Вы тут

«Міхасёвы прыгоды» у Коласавым доме


6 чэрвеня ў Дзяржаўным літаратурна-мемарыяльным музеі Якуба Коласа ў Мінску пройдзе фестываль дзіцячай кнігі.


Пра тое, якім будзе новае свята прыгожага пісьменства, і ішла гаворка напярэдадні ў Коласаўскім музеі. Варта нагадаць, што фестываль "Міхасёвы прыгоды«праводзіцца не ўпершыню, а стаў добрай традыцыяй вядучага літаратурнага музея краіны. Сярод арганізатараў адмысловага творчага праекта — Саюз пісьменнікаў Беларусі, Выдавецкі дом «Звязда», кнігарня «Акадэмкніга». 

— Па традыцыі падчас фестываля, на які мы запрашаем школьнікаў, юных чытачоў і іх бацькоў, несумненна, будзе гучаць Коласаўская тэма, — падзялілася меркаваннямі дырэктар музея Ірына Мацяс. — Адным з першых мерапрыемстваў стане сустрэча гасцей, удзельнікаў з унучкай пісьменніка Марыяй Міхайлаўнай Міцкевіч, якая шмат гадоў выступае ў друку па тэме коласазнаўства, і якая раскажа пра сам Дом Коласа, пра сям’ю паэта, яго блізкае атачэнне, пра тое, якія жыццёвыя, грамадскія калізіі сталі асновай многіх твораў народнага песняра. 

Дырэктар — галоўны рэдактар Выдавецкага дома «Звязда», старшыня Саюза пісьменнікаў Беларусі Алесь Карлюкевіч звярнуў увагу на тое, што ў апошнія тры-чатыры гады, у прыватнасці, у «Звяздзе» пабачыў шэраг кніг Якуба Коласа. Гэта — і чатыры выданні «Беларускіх народных казак у апрацоўцы Якуба Коласа», і дзве кнігі з раздзеламі з неўміручай паэмы «Новая зямля» — «Летнім часам» і «Каляды» з ілюстрацыямі таленавітага сучаснага кніжнага графіка Лізаветы Жванія, а таксама «Міхасёвы прыгоды», у афармленні якіх выкарыстаны ілюстрацыі мастака Анатоля Волкава да першага выдання паэмы. «Усе гэтыя выданні, якія, між іншым, даволі хутка разыходзяцца на беларускім кніжным рынку,— заўважыў Алесь Мікалаевіч, — мы абавязкова прадставім да ўвагі ўдзельнікаў фестываля...» 

Дырэктар кнігарні «Акадэмкніга» Вольга Глухоўская звярнула ўвагу на тое, што вопыт рэалізацыі кніг ў іх краме паказвае: творы Якуба Коласа трэба часцей выдаваць масавымі тыражамі, у добрым мастацкім афармленні. Гэта варта рабіць з разлікам не толькі на юнага, але і на дарослага чытача. 

На фестывалі «Міхасёвы прыгоды» аматараў чытання чакаюць сустрэчы з дзіцячымі пісьменнікамі Аленай Стэльмах, Кацярынай Хадасевіч-Лісавой, Ірынай Карнаухавай, Міхасём Пазняковым, Валянцінай Драбышэўскай і іншымі паэтамі і празаікамі, якія большасць сваіх твораў адрасуюць хлопчыкам і дзяўчынкам. У праграме кніжнага свята па традыцыі — і сустрэча з кніжным графікам. Мяркуецца разгарнуць таксама выстаўку дзіцячых малюнкаў, прысвечаных творам сучасных дзіцячых пісьменнікаў Беларусі. Музейшчыкі, арганізатары фестываля «Міхасёвы прыгоды» абяцаюць правесці на тэрыторыі музейнай сядзібы і цікавы літаратурны квэст. Каб прайсці яго паспяхова — трэба ўважліва зазірнуць у творы народнага паэта Беларусі Якуба Коласа. 

— Фестывалі дзіцячай кнігі, дзіцячага чытання — добрая традыцыя, — зазначыў на аргкамітэце чарговага Коласаўскага свята Алесь Карлюкевіч. — Такія імпрэзы варта арганізоўваць і на іншых літаратурных, музейных пляцоўках, а таксама ў бібліятэках краіны. Яшчэ ніколі не праводзіўся фестываль «Палескія рабінзоны». Ды і кніжныя фестывалі, так ці іначай звязаныя з творчасцю Івана Сяркова, Міхася Лынькова, Міхася Зарэмбы на Гомельшчыне, Віцебшчыне, Лагойшчыне, канешне ж, дадалі б цікавасці да беларускага слова, беларускай літаратуры ў юных чытачоў краіны. 

Раман СЭРВАЧ

Выбар рэдакцыі

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.