Гэтыя радкі гімна вёскі Дварэц належаць пяру таленавітага журналіста, фотакарэспандэнта, які доўга і рупліва працаваў у газеце «Звязда» Яўгену Пясецкаму. І яны чырвонаю стужкаю праходзілі праз увесь сцэнарый свята, якое ладзілася суботнім жнівеньскім вечарам Малагарадзячыцкім сельскім домам культуры, з нагоды 115-гадавіны ўзгадак вёскі ў архіўных дакументах.
Да Дома сацыяльных паслуг (дарэчы, у ім мясцовымі жыхарамі сабраны прадметы ўжытку вяскоўцаў) прыйшлі на свята мясцовыя жыхары са сваімі дарослымі дзецьмі, унукамі, праўнукам і госці з суседніх вёсак. На палянцы змайстравалі макет будана і вогнішча, якія пераносяць прысутных у часы ліхалецця ва ўрочышча Мінкава, каля вёскі Дварэц, дзе ў гады акупацыі жылі вяскоўцы ў сямейным лагеры Давыдаўка (партызанскі атрад насіў імя Давыдава, легендарнага героя Айчыннай вайны 1812 г.). Падчас аперацыі «Марабу» вясной 1944 года карнікі ўварваліся ў лагер і знішчылі семярых вяскоўцаў, у тым ліку гадавалую дзяўчынку партызанскай сям’і Ганны Ахрамейка.
Шмат прыемных і добрых слоў прагучала ў адрас сціплых і працавітых аднавяскоўцаў. А старшыня Малагарадзячыцкага сельскага выканаўчага камітэта вітала цёпла і з удзячнасцю старэйшых жыхароў вёскі, актывістаў мясцовага самакіравання і ўручыла ім падарункі. Бібліятэкарам мясцовага СДК была арганізавана на свяце фотавыстава, якая распавядала аб тым, што ў гады Вялікай Айчыннай вайны ў вёсцы Дварэц са студзеня 1943 года друкаваліся газеты «Звязда» і «Чырвоная Змена» пад кіраўніцтвам галоўнага рэдактара — камуніста Барашкава Міхаіла Парфёнавіча. Прадстаўленыя фотадакументы сведчылі аб тым, што ў вёсцы базіраваўся штаб партызанскай брыгады № 121 імя Аляксея Брагіна (камандзір Пушчана К.Ф.). Асновай брыгады быў партызанскі атрад імя Гастэлы, арганізаваны маскоўскімі камсамольцамі, якія ў складзе добраахвотнікаў дабраліся з Падмаскоўя па лясных масівах і балотах, пераадольваючы рэкі, шасэйныя і чыгуначныя дарогі да вызначанага Цэнтральным штабам партызанскага руху вострава Добры, што ў 10 кіламетрах ад вёскі Дварэц. Дарэчы, партызаны-брагінцы ўдзельнічалі ў знакамітым партызанскім парадзе 16 ліпеня на іпадроме каля Мінска. Штогод аб гэтым распавядаюць экскурсаводы вучням з радзімы А. Брагіна (Расія), якія адпачываюць у нашым раёне ў аздараўленчым лагеры «Арэса».
Закончылася вайна... Былыя партызаны, воіны Чырвонай Арміі вярталіся ў родную вёску, дзе іх чакала папялішча — Дварэц быў спалены фашыстамі падчас аперацыі «Русалка» у 1943 годзе. Талакою будавалі новае жытло на родных сядзібах, уздымалі эканоміку калгаса «Дружба».
Сёлета ў вёсцы пражывае сорак чалавек, сярод іх — дзесяць сямейных пар, каля паўтара дзесятка пастаянна наведваюць бацькоўскія сядзібы і падтрымліваюць у іх жыццё. Два разы на тыдні з райцэнтра заходзіць аўтобус, двойчы жыхары могуць набываць прадукты харчавання праз аўталаўку раённага спажывецкага таварыства, гандляры нават прымаюць папярэднія заказы. Раз у месяц раённая бібліятэка пасылае ў вёску бібліобус, дзе ёсць магчымасць вяскоўцам узяць кнігу для чытання. Пяць дзён на тыдзень дастаўляюцца на аўто «Белпошты» карэспандэнцыя і пасылкі.
Раённыя ўлады разгледзелі запыт вяскоўцаў і вырашылі правесці рэканструкцыю электрычных сетак у Дварцы. Работы ідуць якасна і хуткімі тэмпамі. Ёсць першыя падключэнні. У верасні адновяць аўтобусны прыпынак. Рэгулярна дарожныя службы грэйдзіруюць дарогі да вёскі.
А свята, якое ладзілася «Шануйце бацькоў карані» працягвалася і вядучыя ўзгадвалі розныя падзеі з жыцця вёскі, знаходзілі цёплыя і добразычлівыя словы, каб распавесці аб лёсах тых, хто звязаў сваё жыццё з малой радзімай, не забывае карані свайго роду. Ветэрану працы, Анатолю Бабкову, які доўгі час працаваў на кіруючых пасадах у жывёлагадоўлі мясцовай гаспадаркі саўгаса «Гарадзячыцы», за актыўную жыццёвую пазіцыю, удзел у патрыятычных акцыях па ініцыятыве Любанскага райкама партыі ад імя ЦК КПБ уручана юбілейная медаль «80 гадоў вызвалення Беларусі ад нямецка-фашысцкіх захопнікаў». Годна жывем і працуем, годна адпачываем, шануем бацькоў карані — такія высновы чуліся ад удзельнікаў свята.
Мы жывем у Дварцы,
І ніколі аб гэтым не шкадуем.
Гэта спадчына наша,
Гэта наша святая зямля, — нагадвае нам Яўген Пясецкі.
Анатоль Вялічка, краязнаўца, член КПБ з 1970 г., шматгадовы пастаянны падпісчык газеты «Звязда».
Супрацоўнікі Мінпрыроды расказалі, якая карысць ад дрэў у горадзе.
Восень для спецыялістаў аграрнай галіны — час падводзіць вынікі, і сёлета яны годныя.
У поўным аб’ёме задаволена патрэба краіны ў калійных і каменных солях, торфе, сапрапелі, будаўнічым камені, падземных водах.
