Старшыня Віцебскага аблвыканкама Аляксандр Субоцін правёў асабісты прыём грамадзян. Дапамога бізнесу, землеўладкаванне, капітальны рамонт — з гэтымі і іншымі пытаннямі да кіраўніка вобласці звярталіся людзі з Віцебска і Полацка.
Палачанін звярнуўся на прыём па пытанні няспраўнага дамафона ў сваім доме. Ён распавёў, што шукаў абслуговую арганізацыю і за змену няспраўнага дамафона пасля доўгіх хаджэнняў па інстанцыях вырашыў заплаціць самастойна са сваёй кішэні немаленькую суму. Старшыні аблвыканкама і заяўніку прадстаўнік Полацкага райвыканкама распавёў, што неўзабаве пытанне будзе вырашана і з абслуговай арганізацыяй на месцы, гэтым зоймецца адзін з буйных аператараў у краіне, які аказвае паслугі дамафоннай сувязі.
Звярнулася да Аляксандра Субоціна і віцебская сям’я, якая ўжо тры дзесяцігоддзі мае прадпрыемства па вытворчасці мэблі з масіву. Але невялікі бізнес знаходзіцца пад пагрозай закрыцця, бо тэрыторыя, дзе размешчаны цэхі, па генплану забудовы горада будзе аддадзена пад жыллёвае будаўніцтва. Першапачаткова прадпрымальнікі прасілі, каб паркоўку аднаго з жылых дамоў, якая павінна будзе тут з’явіцца, перанеслі ў іншае месца, але цяпер, калі іх рабочыя амаль усе звольніліся з прадпрыемства ў сувязі з закрыццём, сужэнцы змірыліся са стратай цэха і прыбытковай справы. На прыёме грамадзян яны расказалі кіраўніку рэгіёна, што гатовы аддаць добраўпарадкаваны ўчастак для патрэб горада, але просяць выплату абяцанай кампенсацыі. Аляксандр Субоцін даручыў заняцца гэтым пытаннем і падкрэсліў, што ў такім выпадку ў новым жылым мікрараёне якраз было б пажадана пакінуць перспектыўнае прадпрыемства, каб мясцовым жыхарам было дзе працаваць.
Жыхары садовых таварыстваў нярэдка сутыкаюцца з праблемамі ў камунікацыі з суседзямі і мясцовай уладай, якія прыводзяць да больш значных праблем. Кіраўнік садовага таварыства адмаўляе жанчыне пенсіённага ўзросту ўзгадняць заяўленыя межы ўчастка, якія на некалькі сантыметраў больш за дакументальныя, а без гэтага дазволу ўладальніца не можа зарэгістраваць яго ў адпаведнай службе.
Заяўніцы прапанавалі звярнуцца ў праўленне таварыства, пасля наведаць агульны сход для абскарджання ў выпадку адмовы, а затым звярнуцца ў суд. Таксама заяўніца засяродзіла ўвагу на стане шматкватэрнага дома на вуліцы Смаленскай. Паводле яе слоў, толькі пасля зваротаў у розныя інстанцыі кватэру і балкон прывялі ў адпаведнасць з тэхнічнымі патрабаваннямі. Старшыня аблвыканкама ўзяў абодва пытанні на кантроль і даў даручэнне спецыялістам разабрацца ў кожнай сітуацыі.
Пытанне па афармленні сажалкі ў іншым садовым таварыстве патрабуе змен у заканадаўстве. На зямельным участку заяўніцы знаходзіцца самаробны вадаём. На неадпаведнасць яго памераў нарматывам скардзяцца суседзі, а жанчына цяпер не можа прадаць дачу. Спецыялісты абласных камітэтаў па архітэктуры і будаўніцтве і прыродных рэсурсаў і аховы навакольнага асяроддзя адзначылі, што ў рэгіёне падобныя выпадкі нярэдкія, і таму яны выйшлі з прапановай унесці ў заканадаўства змены, па якіх вадаёмы пэўнай плошчы не будуць падлягаць абавязковай рэгістрацыі. Гэтае пытанне знаходзіцца на разглядзе ва ўрадзе, а да ўнясення дапаўненняў і змяненняў у існуючы заканадаўчы акт уладальнікі дачы не змогуць яе прадаць. Аляксандр Субоцін даручыў спецыялістам БТІ вывучыць пытанне і прапанаваць рашэнне, калі яно маецца, абапіраючыся на існуючы закон, каб не чакаць прыняцця абноўленага.
Падводзячы вынікі работы, кіраўнік вобласці падкрэсліў, што прыёмы грамадзян — гэта досыць эфектыўны механізм узаемадзеяння з насельніцтвам. «З дапамогай прыёмаў выяўляюцца пэўныя праблемы, прабелы ў заканадаўстве, і мы бачым, дзе сістэма дае збой. Часам ініцыятывы, з якімі прыходзяць грамадзяне, дапамагаюць палепшыць заканадаўчую базу і павысіць эфектыўнасць работы ўсёй сістэмы. Але існуе і адваротны бок медаля: некаторыя грамадзяне прыходзяць на прыём дзясяткі разоў з адным і тым жа пытаннем. Мы тлумачым ім алгарытм дзеяння, але яны не заўсёды гатовы слухаць і выкарыстоўваюць прыём як спосаб выказацца. Знайсці баланс паміж карысцю і ўтрыманствам — задача няпростая. Аднак, калі хоць бы аднаму чалавеку ўдаецца дапамагчы ў выніку такіх прыёмаў, то гэта ўжо недарэмна», — заключыў Аляксандр Субоцін.
Аляксандра Гвоздзева
Фота «Витебские вести»
Супрацоўнікі Мінпрыроды расказалі, якая карысць ад дрэў у горадзе.
Восень для спецыялістаў аграрнай галіны — час падводзіць вынікі, і сёлета яны годныя.
У поўным аб’ёме задаволена патрэба краіны ў калійных і каменных солях, торфе, сапрапелі, будаўнічым камені, падземных водах.
