаніяй. Прафсаюзныя спецыялісты прымалі званкі штодзень. Усяго паступіла каля 70 зваротаў, большая частка з якіх не звязана з уборачнай кампаніяй. Разам з тым, ніводны зварот не застаўся без увагі.

— Практычна па ўсіх званках прадстаўнікі прафсаюзаў выязджалі на месца, каб дэталёва разабрацца ў сітуацыі. Гэта, напрыклад, выпадкі правамернасці пазбаўлення прэміі работніка і прыцягнення да звышурочных работ, непрацоўны стан кандыцыянераў у кабіне камбайна. У кожным выпадку парушэнні з боку наймальнікаў пацвердзіліся, пытанне аператыўна вырашылася на карысць работнікаў. У цэлым, большая частка зваротаў насіла кансультатыўны характар. Найбольш часта задаюць пытанні датычыліся аплаты працы ў час уборачнай кампаніі, у тым ліку па дагаворы падраду, афармлення работы ў выхадныя дні, магчымасці ўдзелу ў працоўных спаборніцтвах для тых, хто працуе па грамадзянска-прававым дагаворы, — расказаў галоўны тэхнічны інспектар працы Федэрацыі прафсаюзаў Беларусі Павел Манько.

Улічваючы той факт, што з кожным днём зваротаў ад удзельнікаў жніва становіцца менш, і ў цэлым наймальнікі больш адказна падыходзяць да стварэння камфортных і бяспечных умоў працы для работнікаў, занятых ва ўборачнай кампаніі, нацыянальным прафцэнтрам прынята рашэнне змяніць падыход у рабоце «гарачай лініі». Цяпер звароты будуць прымацца ад работнікаў па ўсіх пытаннях, якія датычацца аховы працы ў арганізацыях усіх галін.

Так, для атрымання кансультацыі і інфармавання аб праблемных пытаннях, звязаных з аховай працы, забеспячэннем камфортных і бяспечных умоў, захоўваецца нумар «гарачай лініі» — +375 29 676 18 40 (час працы: пн-чц з 8.30 да 17.30, пт з 8.30 −16.15). Кожнае тэлефанаванне будзе таксама дэталёва адпрацавана спецыялістамі Федэрацыі прафсаюзаў Беларусі, у тым ліку пры неабходнасці з выездам на месца.

Алена КРАВЕЦ

Прэв’ю: БелТА