Памер бюджэту пражытачнага мінімуму павялічыцца з 1 жніўня

01.08.2024 09:25
Эканоміка

У Беларусі з 1 жніўня 2024 года павялічыцца памер бюджэту пражытачнага мінімуму. Новы памер БПМ будзе дзейнічаць да 31 кастрычніка 2024 года, паведамляе БелТА.

Фота БелТА

БПМ сярэднім на душу насельніцтва ў параўнанні з яго значэннем, устаноўленым з 1 мая 2024 года, павялічыцца на 3,4 працэнта і складзе Br433.

Па асноўных сацыяльна-дэмаграфічных групах насельніцтва ўстаноўлены наступныя нарматывы БПМ: насельніцтва, якое працуе, - 462,26 рублёў; пенсіянеры - Br314,13; дзеці да трох гадоў - Br273,78; дзеці ад трох да шасці гадоў - Br365,55; дзеці ад шасці да васямнаццаці гадоў - 428,23 рубля.

У сувязі са змяненнем БПМ аўтаматычна пераглядаюцца розныя надбаўкі і дапамогі, закладзеныя ў сістэму сацыяльнай абароны, а таксама індывідуальныя сацыяльныя выплаты, якія разлічваюцца зыходзячы з памеру БПМ. Так, пераглядаюцца памеры дзяржаўнай дапамогі сем'ям, якія выхоўваюць дзяцей, даплат да пенсій, дапамог па догляду інваліда 1-й групы або асобы, якая дасягнула 80-гадовага ўзросту, сацыяльных пенсій.