Вы тут

На Лагойшчыне прайшоў форум маладых паэтаў Міншчыны


«Люблю свой кут, яго заву Айчынай,

Цяпло калыскі ў матчыных руках,

І герб, пад стужкай льну і канюшыны,

І збажыну, што вецер песціць у палях».

Гэта радкі з верша дванаццацігадовага Арсенія Караніха, вучня Новапалескай сярэдняй школы Салігорскага раёна, які стаў пераможцам конкурса «Слова Купалы да творчасці кліча». Пра любоў да радзімы напісала эсэ і пераможца ў намінацыі прозы шаснаццацігадовая Маргарыта Палубінская з Барысава. 


Вось ужо ў дванаццаты раз адбыўся гэты конкурс і форум маладых паэтаў Міншчыны, які арганізуюць Мінская абласная бібліятэка імя А. С. Пушкіна, галоўнае ўпраўленне культуры Мінскага аблвыканкама, Лагойская раённая цэнтральная бібліятэка і аддзел ідэалагічнай работы, культуры і па справах моладзі Лагойскага выканкама. Лагойшчына ўдзельнічае ў правядзенні гэтых паэтычных форумаў невыпадкова: бо свята абавязкова адбываецца і ў ў філіяле Дзяржаўнага літаратурнага музея Янкі Купалы «Акопы». Актыўна ўдзельнічае заўсёды ў правядзенні форума Саюз пісьменнікаў Беларусі.

Для маладых паэтаў форум — не толькі ўрачыстая цырымонія з магчымасцю пачытаць свае вершы са сцэны, але яшчэ і семінар, дзе з маладымі займаюцца вядомыя літаратары, сябры журы. Адзін з іх — вядомы паэт, намеснік дырэктара выдавецтва «Мастацкая літаратура» — галоўны рэдактар часопіса «Полымя» Віктар Шніп.

— З дванаццаці семінараў я не быў, здаецца, толькі на трох, — распавядае Віктар Анатольевіч. — У сёлетнім конкурсе ўдзельнічала больш за сто чалавек узростам ад дванаццаці да дваццаці гадоў. З іх выбралі трыццаць лепшых. На жаль, выпускнікі школ з-за апошніх званкоў не змаглі прыехаць, але іх творы гучалі са сцэны Лагойскага раённага цэнтра культуры ў заключнай частцы семінара, якім кіравалі Рагнед Малахоўскі, Ірына Карнавухава, Галіна Варонава і я. Цікава, што Рагнед Малахоўскі дваццаць гадоў таму ўпершыню ўдзельнічаў у гэтым семінары як малады паэт. Мне было прыемна сустрэцца з зямлячкай Наталляй Жылевіч, якая ў Валожыне кіруе народным літаратурна-мастацкім аб’яднаннем «Рунь» і якая прывезла двух школьнікаў з Валожыншчыны, што трапілі ў трыццатку лепшых. Гэта Дзмітрый Андрэеў і Іван Сяўрук. Адзін ходзіць у сёмы клас, а другі ў восьмы. Уручаючы дыпломы, я падырыў землякам сваю кніжку «Заўтра была адліга», выдадзеную ў Выдавецкім доме «Звязда». 

Свята пачалося ў Акопах, дзе ўдзельнікі ўсклалі кветкі да помніка Янку Купалу, потым наведалі экспазіцыю філіяла, дзе пазнавальную экскурсію правяла супрацоўнік Дзяржаўнага літаратурнага музея Янкі Купалы Галіна Воранава. Семінарскія заняткі па секцыях адбыліся ў Лагойскім раённым цэнтры культуры. 

«Аднойчы, пачытаўшы пачатак паэмы Янкі Купалы „Безназоўнае“, я раптам нечакана пераасэнсавала гэтыя радкі адносна сябе, адчуўшы, што яны — пра мяне, пра маю сардэчную любоў да Радзімы:

Спачатку яно шалясцела

Вельмі нясмела,

А потым лізнула аконца

Ціха, як сонца,

Назаўтра ўзняло галасочак,

Нібы званочак,

Ды ў час празвінела так далей

Збуджанай хваляй.

Безназоўнае набыло назву: Радзіма. Скарб, Купала. Нявыказанае стала відавочным. Незразумелае стала зразумелым і блізкім. Я люблю цябе, мая Радзіма».

Так заканчвае сваё эсэ пераможца конкурса Маргарыта Палубінская, і, напэўна, гэтыя ж эмоцыі падзяляюць усе, хто пабываў на форуме «Слова Купалы да творасці кліча».

Людміла ІВАНОВА

Фота аўтара

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.