На Белтэлерадыёкампаніі прэзентавалі новы тэлеканал

Цяпер усю актуальную і пры гэтым правераную інфармацыю можна будзе знайсці на «Першым інфармацыйным». Менавіта з такой назвай днямі на Белтэлерадыёкампаніі прэзентавалі новы тэлеканал. Афіцыйны запуск яго чакаецца ў верасні. Новая пляцоўка дасць магчымасць як беларусам, так і жыхарам усяго свету атрымліваць свежыя і важныя навіны ў рэжыме нон-стоп і 24 гадзіны ў суткі.

Як паведамляецца на афіцыйным сайце галоўнага медыяхолдынга, аснову брэнда новага медыя складае лічба «1», а таксама модныя і стыльныя сінія і бірузовыя адценні. «Першы інфармацыйны» створаны на базе Агенцтва тэлевізійных навін Белтэлерадыёкампаніі.

«Найперш, акрамя праўдзівасці і аб’ектыўнасці, важная аператыўнасць. І жывы эфір дае гэта. Для гэтага ў тым ліку і ствараецца новы тэлевізійны канал. Таму што, у адрозненне ад класічных грамадска-палітычных каналаў, дзе навіны выходзяць з крокам у 2,3, а часам і ў 4 гадзіны, на гэтым тэлеканале выпуск можа ісці на працягу 4 гадзін у прамым эфіры. За гэты час можна паведаміць вялікую колькасць навін, трымаць нейкую важную тэму. Гатовыя мы ці не? Вядома, гатовыя!» — падзяліўся старшыня Белтэлерадыёкампаніі Іван Эйсмант.

На бягучы момант да працы гатовыя ўжо дзве студыі, апаратны блок і праводзяцца апошнія чытсавыя тракты. Падрыхтоўка і ўвага да запуску новай вяшчальнай кнопкі, з улікам таго, што гэта ўнікальны вопыт для беларускага тэлебачання, знаходзіцца на высокім узроўні.

Першымі гатоўнасць новага тэлеканала праверылі намеснік кіраўніка Адміністрацыі Прэзідэнта Уладзімір Пярцоў, прэс-сакратар кіраўніка дзяржавы Наталля Эйсмант і міністр інфармацыі Марат Маркаў.

Выпускі навін на «Першым інфармацыйным» будуць выходзіць штогадзіны. Таксама аўдыторыі будуць прапанаваны прамыя ўключэнні з месцаў самых важных падзей, экспертныя меркаванні і дзясяткі спецыяльных праектаў. Яшчэ ў найбліжэйшы час будзе запушчаны новы партал навін news.by.