Віцебшчына падыходзіць да завяршэння ўборачнай кампаніі: аграрыі вобласці выканалі задачу на 99 працэнтаў. На сёння ўбрана звыш 300 тысяч гектараў, паўночны рэгіён унёс у агульны каравай краіны больш за 700 тысяч тон збожжа з улікам рапсу. Найвышэйшую ўраджайнасць паказаў Аршанскі раён — тут хлебаробы атрымалі па 37,9 цэнтнера з гектара. Не дзіва, што і першыя ў вобласці камбайнеры-трохтысячнікі таксама з Аршаншчыны.
Сёлета, нягледзячы на складаныя ўмовы надвор’я, Аршанскі раён паказаў своеасаблівы аграрны рэкорд: хлебаробы перасягнулі 100-тысячны рубеж па намалоту зерня. А трактарысты-машыністы ААТ «Агракамбінат «Юбілейны» Уладзімір Палячынскі і Максім Сярноў першымі на Віцебшчыне намалацілі тры тысячы тон хлебнага золата. Павіншаваць перадавікоў з узятай вяршыняй прыехалі ў поле старшыня Віцебскага аблвыканкама Аляксандр Субоцін, кіраўнік раёна Ігар Мароз, старшыня Віцебскай абласной прафсаюзнай арганізацыі работнікаў АПК Таццяна Дзіканава, а таксама прадстаўнікі раённай улады.
Аляксандр Субоцін падзякаваў камбайнерам за высокія вытворчыя вынікі і значны ўклад у харчовую бяспеку краіны. Старшыня аблвыканкама падкрэсліў, што Орша заўсёды была адным з цэнтраў развіцця Віцебскага рэгіёна. «Тут, акрамя прамысловых прадпрыемстваў, ёсць і хэдлайнеры ў аграрным сектары. І ўсё ж такі дапамог і 506-ы ўказ кіраўніка дзяржавы. Як бы хто ні казаў, як бы цяжка ён ні ішоў, усё роўна — ён не проста даў імпульс, але і зрабіў зачын на будучыню: і інвестыцыйных праектаў шмат ажыццявілася, і грошы ўкладзены ва ўсе сферы. Гэта дазволіла і людзей крыху больш прыцягнуць сюды, і тэхналогію больш старанна выконваць, і тэхнікай пераўзброіць прадпрыемствы. Таму ўсё ў комплексе дазволіла захаваць Аршанскі раён як адзін з цэнтраў росту Віцебскай вобласці», — падкрэсліў кіраўнік вобласці.
З нагоды 100-тысячнага намалоту старшыня райвыканкама Ігар Мароз уручыў Аляксандру Субоціну каравай з мукі новага ўраджаю. Паспрабаваць яго змаглі ўсе ахвотныя: і механізатары, якія прыклалі да яго сілы, і прадстаўнікі мясцовай улады, якія падтрымліваюць аграрыяў, і журналісты, якія расказваюць людзям аб героях жніва.
Падзякі і грашовыя сертыфікаты Максіму Сярнову і Уладзіміру Палячынскаму ўручыла прафсаюзны лідар аграрыяў вобласці Таццяна Дзіканава. «Вашы вытворчыя дасягненні з’яўляюцца яркім прыкладам і маяком для іншых працаўнікоў сельскай гаспадаркі. Шчыры дзякуй за вашу самаадданасць, упартасць і высокія памкненні, праз якія паўночны рэгіён выходзіць на высокі п’едэстал. Вы сваёй працай фарміруеце трывалыя аграрныя традыцыі, якія стануць моцным падмуркам для новага пакалення хлебаробаў», — адзначыла Таццяна Мікалаеўна і за шматгадовую добрасумленную працу ўручыла Максіму Сярнову юбілейны медаль «120 гадоў прафсаюзнаму руху Беларусі».
Імя гэтага механізатара агракамбіната «Юбілейны» вядома ў Віцебскай вобласці. Былы супрацоўнік органаў унутраных спраў дзевяць гадоў таму абраў для сябе працу на зямлі. На кардынальную змену прафесійнай дзейнасці паўплывалі не толькі прыклад бацькі, з якім Максім пачынаў работу на камбайне з 12 гадоў, але і асабістыя душэўныя парывы. «Вырашыў, што больш мяне цягне ўсё ж такі да зямлі. Дзявяты год працую ў „Юбілейным“ і кожны дзень іду на працу з радасцю. А гарачая пара жніва для мяне асабліва доўгачаканая і любімая. Заўсёды разрывае азарт: як урадзіла збожжа, якое будзе надвор’е, колькі змагу ўбраць. Трэба быць на сваім месцы, там, дзе ты сапраўды патрэбен», — гаворыць Максім Сярноў.
Летась ён стаў першым чатырохтысячнікам Віцебшчыны і скончыў жніво з вынікам у 4350 тон збожжа і рапсу. У асабістым заліку хлебароба — больш за 3,5 тысячы тон, і ёсць надзеі на паляпшэнне свайго мінулага рэкорда — рапс у гэтым годзе таксама радуе ўраджайнасцю. Немалую ролю ў дасягненнях адыгрывае і тэхніка, на якой аграрый шчыруе ўжо трэці сезон. Айчынны камбайн абсталяваны кандыцыянерам, сучаснай ілюмінацыяй і нават аўтапілотам. Свайго «баявога таварыша» механізатар абслугоўвае сам і ставіцца да яго з рэўнасцю.
«Атрымліваць узнагароды заўсёды прыемна і пачэсна. Сумленная праца павінна быць адзначана. Сын і дачка таксама ганарацца мной, іншым часам бываюць са мной у кабіне, каб на свае вочы паглядзець, дзе днямі прападае тата. Жонка таксама працуе на прадпрыемстве, прадаўцом, падтрымліваем адзін аднаго», — расказвае Максім Сярноў і падкрэслівае, што яго асабісты поспех — гэта вынік плённай працы ўсяго калектыву.
За плячыма старшага камбайнера Уладзіміра Палячынскага больш за тры дзесяцігоддзі стажу ў сельскай гаспадарцы. Ён жартуе, што нарадзіўся ў полі, бо і бацька яго больш за 40 гадоў адпрацаваў трактарыстам. Сакрэт поспеху Палячынскага даволі просты: каб дасягнуць вынікаў, трэба плённа працаваць і сачыць за тэхнікай. Цяпер ён збірае першую тысячу тон амаль з закрытымі вачамі — абы толькі збожжа ўрадзіла, а вось у 2020 годзе Уладзімір Мікалаевіч паказаў рэкордны вынік: яго намалот збожжавых, зернебабовых культур і кукурузы склаў каля дзевяці тысяч тон! Прыемным напамінам аб гэтай падзеі сталі не толькі шматлікія падзякі і дыпломы, але і ганаровае званне «Чалавек года Віцебшчыны». Хаця аб сваіх дасягненнях сціплы хлебароб расказваць не любіць, ён упэўнены, што лепш за словы гавораць лічбы.
Наперадзе ў аграрыяў вобласці ўборка яравога рапсу і кукурузы. Спадзяёмся, што надвор’е паспрыяе працаўнікам закласці ў засекі яшчэ не адну тысячу тон.
Аляксандра Гвоздзева
фота аўтара
Супрацоўнікі Мінпрыроды расказалі, якая карысць ад дрэў у горадзе.
Восень для спецыялістаў аграрнай галіны — час падводзіць вынікі, і сёлета яны годныя.
У поўным аб’ёме задаволена патрэба краіны ў калійных і каменных солях, торфе, сапрапелі, будаўнічым камені, падземных водах.
