Леанід Заяц выслухаў звароты грамадзян у Асіповічах

Афармленне спадчыны, просьба вярнуць адменены рэйс электрычкі, дапамагчы разабрацца ў пытаннях са спадчынай — гэтыя і іншыя пытанні сталі прадметам разгляду падчас прыёму грамадзян старшынёй Пастаяннай камісіі Савета Рэспублікі па рэгіянальнай палітыцы і мясцовым самакіраванні Леанідам Зайцам у Асіповічах.

Былы афганец з мноствам узнагарод на камуфляжы прыйшоў пахадайнічаць за сваіх таварышаў, якія прайшлі жах вайны ў гарачай кропцы. Ён сказаў, што наступствы гэтага не праходзяць дарэмна. Многія з тых, хто ваяваў, атрымалі раны і заўчасна пайшлі з жыцця. Мужчына просіць унесці ў законапраект «Аб змяненні законаў па пытаннях ветэранаў» некалькі дапаўненняў. У прыватнасці, каб у былых афганцаў была магчымасць выходзіць на пенсію датэрмінова — у 60 гадоў — і каб ветэранаў гэтай вайны далучылі да льготнай катэгорыі.

«З Афганістана выйшла 22 тысячы чалавек, цяпер, напэўна, засталося менш за палову, — сказаў заяўнік. — Мне 75 гадоў, і я спрабую прыносіць карысць грамадству. Як і мае таварышы». Леанід Заяц адзначыў, што пытанне аб льготах вельмі правільнае і ён яго падтрымлівае. «Моладзі трэба ў вас вучыцца, як служыць Радзіме», — сказаў сенатар.

Жыхарка райцэнтра паскардзілася на тое, што не выконваецца графік вывазу смецця. «На нашу пляцоўку зносяць адходы жыхары трох жылых дамоў, інтэрната і прыватнага сектара. Адным рэйсам гэта немагчыма вывезці, але камунальнікі заяўляюць, што ў іх то паліва няма, то з машынамі напружанне. У выніку смецце ўвесь час на пляцоўцы», — падзялілася праблемай жанчына. Яна таксама наракала на дарожку, якой карыстаюцца жыхары і якую падчас дажджоў залівае так, што па ёй не прайсці.

Леанід Заяц пацікавіўся ў дырэктара Асіповіцкага УКП ЖКГ Дзмітрыя Кулакоўскага, які прысутнічаў на прыёме, у чым праблема. Той заўважыў, што смецце назапашваецца з-за таго, што жыхары прыватнага сектара нелегальна карыстаюцца пляцоўкай. Сенатар параіў пагутарыць з людзьмі і адрэгуляваць пытанне.

Яшчэ ў адной жыхаркі Асіповіч узніклі пытанні з афармленнем спадчыны і прыватызацыяй кватэры на льготных умовах. У яе таксама прэтэнзіі да суседзяў, якія, па яе словах, заліваюць ёй участак. Пытанні ўзяты на кантроль і будуць адрэгуляваны, паабяцаў Леанід Заяц.

Адменены рэйс электрацягніка Мінск — Асіповічы стаў прычынай калектыўнага звароту жыхароў вёсак Верайцы, Верхі, Перарожкі, Дражня і Дубовае. Яны жадаюць, каб рэйс быў адноўлены. «У нашых вёсках жыве 454 чалавекі, — паведамілі яны. — Рэйс быў адменены па будніх днях з сакавіка 2022 года. І цяпер мы не можам выехаць са сваіх вёсак да самага вечара. А за таксі трэба плаціць 30 рублёў у абодва бакі».

Леанід Заяц заўважыў, што адсутнасць магчымасці даехаць, куды трэба, — гэта праблема. І варта зрабіць усё, каб людзі не былі пакрыўджаныя.

З Мінска на прыём да сенатара прыехаў малады чалавек, які набыў за вялікія грошы ўчастак у пасёлку Калядзічы. Пры продажы было заяўлена, што там ёсць усе камунікацыі, насамрэч нічога не было, і пакупнік усё рабіў за свой кошт. Калі падвёў электрычнасць да дома, высветлілася, што магутнасці, якой забяспечваюць мясцовыя РЭС, недастаткова. Мужчына звяртаўся і да энергетыкаў, і да мясцовай улады, але безвынікова. 

Маўляў, рэканструкцыя запланавана на 2037 год. І толькі пасля зваротаў у Савет Рэспублікі высветлілася, што для таго, каб вырашыць праблему, трэба замяніць усяго 100–150 метраў кабелю. Гэта дасць магчымасць павысіць магутнасць не толькі для аднаго чалавека, але і для ўсіх спажыўцоў электрычнасці па вуліцы Лазурнай. Жыхары згодны прыняць удзел у суфінансаванні праекта. Леанід Заяц паспачуваў маладому чалавеку і паабяцаў, што праблема будзе вырашана. Заяўнік прызнаўся, што дайсці да Савета Рэспублікі яму было прасцей, чым да мясцовай улады.

У членаў садаводчага таварыства «Крыніца-Крываполле», якія таксама прыехалі на прыём грамадзян з Мінска, быў цэлы шэраг прэтэнзій да кіраўніцтва таварыства. Яны паведамілі пра мноства парушэнняў фінансава-гаспадарчай дзейнасці, непрыняцці мер па ўцягванні ў зямельны абарот участкаў, якія не выкарыстоўваюцца доўгі час. Акрамя гэтага, у адрас заяўнікаў, якія спрабуюць разабрацца з праблемамі і звяртаюцца ў розныя інстанцыі, паступаюць пагрозы. Леанід Заяц паабяцаў разабрацца з пытаннем, у тым ліку пасадзейнічаць у арганізацыі праверкі фінансава-гаспадарчай дзейнасці таварыства. Ён перадаў заяўнікам сваю візітку і дазволіў тэлефанаваць наўпрост, калі будуць узнікаць складанасці пры вырашэнні праблем.

— У нас павінна быць кансалідацыя грамадства, не павінна быць ніякага разладу, — сказаў Леанід Заяц журналістам па заканчэнні прыёму грамадзян. — Калі ў чалавека праблема, ён звяртаецца ў органы дзяржкіравання, каб там дапамаглі яе вырашыць. Ці добра гэта, калі сусед падтапіў суседа і той пакрыўдзіўся? Значыць, трэба органам мясцовай улады пад’ехаць, памірыць гэтых грамадзян. Па-іншаму не павінна быць у нашай краіне. Або калектыўны зварот ад жыхароў вёсак, дзе жывуць 454 чалавекі і ў якіх з панядзелка да чацвярга праблема выехаць. Ці нельга было гэта пытанне вырашыць на месцы? Можна. Трэба мясцовым органам улады, у тым ліку сельсавету — гэта яго хлеб — выканкаму паглыбляцца ў гэтыя пытанні, каб яны наогул не мелі месца. А калі маюць працяг, трэба разабрацца, чаму. Усе пытанні павінны быць вырашаны, трэба падыходзіць да праблемы па-чалавечы. У чалавека праблема наспела не сёння, не ўчора, трэба яго чуць. Калі перад пад’ездам гара смецця, а ЖКГ не звяртае ўвагі — гэта няправільна. Мы жывём у сваёй краіне, павінны клапаціцца пра чалавека, каб у нас сапраўды было маналітнае грамадства, каб мы сваімі дзеяннямі не стваралі раздрай. Правільна кажа Прэзідэнт: трэба звяртаць увагу на кожную просьбу ці пытанне нашых людзей, таму што за гэтым пытаннем стаяць, магчыма, праблемы ўсёй вуліцы.

Вось прыйшоў чалавек з просьбай замяніць 100 метраў кабелю, а на той вуліцы яшчэ дзевяць дамоў, дзе, не выключана, жывуць пенсіянеры, людзі, якія працавалі на карысць краіны. Трэба здымаць гэтыя пытанні, трэба іх вырашаць.

Нэлі ЗІГУЛЯ 

Фота аўтара