Бяспечнае баўленне часу каля вадаёма прыводзіць да трагічнага выніку

У летнія спякотныя дні прахалода возера або рэчкі так і вабіць да сябе. Аднак нярэдка няўважлівае і занадта бяспечнае баўленне часу каля вадаёма прыводзіць да трагічнага выніку. З пачатку купальнага сезона ў Беларусі патанулі 115 чалавек, сярод якіх 14 дзяцей. Каб яшчэ раз нагадаць моладзі пра неабходнасць весці бяспечны лад жыцця, была арганізавана Рэспубліканская акцыя «Адзін дзень з ТРВОД».

Прыцягненне ўвагі да працаўладкавання ў Таварыства ратавання на водах у разгар купальнага сезона і папулярызацыя бяспечных паводзін на вадаёмах — тыя задачы, якія паставіла перад сабой акцыя, арганізаваная БРСМ сумесна з ТРВОД. Яе сутнасць у тым, што моладзь патрулюе берагі вадаёмаў, месцы масавага адпачынку, а таксама хлопцы і дзяўчаты сустракаюцца з насельніцтвам і нагадваюць ім, што з вадой трэба быць вельмі ўважлівым, і расказваюць, наколькі важна не толькі ведаць, але і выконваць усе правілы бяспекі. 

У абавязкі юных ратавальнікаў уваходзіць і правядзенне сумесна з супрацоўнікамі МНС, ТРВОДа і РАУС інфармацыйна-вытлумачальнай работы наконт купання ў забароненых месцах. Таму што гэта не толькі небяспечна для жыцця, але і з’яўляецца правапарушэннем, за якое неабходна будзе несці адміністрацыйную адказнасць.

Падобныя акцыі ўжо не першы раз праходзяць на тэрыторыі нашай краіны, падкрэсліў сакратар ЦК БРСМ Павел Алекса: «Сталі традыцыйнымі летні і зімовы патрулі. У рамках летняга ў нас праходзіць „Адзін дзень з ТРВОД“. Падчас акцыі маладыя людзі з самай раніцы і да вечара ўдзельнічаюць у рабоце выратавальнай станцыі, знаёмяцца з абсталяваннем і спосабамі яго выкарыстання, бачаць побыт ратавальнікаў. Удзельнікі задзейнічаны таксама ў майстар-класах і трэнінгах». Суразмоўнік падкрэслівае, што падчас правядзення падобных акцый вельмі важна, каб удзельнікі не толькі атрымалі ўласны вопыт, але і пасля прыходзілі ў свае школы і калектывы, у класы і на прадпрыемствы і дзяліліся, наколькі важна выконваць гэтыя правілы.

Пачалося мерапрыемства з агульнага збору моладзі і невялікай азнаямленчай экскурсіі па аб’ектах на тэрыторыі ратавальнай станцыі «Камсамольскае возера». Важнай падзеяй стала ўстаноўка інтэрактыўнай інфармацыйнай таблічкі са спецыяльным QR-кодам.

— Адкрыўшы сезон, мы размясцілі памятную таблічку «Лічбавая зорка», прысвечаную Камсамольскаму возеру і ўкладу камсамольцаў розных пакаленняў ва ўмацаванне сваёй краіны. Вельмі сімвалічна, што сёння, у год 80-годдзя вызвалення Беларусі ад нямецка-фашысцкіх захопнікаў, на гэтым возеры мы далі старт чарговай акцыі, бо менавіта гэтае возера хацелі адкрыць у 41-м годзе мінулага стагоддзя 22 чэрвеня, — адзначыў першы сакратар ЦК БРСМ Аляксандр Лук’янаў.

Пасля ўдзельнікаў чакала самая яркая частка акцыі — правядзенне практычных заняткаў: выхад катара па трывозе, кіданне выратавальнага круга — ліня, навучанне аказваць першую дапамогу і праводзіць сардэчна-лёгачную рэанімацыю, апусканне вадалаза. Юных ратавальнікаў напрыканцы таксама чакаў выхад у патруляванне сумесна з супрацоўнікамі МНС і МУС.

Акцыя ахоплівае ўсю краіну. І, як расказала прадстаўнік ТРВОД Рэспублікі Беларусь Кацярына Міхалёва, ужо да заканчэння купальнага сезона будуць ахоплены ўсе вобласці і ўсе буйныя выратавальныя аб’екты, якіх у нас па краіне 68: «У планах запрасіць падлеткаў ад 12 да 17 гадоў, каб яны змаглі пазнаёміцца бліжэй з дзейнасцю ТРВОД і ў выпадку якога-небудзь здарэння змаглі аказаць першую дапамогу. Старт акцыі таксама прайшоў у Гродзенскай вобласці. Пра зацікаўленасць маладых людзей у бяспецы на вадзе актыўна кажуць лічбы. У дзень па 10-15 чалавек патрулююць на станцыях, сумарна ў сезон каля 15 тысяч маладых людзей па ўсёй краіне ўключаюцца ў гэтую дзейнасць».

Акцыя ў Беларусі працягнецца да 30 верасня.

Анжаліка СЦЕФАНОВІЧ