У апошнія дні чэрвеня будзе на 4—7 градусаў гарачэй за норму

У нашых шыротах тэмпературныя максімумы ў апошнія гады назіраліся ў ліпені і ў жніўні. Сёлета тэмпература вышэй за 30 градусаў «стрэліла» ўжо ў першым месяцы лета, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

Беларусаў чакае сапраўдная спёка. Тэмпературны фон будзе значна перавышаць кліматычную норму, а ачаг высокага ціску працягне ўтрымліваць у большасці раёнаў краіны сухое надвор’е. Мінімальныя значэнні тэмпературы ноччу складуць 13–20 градусаў, а вось з усходам сонца паветра пачне інтэнсіўна прагравацца, і на сярэдзіну дня напал тэмператур дасягне плюс 26–33 градусы.

Дарэчы, да дзённай спякоты мы больш-менш прывыклі, чаго не скажаш пра душныя ночы з тэмпературай 20 градусаў і вышэй. Такі час сіноптыкі акрэслілі як «трапічныя ночы». Такім чынам, у пятніцу будзе пераважна без ападкаў. Тэмпература паветра ўначы складзе 14–20 градусаў, удзень — плюс 27–32 цяпла. Мабыць, самыя гарачыя суткі чэрвеня чакаюцца ў суботу. У гэты час ноччу будзе пераважна без ападкаў, а раніцай і днём месцамі па краіне пройдуць кароткачасовыя дажджы і навальніцы. Уначы і раніцай у асобных раёнах чакаецца слабы туман. Тэмпература паветра ўначы складзе 14–21 цяпла, удзень — плюс 26–33 градусы. У нядзелю будзе пераважна без ападкаў.

Уначы і раніцай у асобных раёнах чакаецца слабы туман. Тэмпература паветра ўначы складзе 13–20 градусаў, удзень — плюс 26–33 градусы.

З высокіх паказчыкаў пачнецца і другі месяц лета. Ліпеньскае сонца працягне бязлітасна паліць і ў панядзелак, нягледзячы на чаканыя дажджы. У разгар дня ў большасці раёнаў паветра распаліцца аж да 34 градусаў, толькі па паўднёвым захадзе будзе не вышэй чым 25–27 цяпла. У панядзелак, у першы дзень ліпеня, ноччу месцамі па захадзе, днём на большай частцы тэрыторыі краіны пройдуць кароткачасовыя дажджы. У асобных раёнах магчымы навальніцы. Ноччу і раніцай месцамі чакаецца слабы туман. Тэмпература паветра ўначы яшчэ павысіцца і складзе 15–22 градусы. Днём спякота ўдарыць па тэрмометры да 28–34 градусаў, па паўднёвым захадзе — 25–27 цяпла.

Паводле папярэдняга прагнозу айчынных сіноптыкаў, дыхаць стане лягчэй у аўторак, калі дзённая тэмпература паветра панізіцца да адносна камфортных значэнняў, толькі ва ўсходніх раёнах максімальныя тэмпературы па-ранейшаму будуць перавышаць 30-градусныя адзнакі. На большай частцы тэрыторыі краіны пройдуць кароткачасовыя дажджы. У асобных раёнах магчымы навальніцы. Ноччу і раніцай месцамі чакаецца слабы туман. Тэмпература паветра ўначы складзе 13–20 градусаў цяпла, удзень — ад плюс 20 на захадзе да плюс 32 на ўсходзе.

У сераду ўсталюецца цудоўнае надвор’е. Месцамі па краіне пройдуць кароткачасовыя дажджы. У асобных раёнах магчымы навальніцы. Ноччу і раніцай месцамі чакаецца слабы туман. Тэмпература паветра ўначы складзе 12–19 градусаў. Днём будзе 20–27 градусаў, па ўсходзе — да 29 цяпла.

У такія гарачыя дні варта памятаць асноўныя правілы паводзін у спякоту: старацца не знаходзіцца на вуліцы ў гадзіны максімальнай сонечнай актыўнасці. Калі выйсці ўсё ж такі трэба, не забываць пра галаўны ўбор, а на вуліцы лепш трымацца ў цені і абавязкова выконваць пітны рэжым. «Улетку, калі на вуліцы горача і душна, хочацца адправіцца да вадаёмаў. Тым больш што тэмпература вады ў рэках і вадаёмах нашай краіны складае ад 20 да 24 градусаў. Адпраўляючыся на адпачынак, будзьце вельмі ўважлівыя і асцярожныя», — адзначылі ў Белгідрамеце.

Сяргей КУРКАЧ