Вы тут

Настаўніца хіміі з Вуцеўскай сярэдняй школы: Стаць дэлегатам — вялікі гонар


Сярод 80 дэлегатаў Усебеларускага народнага сходу ад ГА «Беларускі рэспубліканскі саюз моладзі» ёсць прадстаўніца Добрушскага раёна Гомельшчыны, настаўніца хіміі Вуцеўскай сярэдняй школы Вольга Савянок.


— Дзе нарадзіўся, там і згадзіўся. Гэта пра мяне, — прадстаўляецца дзяўчына.

Два гады таму, скончыўшы біялагічны факультэт Гомельскага дзяржаўнага ўніверсітэта імя Францыска Скарыны, Вольга вярнулася ў родную вуцеўскую школу маладым спецыялістам. Яшчэ вучаніцай старшых класаў яна актыўна займалася навуковай дзейнасцю, брала ўдзел у раённых, абласных і рэспубліканскіх конкурсах даследчых работ. У 2014, 2015 і 2016 гадах тады яшчэ школьніца Вольга Савянок была адзначана Прэміяй спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў.

Сёння маладая настаўніца хіміі ў роднай школе сама імкнецца заахвочваць ужо сваіх вучняў да даследчай дзейнасці, удзельнічаць у адукацыйных праектах. Дапамагае сваёй былой выпускніцы, а цяпер і маладой калезе настаўніца біялогіі і геаграфіі Вуцеўскай сярэдняй школы кіраўнік адукацыйнага праекта «Зялёныя школы» Рэспубліканскага цэнтра экалогіі і краязнаўства Ірына Ярцава.

— Менавіта Ірына Міхайлаўна яшчэ з восьмага класа захапіла мяне даследчай дзейнасцю. Пачалося ўсё з удзелу ў розных конкурсах экалагічнай накіраванасці, рыхтавалі даследчыя праекты. Адзін з іх, напрыклад, быў па стварэнні ў школьнай хімічнай лабараторыі магнітнай вадкасці для ачысткі ад нафтаўтрымлівальных прадуктаў вады ў нашай мясцовай рэчцы Вуці. Пасля рабілі цікавы праект па стварэнні супрацьгалалёднага рэагенту на аснове бурачнага соку, — згадвае Вольга.

Маладая настаўніца падкрэслівае, што сапраўды ганарыцца сваім родным населеным пунктам, школай, калегамі па працы і вучнямі.
— У нашай школе сёння — 120 дзяцей: як з аграгарадка Вуць, так і з суседніх вёсак. Вылучаецца ўстанова адукацыі тым, што ў агульнаадукацыйным працэсе ў нас робіцца акцэнт на экалагічнае выхаванне, — тлумачыць настаўніца.

З 2010 года Вуцеўская сярэдняя школа — апорная пляцоўка па экалагічным выхаванні ў Добрушскім раёне, а з 2012-га — узорная навучальная пляцоўка для ўсёй Гомельшчыны. Тут адкрыты вучэбна-доследны ўчастак, дзе школьнікі займаюцца пад кіраўніцтвам педагогаў.

— У нас педагогі і вучні сваімі сіламі даглядаюць вялікі прышкольны ўчастак. Займаюцца пладаводствам і агародніцтвам. Так дзеці прывучаюцца да агульнай працы на зямлі, а многія пасля абіраюць сельскую гаспадарку сферай прафесійнай дзейнасці, — дзеліцца малады педагог. — Мне асабіста ў свой час было вельмі карысна атрымаць вопыт работы як у прышкольным лагеры працы і адпачынку, так і ў якасці валанцёра. Напрыклад, мы наведвалі, дапамагалі ў побытавых справах нашым мясцовым састарэлым, людзям з інваліднасцю, ветэранам. І нашы школьнікі заўсёды актыўна дапамагаюць наводзіць парадак на тэрыторыі мемарыяла воінам Вялікай Айчыннай вайны, які размешчаны ў аграгарадку.

Калектыў школы ўвогуле заўжды адгукаецца на ўсе акцыі па добраўпарадкаванні тэрыторыі аграгарадка, правядзенні суботнікаў.

— Шчаслівая, што вярнулася працаваць у родную школу, — шчыра прызнаецца дэлегат Усебеларускага народнага сходу Вольга Савянок. — Мая, хоць яшчэ і не такая доўгая, жыццёвая гісторыя — прыклад таго, як можна вучыцца і развівацца, шчасліва жыць і працаваць у сельскай мясцовасці.

Дзяўчына падзялілася, што хвалявалася, калі яе кандыдатуру вылучылі на галасаванне за кандыдатаў у дэлегаты Усебеларускага народнага сходу спачатку на ўзроўні раёна, пасля вобласці і нарэшце сярод моладзі з усёй краіны.

— На 45 з’ездзе БРСМ Гомельскую вобласць прадстаўлялі 70 маладых людзей. Кожнага кандыдата ў дэлегаты Усебеларускага народнага сходу ад грамадскага аб’яднання прадставілі асабіста. Калі прагучала маё прозвішча, безумоўна, вельмі хвалявалася, — кажа Вольга. Дома за яе хварэлі родныя, калегі, вучні.

— Стаць дэлегатам — вялікі гонар. На Усебеларускі народны сход вылучылі самых дасведчаных і актыўных людзей з усіх куткоў нашай краіны. Апынуцца ў іх ліку, прадстаўляць моладзь Гомельшчыны — надзвычай адказна. Не маю права падвесці сваю сям’ю, якая падтрымлівае мяне, свой калектыў, сваі раён і вобласць. Разумею, што ад прынятых рашэнняў залежыць далейшае развіццё нашай краіны. Як маладога спецыяліста, які жыве і працуе ў сельскай мясцовасці, мяне хвалюе будаўніцтва жылля на вёсцы, развіццё транспартных зносін, медыцынскае абслугоўванне. Хочацца звярнуць увагу на праблемы замацавання маладых спецыялістаў не толькі ў сельскай мясцовасці, але і ў раёнах у цэлым. Лічу, што маладому чалавеку трэба ўзважана і адказна падыходзіць да выбару прафесіі, будучай справы жыцця, што ў многім уплывае на замацаванне маладога спецыяліста на яго першым месцы працы. На сваім вопыце пераканалася: калі выбіраеш спецыяльнасць па душы, то не мае значэння — ёсць у цябе абавязковая адпрацоўка пасля вучобы ці не, колькі яна гадоў, — проста хочацца заставацца працаваць, развівацца ў прафесіі, — дзеліцца дэлегат Усебеларускага народнага сходу Вольга Савянок.

Наталля КАПРЫЛЕНКА

Фота з архіва гераіні

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.