Вы тут

Лукашэнка адзначыў поспехі ЕАЭС, але ўказаў і на недапрацоўкі


Прэзідэнт Беларусі Аляксандр Лукашэнка на пасяджэнні Вышэйшага Еўразійскага эканамічнага савета ў Маскве адзначыў поспехі ЕАЭС за мінулыя 10 гадоў, але ўказаў і на пытанні па розных напрамках, над вырашэннем якіх бакам яшчэ неабходна працаваць, перадае БелТА.


Фота: БелТА

«Нават па самым строгім рахунку можна канстатаваць, што першыя 10 гадоў пройдзены даволі паспяхова. Мы практычна выйшлі на фінальны этап рэалізацыі Стратэгіі-2025», — заявіў кіраўнік дзяржавы.

Прынятыя меры аб’ектыўна спрыялі павелічэнню ўзаемнага гандлю дзяржаў-членаў ЕАЭС. Па выніках 2023 года тэмп яе росту склаў амаль 105%. У абсалютных лічбах — каля $ 90 млрд. І гэта нягледзячы на складаную сітуацыю на сусветных рынках.

«Але галоўнае, мы навучыліся лепш чуць адзін аднаго. Ні рост ВУП, ні павелічэнне рэальных даходаў насельніцтва не былі б магчымыя, калі б мы былі паасобку. Ды і не ўсім у адзіночку ўдалося б захаваць свой суверэнітэт. Зроблена, безумоўна, многае, — сказаў Аляксандр Лукашэнка. — Наш саюз яшчэ досыць малады, але ў яго развіццё ўжо ўкладзена вельмі шмат сіл, энергіі і сродкаў. Мы ў адказе за тое, каб ён і далей развіваўся на карысць нашых народаў і на справе стаў бы сапраўдным полюсам эканамічнага прыцягнення ў сучасным свеце. Я абсалютна перакананы, гэта нам па сілах».

Разам з тым Прэзідэнт канстатаваў, што пытанняў і выклікаў у інтэграцыйным будаўніцтве менш не стала, і прывёў некалькі красамоўных прыкладаў.

Аб прамысловай кааперацыі

Кіраўнік дзяржавы нагадаў, што летась прыняты фундаментальныя рашэнні ў мэтах фінансавай падтрымкі прамысловай кааперацыі. Аднак сур’ёзнай актыўнасці бізнесу пакуль не назіраецца. «Пры гэтым хацелася б яшчэ раз адзначыць, што праца ва ўмовах санкцыйнага ціску патрабуе неадкладных рашэнняў. Хуткія рашэнні. Лідары краін-удзельніц такія рашэнні ў большасці сваёй аператыўна прымаюць. Аднак яны далёка не заўсёды хутка рэалізуюцца, — заўважыў беларускі лідар. — Хацеў бы звярнуць увагу ўсіх прысутных, што такая няспрытнасць рэальна адбіваецца на фінансавых выніках працы нашых прадпрыемстваў і вядзе да ўзмацнення жорсткасці канкурэнцыі з боку трэціх краін».

З улікам укаранення новага механізму фінансавай падтрымкі прамысловай кааперацыі Аляксандр Лукашэнка звярнуўся да Еўразійскай эканамічнай камісіі з просьбай ініцыятыўна ўключыцца ў гэту работу і арганізаваць узаемадзеянне як у разрэзе галін, так і з прыцягненнем дзелавых асацыяцый і аб’яднанняў дзяржаў — членаў саюза.

Аб бесперашкодным доступе да дзяржзакупак

Па дадзеных Прэзідэнта, аб’ём дзяржзакупак у краінах ЕАЭС складае амаль $200 млрд. Фактычна дзяржавы як пакупнікі тавараў, работ, паслуг цалкам кіруюць гэтым рынкам, а таксама вызначаюць палітыку закупак і каналы набыцця.

«Калі мы сапраўды кіруем, то давайце забяспечваць узаемны доступ прынамсі там, дзе прадукцыя, якая вырабляецца ў ЕАЭС, можа стаць эфектыўнай крыніцай задавальнення дзяржаўных патрэбаў», — заклікаў Аляксандр Лукашэнка.

Разам з тым ён канстатаваў, што ў гэтай сферы ўсё яшчэ захоўваецца нацыянальны пратэкцыянізм: у рэальнасці рынак абараняецца не ад імпарту з трэціх краін, на якія прыпадае амаль дзве трэці дзяржзакупак ЕАЭС, а ад тавараў і паслуг, вырабленых у краінах саюза. «Гэта значыць абараняем кожны свой рынак ад сваіх партнёраў», — заўважыў Прэзідэнт.

«Перакананы, пытанне аб пашырэнні ўзаемнага ўдзелу ў дзяржзакупках патрабуе неадкладнага рашэння. Таму што ён цесна звязаны з імпартазамяшчэннем і тэхналагічным суверэнітэтам. І па вялікім рахунку гэта наша бяспека і гэта наша незалежнасць», — упэўнены кіраўнік дзяржавы.

Аб цыфравізацыі

Аляксандр Лукашэнка заявіў аб неабходнасці сканцэнтравацца на больш хуткім прызнанні электроннага лічбавага подпісу: «Гаворым аб гэтым ужо не першы год. Усе прынцыповыя дамоўленасці даўно дасягнуты, але воз і цяпер там. А гэта ж не палітычнае, а тэхнічнае пытанне. Але менавіта яно часта становіцца непераадольным. бар’ерам для ўдзелу еўразійскага бізнесу ў гаспадарчых працэсах краін саюза».

Прэзідэнт лічыць неабходным завяршыць гэту работу ў найбліжэйшы час.

Аб тэхнічным рэгуляванні

Гэты кірунак цесна звязаны з папярэднім пытаннем. «Работа па тэхнічным рашэнні на завяршальнай стадыі. Засталося толькі перавесці тэхрэгуляванне ў лічбавы фармат, — заўважыў Аляксандр Лукашэнка. — Упэўнены, у гэтай зале нікога не трэба пераконваць, што цыфравізацыя тэхрэгулявання прадаставіць нашай прамысловасці дадатковыя магчымасці для развіцця. Спросціць атрыманне інфармацыі і працэсы сертыфікацыі і стандартызацыі».

Аб транспартных паслугах

Аляксандр Лукашэнка адзначыў у цэлым зладжаную працу ў гэтай сферы як на нацыянальным, так і наднацыянальным узроўні: «Нам удалося знайсці рашэнні па альтэрнатыўных маршрутах паставак тавараў, дамовіцца (няхай і часова) аб ажыццяўленні перачэпкі і перагрузкі, узгадніць новыя ўмовы перасячэння граніц».

Аляксандр Лукашэнка звярнуў увагу на неабходнасць таго, каб ЕЭК наладзіла пастаянны канал абмену інфармацыяй з краінамі ШАС, у першую чаргу з Кітаем. Гэта трэба для больш дакладнага кіравання грузапатокамі і арганізацыі эфектыўнай працы пагранпераходаў.

Аб харчовай бяспецы

У гэтай сферы Прэзідэнт лічыць неабходным удасканальваць работу па ўніфікацыі патрабаванняў, звязаных са зваротам сельскагаспадарчай прадукцыі, больш актыўна ўкараняць інавацыйныя падыходы ў аграпрамысловым комплексе.

«Пры гэтым нам вельмі важна забяспечваць патрэбнасці нашага саюза ў харчаванні ўласнай вытворчасці. А мы гэта можам. Для гэтага трэба, каб нашы аграрыі ў тым ліку мелі свой высакаякасны насенны матэрыял», — звярнуў увагу беларускі лідар.

Аб міжнародным пазіцыянаванні ЕАЭС

«Нашы геапалітычныя апаненты спрабуюць ізаляваць нас ад перадавых тэхналогій і прэміяльных рынкаў, стрымаць наша развіццё. Але, нягледзячы на гэта, мы планамерна рухаемся наперад», — заявіў Прэзідэнт. Ён нагадаў аб падпісанні паўнавартаснага гандлёвага пагаднення з Іранам. Умацоўваецца таксама ўзаемавыгаднае супрацоўніцтва ў фармаце «пяцёркі» з перспектыўнымі дружалюбнымі краінамі — Інданезіяй, ААЭ, Манголіяй.

«Аднак праца па ўсталяванні партнёрскіх адносін з трэцімі краінамі, на нашу думку, мае патрэбу ў сістэматызацыі. У бягучых геаэканамічных рэаліях трэба дакладна разумець, з якімі краінамі, у якой паслядоўнасці, у якія тэрміны будзе фарміравацца зона свабоднага гандлю, а з кім з патэнцыйных партнёраў абмяжуемся узаемадзеяннем у рамках мемарандумаў», — адзначыў кіраўнік дзяржавы.

Ён таксама лічыць, што пакуль мала ўвагі надаецца дыялогу на ўзроўні саюза з Афрыканскім кантынентам. «Афрыка мае патрэбу ў шырокім пераліку нашых тавараў, работ, паслуг і тэхналогій, — заўважыў Аляксандр Лукашэнка. — Афрыка, як і Лацінская Амерыка, наеліся ўжо каланіялізму ад адпаведных вядучых краін. І гэта момант, калі мы павінны прыйсці ў Афрыку».

Таксама велізарныя перавагі адкрывае паралельны ўдзел краін ЕАЭС і партнёраў па Садружнасці Незалежных Дзяржаў у ШАС і БРІКС.«Але нам не варта забываць пра сваіх бліжэйшых суседзяў, сяброў, братоў. Узаемадзеянне з дзяржавамі — назіральнікамі пры ЕАЭС і краінамі СНД павінна быць у зоне пастаяннай і пільнай увагі», — дадаў беларускі лідар.

Аб ролі Расіі ва ўмацаванні партнёрства

«Актыўныя паслядоўныя намаганні Расійскай Федэрацыі па развіцці і ўмацаванні нашага партнёрства сёння важныя як ніколі», — падкрэсліў беларускі лідар.

Аляксандр Лукашэнка падзякаваў Прэзідэнту Расіі Уладзіміру Пуціну і расійскаму боку ў цэлым за цёплы прыём і высокі ўзровень арганізацыі мерапрыемства. «Гэта ваша першае (пасля інаўгурацыі, якая адбылася напярэдадні. — Заўвага БелТА) буйная міжнародная нарада. І мы, вядома, не падвядзём вас у гэтым плане», — запэўніў кіраўнік дзяржавы.

Карыстаючыся выпадкам, ён таксама павіншаваў удзельнікаў саміту з чарговай гадавінай гераічнай Перамогі савецкага народа ў Вялікай Айчыннай вайне.

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.