Вы тут

Палегчыць боль, вырашыць сацыяльныя і побытавыя пытанні — задача службы міласэрнасці


Людзі, якія апынуліся ў цяжкай жыццёвай сітуацыі, шчыра дзякуюць медсёстрам, малодшым сёстрам міласэрнасці, валанцёрам Беларускага Чырвонага Крыжа. Актывістаў служэння ўшанавалі ў Гомелі. Урачыстае мерапрыемства ў гонар шасцідзесяцігадовага юбілею медыка-сацыяльнай службы Чырвонага Крыжа «Дапамога» прайшло ў Гомельскім палацава-паркавым ансамблі.


Сёння ў камандзе «Дапамогі» на Гомельшчыне — 41 сястра міласэрнасці. Яны забяспечваюць медыка-сацыяльнае суправаджэнне 122 жыхароў вобласці.

За кожнай лічбай — лёс чалавека і неацэнная работа. Так, людзі, якім патрабуецца асаблівы догляд, своечасова яго атрымліваюць. Гэта вельмі складаная дзейнасць. Каласальную працу выконваюць медсёстры па доглядзе цяжкіх хворых у стадыі ВІЧ/СНІД. Мы будзем і надалей развіваць сваю дзейнасць і аказваць дапамогу менавіта там, дзе яна асабліва патрэбна, — на цырымоніі ўшанавання адзначыла намеснік старшыні Гомельскай абласной арганізацыі Беларускага Чырвонага Крыжа Алеся Касцюк.

Словы ўдзячнасці за служэнне супрацоўнікам медыка-сацыяльнай службы «Дапамога» выказаў і старшыня камітэта ідэалагічнай работы і па справах моладзі Гомельскага аблвыканкама Дзяніс Язерскі.

— Службу «Дапамога» можна лічыць брэндам Беларускага Чырвонага Крыжа. Пра гэты рух, яго гісторыю і развіццё неабходна больш расказваць. Гэта тыя прыклады міласэрнасці, на якіх неабходна выхоўваць моладзь. У Беларускага Чырвонага Крыжа самая шчырая, чыстая і высакародная філасофія, блізкая нашаму народу, — падкрэсліў Дзяніс Язерскі.

У Гомельскай абласной арганізацыі БЧК з 2018 года рэалізоўваецца праект у рамках выканання дзяржаўнай сацыяльнай замовы Галоўнага ўпраўлення аховы здароўя Гомельскага аблвыканкама ў галіне прафілактыкі ВІЧ-інфекцыі. Сёстры міласэрнасці аказваюць паліятыўную надомную дапамогу ляжачым хворым з ВІЧ. Дзякуючы такой падтрымцы не толькі забяспечваецца медыцынскі догляд, але і вырашаецца шмат сацыяльных пытанняў, з якімі доўгі час хворыя, асабліва адзінокія людзі, не могуць разабрацца самастойна. На Гомельшчыне ў Светлагорску з 2010 года працуе ўнікальная для краіны мультыдысцыплінарная каманда па аказанні паліятыўнай дапамогі ў хатніх умовах ВІЧ-інфіцыраваным. Падапечныя ў райцэнтры атрымліваюць комплексную дапамогу ад псіхолагаў, медыцынскіх сясцёр, малодшых сясцёр міласэрнасці, валанцёраў.

Акрамя таго, у вобласці медыка-сацыяльная і паліятыўная надомная дапамога асобам з ВІЧ аказваецца ў Гомелі, Рэчыцы, Жлобіне. Адна з тых, хто даглядае хворых, якія знаходзяцца на позніх стадыях ВІЧ-інфекцыі, — медыцынская сястра Чыгуначнай раённай арганізацыі БЧК Гомеля Лілія Хаджыева. Лілія Уладзіміраўна ў службе «Дапамога» — шосты год. Па дзяржсацзаказе забяспечвае догляд чатырох падапечных з чацвёртай клінічнай стадыяй ВІЧ-інфекцыі. Акрамя таго, па другім дзяржзаказе аказвае дапамогу таксама чатыром падапечным з першай групай інваліднасці.

— Вядома, гэта цяжкая работа, яе трэба любіць, бо калі не спачуваеш людзям, то вытрымаць немагчыма, — падзялілася Лілія Хаджыева. — Мы імкнёмся палегчыць фізічны стан чалавека, аказваем медыцынскія і індывідуальныя сацыяльныя паслугі. Часцей за ўсё нашы падапечныя — людзі, якія страцілі цалкам або часткова здольнасць самастойна клапаціцца пра сябе, маюць патрэбу па стане здароўя ў старонняй дапамозе. Калі казаць пра догляд падапечных з ВІЧ-інфіцыяй, то для іх атрымліваем тэрапію, абавязкова кантралюем яе прыём. Недапушчальны пропуск у лячэнні нават на адзін дзень, бо ўрачу давядзецца цалкам мяняць схему. Вельмі важна, што абавязкова наладжана супрацоўніцтва з інфекцыяністамі, тэрапеўтамі. Для ўсіх падапечных абавязкова забяспечваецца належны догляд у плане гігіены, для ляжачых хворых — прафілактыка пролежняў.

Сярод падапечных Ліліі Уладзіміраўны — як тыя, хто ўвогуле адзінокі, так і тыя, у каго ёсць блізкія.

— Вельмі важна ўсталяваць кантакт і з роднымі, быць чулым псіхолагам, — дадае медсястра. — У служэнні такім важна і разуменне з боку ўласнай сям’і. У мяне двое дарослых сыноў, дзве ўнучкі. Яны мяне падтрымліваюць у імкненні дапамагаць людзям.

Сярод супрацоўнікаў медыка-сацыяльнай службы Чырвонага Крыжа «Дапамога», ушанаваных на Гомельшчыне, — медыцынская сястра, чалавек з вялізным сэрцам і адкрытай душой Таццяна Змушко. Таццяна Уладзіміраўна амаль год у камандзе Цэнтральнай раённай арганізацыі БЧК Гомеля.

— Усё жыццё прапрацавала медыцынскай сястрой у бальніцы ў асноўным з сутачнымі дзяжурствамі. Ужо па ўзросце стала шукаць работу з дзённым графікам.

Вырашыла звярнуцца ў нашу раённую арганізацыю Чырвонага Крыжа, і вельмі рада, што мая кваліфікацыя спатрэбілася, — падзялілася сваёй гісторыяй служэння ў «Дапамозе» Чырвонага Крыжа Таццяна Змушко. — Па дзярсацзаказе цяпер аказваю дапамогу і догляд чатыром людзям. Мае падапечныя — пажылыя людзі з першай групай інваліднасці, якім неабходны догляд побытавы і медыцынскі. Прызнацца, мае бабулі проста казачныя. Самай старэйшай — 97 гадоў. Усе, нягледзячы на цяжкі стан здароўя, яшчэ і мяне зараджаюць жыццёвай энергіяй. Не чакала, што такое служэнне цалкам зменіць маё жыццё. І гэта дзякуючы не толькі падапечным, але і вельмі добрым калегам, валанцёрам, якія працуюць з намі. Натхняе адчуванне, што ты патрэбы людзям.

Наталля КАПРЫЛЕНКА

Фота Гомельскай абласной арганізацыі БЧК

Загаловак у газеце: Спяшаюцца на дапамогу

Выбар рэдакцыі

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.