Качанава: МАЗ — гэта брэнд, ён умацоўвае эканоміку нашай краіны

МАЗ — гэта брэнд, ён умацоўвае эканоміку нашай краіны, заявіла старшыня Савета Рэспублікі Наталля Качанава ў час урачыстага сходу і святочнага канцэрта, прысвечанага 80-годдзю МАЗа, перадае БелТА.

«Ад Савета Рэспублікі і сябе асабіста я шчыра віншую ўвесь шматлікі калектыў з гэтым цудоўным юбілеем. І не толькі калектыў — думаю, мы ўсе па праве ганарымся гэтай юбілейнай датай, уся краіна. Правільна было сказана Прэзідэнтам, што гэта адзін з флагманаў машынабудавання Беларусі. І, па сутнасці, гэта брэнд нашай краіны, таму што калі мы гаворым «МАЗ», то разумеем, што гэта Рэспубліка Беларусь, — сказала Наталля Качанава.- Думаю, што ў жыцці завода ёсць дзве асноўныя даты. Першая — гэта дзень, калі быў дадзены старт будаўніцтву новага машынабудаўнічага прадпрыемства, і (пачатак існавання. — Заўв. БелТА) інстытута прэзідэнцтва, калі было прынята мудрае рашэнне захаваць прадпрыемствы дзяржаўнай уласнасці. І сёння мы бачым, які вынік. Сёння ўсе нашы прадпрыемствы працуюць эфектыўна, іх прадукцыя запатрабавана».

Спікер выказала словы ўдзячнасці і падзякі працоўнаму калектыву прадпрыемства за вельмі няпростую і нялёгкую працу. «Вы ўмацоўваеце эканоміку нашай краіны, сваёй працай вы штодзень уносіце ўклад у развіццё Беларусі, — адзначыла старшыня Савета Рэспублікі. — Асаблівыя словы падзякі — ветэранам, якія стаялі ля вытокаў станаўлення МАЗа і кожны год перадавалі добрыя традыцыі маладому пакаленню. Дзякуй вялікі. Я ведаю, як людзі, якія працавалі і працуюць тут, ганарацца сваім прадпрыемствам. І, вядома, для ўсіх нас вялікі гонар, што тут ёсць працоўныя дынастыі. Бо калі прыходзіць працаваць моладзь, у якіх бацькі працавалі на гэтым жа заводзе, гэта гаворыць аб тым, што ў МАЗа ёсць будучыня, гэта месца, дзе ганарацца сваёй гісторыяй. Я хачу, каб вы рэалізавалі ўсе задачы, якія стаяць перад вамі. Сёння вядзецца будаўніцтва новага завода па выпуску аўтобусаў, і я спадзяюся, што ва ўстаноўленыя тэрміны з’явіцца новая вытворчасць, якая дасць магчымасць нарасціць магутнасці яшчэ больш».

«Нашаму МАЗу я жадаю толькі працвітання, новых ідэй, крэатыўных рашэнняў, якія будуць накіраваны на захаванне добрых традыцый і памнажэнне дасягненняў, якія ёсць у прадпрыемства. Калектыву — заставацца такімі ж магутнымі, моцнымі, сапраўднымі. А кожнаму з вас, кожнаму члену працоўнага калектыву і вашым сем’ям жадаю дабрабыту, здароўя, міру і дабра. — дапоўніла Наталля Качанава.

Сёння да 23.00 на пляцоўцы каля ДК «МАЗ» будзе працаваць выстава прадукцыі Мінскага аўтазавода. Для гасцей свята арганізавана работа выязнога гандлю і зоны фуд-корта. У канцэртнай праграме прымуць удзел калектывы мастацкай самадзейнасці, артысты беларускай і расійскай эстрады.