Вы тут

У Мастах пройдзе фестываль паэзіі


«Масты сугучнасці» — такую назву носіць Рэспубліканскі фестываль паэзіі, правядзенне якога прымеркавана ў Мастах, на Гродзеншчыне, 17 мая. Арганізатары — Саюз пісьменнікаў Беларусі, Мастоўскі раённы выканаўчы камітэт, Мастоўская раённая бібліятэка і Гудзевіцкі дзяржаўны літаратурна-краязнаўчы музей. 


Фота з адкрытых крыніц

Падзею анансіруе старшыня Гродзенскага абласнога аддзялення Саюза пісьменнікаў Беларусі вядомая ў нашай краіне пісьменніца Людміла Кебіч

— Мы рады, што атрымалася такое вось супольніцтва мастоўскіх уладаў, мастоўскіх бібліятэкараў і літаратараў Гродзеншўчыны, усёй краіны. Сёння часта даводзіцца чуць, што паэзіі час мінуў, яна не карыстаецца той грамадскай вагой, як некалі. Маўляў, і стадыёны ўжо не збіраюцца, каб паслухаць палымянае выступленне паэта... Не буду спрачацца. За мастакоў слова павінны спрачацца іх творы. І вось зараз праява такой увагі, згода правесці выключна паэтычны фестываль уражвае. Удзел, між іншым, у фестывалі, які праводзіцца ў раённым цэнтры, не так і блізка ад Мінска, прымаюць прадстаўнікі ўсіх абласцей краіны. 

Дарэчы, пляцоўкамі правядзення свята паэзіі будуць розныя адрасы — і ў Мастах і ў Гудзевічах. А дакладней — Мастоўскі раённы цэнтр творчасці дзяцей і моладзі, СШ N 2 г. Масты імя Героя Савецкага Саюза В. П. Жукава, Гудзевіцкі дзяржаўны літаратурна-краязнаўчы музей, Гудзевіцкі цэнтр вольнага часу і культуры, Гудзевіцкая сельская бібліятэка. У Мастоўскай раённай бібліятэцы будзе разгорнута кніжная выстаўка «Паэзія. Творцы. Час». На розных пляцоўках пройдуць творчыя сустрэчы паэтаў з чытачамі — «Паэзія свет надзяляе душой», «Верш — гэта мост ад сэрца людскога да мары», «Зорны вяночак беларускай паэзіі». 

У Мастоўскай раённай бібліятэцы пройдзе круглы стол «Паэзія на ўсе часы: творы і творцы». З дакладам «Тэма Вялікай Айчыннай вайны ў творчасці сучасных паэтаў Гродзеншчыны» выступіць старшыня Гродзенскага абласнога аддзялення СПБ Людміла Кебіч. Паэт, публіцыст, літаратурны крытык Дзмітрый Радзівончык выступіць з аглядам зборніка лірыкі «Спрадвечны бераг», куды ўвайшлі вершы Міхася Васілька, Юркі Голуба, Мар’яна Дуксы. Кандыдат філалагічных навук Аліна Сабуць пазнаёміць прысутных з тэмай «Сваё як фактар нацыянальнай самасці ў творчасці сучасных паэтаў Гродзеншчыны». Удзел у круглым стале прымуць старшыня Брэсцкага абласнога аддзялення СПБ Таццяна Дзмідовіч, старшыня Гомельскага абласнога аддзялення СПБ, дэпутат Палаты прадстаўнікоў Нацыянальнага сходу Рэспублікі Беларусь Уладзімір Гаўрыловіч, паэтэса Валянціна Драбышэўская, старшыня Магілёўскага абласнога аддзялення СПБ паэт Алесь Казека, кандыдат філалагічных навук, літаратурны крытык Алена Кісель і іншыя пісьменнікі і літаратуразнаўцы. 

Сяргей ШЫЧКО

Выбар рэдакцыі

Культура

Чым сёлета будзе адметны фестываль песні і паэзіі ў Маладзечне?

Чым сёлета будзе адметны фестываль песні і паэзіі ў Маладзечне?

Арганізатары і ўдзельнікі свята запэўніваюць — знайсці сабе адпачынак па душы зможа кожны.

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў. 

Грамадства

Ірына Даўгала: Сям’я для беларусаў застаецца найвышэйшай каштоўнасцю

Ірына Даўгала: Сям’я для беларусаў застаецца найвышэйшай каштоўнасцю

«Сям’я закладвае ў чалавеку мараль, здольнасць спраўляцца з выпрабаваннямі, патэнцыял для развіцця, яна навучае любові, самаахвярнасці, культуры».