З 4 па 8 верасня 2024 года ў Маскве на Цэнтральным выставачным павільёне «Экспацэнтр» (5 павільён) пройдзе 37-ы Маскоўскі кніжны кірмаш — буйнейшы і старэйшы кніжны форум у Расіі і Усходняй Еўропе, які існуе з 1977 года. Удзел у кірмаш прымае і дэлегацыя кніжнікаў Рэспублікі Беларусь. На стэндзе «Кнігі Беларусі», арганізаваным Міністэрствам інфармацыі Рэспублікі Беларусь, прадстаўлена прадукцыя вядучых дзяржаўных выдавецтваў нашай краіны.
Па традыцыі на 37-м кніжным кірмашы наведвальнікаў, усіх, хто любіць кнігу, чакае даволі шырокая і шматабсяжная праграма. Мноства сустрэч з пісьменнікамі і выдаўцамі, аўтограф-сесіі, розныя круглыя сталы і канферэнцыі, падвядзенне вынікаў розных літаратурных прэмій і конкурсаў, сярод якіх — «Кніга года-2023», «Мастацтва кнігі», «Рэвізор-2023», «Клас!»... Пройдуць самыя неспадзяваныя мерапрыемствы ў зоне лекторыя — сустрэчы з аўтарамі, дыскусіі і лекцыі пра літаратуру і рускую мову, пра Маскву, мастацтва, космас і моду.
— Даволі назваць некаторыя кніжныя навінкі, з-за прэзентацый якіх варта наведацца на выстаўку, — гаворыць дырэктар Маскоўскага міжнароднага кніжнага кірмашу Сяргей Кайкін. — Напрыклад, мяркую, што шмат каго з аматараў добрай класічнай прозы, асабліва з чытачоў старэйшага пакалення, не пакіне раўнадушным адкрыццё кнігі Яўгена Папова і Міхаіла Гундарына «Васіль Макаравіч», выданне якой прымеркавана да 95-годдзя легенды рускай прозы Васіля Шукшына. Рынат Валіулін прадставіць свой раман «Час гладзіць котак».
Моладзі параіў бы пазнаёміцца з чарговым выпускам зборніка прозы і паэзіі прэміі «Ліцэй», які так і завецца «Ліцэй-2024. Восьмы выпуск». Аляксандра Марыніна прадстаўляе новую кнігу «Шпаргалкі для гультаяватых аматараў гісторыі. Каралі і каралеўны Францыі. 987 — 1498». Дар’я Данцова пазнаёміць са сваёй аўтабіяграфічнай кнігай і з кнігай для дзяцей. Наведвальнікаў чакаюць сустрэчы з Захарам Прылепіным, сцэнарыстам Мршаўка Штапічам, Вадзімам Пановым, які пазнаёміць з трылерам «Дзяўчынка з лялькамі». Аматараў нон-фікшна запрашаю на прэзентацыю ілюстраванага альбома «Масква. Вандроўкі ў будучыню...» Вадзім Вернік прыйдзе на выстаўку з кнігай «Майя Плісецкая. Пяць дзён з легендай». Кніга — удалая спроба аўтара паказаць, якой ён бачыў балерыну сваімі вачыма, імкненне намаляваць сапраўдны партрэт Плісецкай, без усялякіх міфаў вакол яе імя.
Асобны праект — выстаўка на выстаўцы — Маскоўскі міжнародны дзіцячы кніжны кірмаш. Сярод яго ўдзельнікаў — пецярбургскі казачнік Ігар Алейнікаў, дзіцячы нейрапсіхолаг і эксперт па развіццю мозга дзіцяці Алена Лаштабега, унук Мікалая Носава пісьменнік Ігар Носаў. Акцёр тэатра і кіно Антон Шагін прэзентуе сваю кнігу вершаў для маленькіх чытачоў «Небыляндия».
На стэндзе, які прадставіць кнігі Рэспублікі Беларусь (сярод арганізатараў стэнда — ААТ «Белкніга»), — навінкі, што пабачылі свет у выдавецтвах «Мастацкая літаратура» , «Беларусь», Выдавецкім доме «Звязда», шэрагу іншых выдавецтваў. Па традыцыі да ўвагі наведвальнікаў — кнігі краіназнаўчага характару, выданні пра гісторыю Вялікай Айчыннай вайны, зборнікі ўнікальных матэрыялаў па тэме генацыду народа Беларусі ў часіны барацьбы з нямецка-фашысцкімі захопнікамі. Тым гасцям, наведвальнікам выстаўкі, якія завітаюць на беларускі стэнд, будуць прапанаваны і новыя выданні твораў беларускіх класікаў — Якуба Коласа, Янкі Купалы, Івана Шамякіна, Васіля Быкава, Уладзіміра Караткевіча, Максіма Багдановіча, Яўгеніі Янішчыц, Міхася Стральцова... Асобна прадстаўлены праект Саюза пісьменнікаў Беларусі і выдавецтва «Аверсэв» — серыя кніг «Сучасная беларуская літаратура», у якой змешчаны творы Алеся Бадака, Віктара Шніпа, Алены Стэльмах, Валянціны Драбышэўскай, Сяргея Трахімёнка, Алены Брава, Андрэя Федарэнкі, Алеся Бычкоўскага, Уладзіміра Мажылоўскага, Ніны Рыбік... Даволі шмат на беларускім стэндзе — і кніг беларускіх дзіцячых пісьменнікаў. Як класікаў, так і сучаснікаў. Выдавецкі дом «Звязда» пазнаёміць з новай кнігай беларускага нейрахірурга Гарбаніджада Гумена Гушанга «Ілюзія ведання.
Як не стаць закладнікам хваробы», а таксама з раманамі лаўрэата Нацыянальнай літаратурнай прэміі Беларусі Алесі Кузняцовай «Рускі пасадобль» і «Калі трашчыць лёд»...
Раман СЭРВАЧ
Супрацоўнікі Мінпрыроды расказалі, якая карысць ад дрэў у горадзе.
Восень для спецыялістаў аграрнай галіны — час падводзіць вынікі, і сёлета яны годныя.
У поўным аб’ёме задаволена патрэба краіны ў калійных і каменных солях, торфе, сапрапелі, будаўнічым камені, падземных водах.
