Вы тут

Чым сёлета будзе здзіўляць наведвальнікаў «Славянскі базар у Віцебску»?


На вуліцы вясна, а гэта значыць, што да галоўнай культурнай падзеі краіны засталося крыху больш чым тры месяцы. Сёлета Міжнародны фестываль мастацтваў «Славянскі базар у Віцебску» пройдзе ў паўночнай сталіцы ў трыццаць трэці раз, традыцыйна сабраўшы на гасціннай віцебскай зямлі таленты з усяго свету пад лозунгам «Праз мастацтва — да міру і ўзаемаразумення».


Пад купалам амфітэатра

Будучы фестываль ізноў стане здзіўляць прыхільнікаў і даўніх сяброў форуму сюрпрызамі і ўжо ўпадабанымі гледачу падзеямі. 

Па словах дырэктара «Славянскага базара ў Віцебску» Глеба Лапіцкага, галоўным дасягненнем арганізатараў з’яўляецца тое, што фестываль стаў сусветна вядомым культурным брэндам і не згубіў больш чым за тры дзесяцігоддзі сваю «душу». Гэта атмасфера натхнення і творчасці, адзінства і сяброўства народаў свету, яркі ліпеньскі тыдзень, якога многія чакаюць цэлы год.

Сёлета на галоўнай фестывальнай пляцоўцы — у Летнім амфітэатры — асобны канцэрт будзе прысвечаны дзіцяча-юнацкай аўдыторыі. «Госці з будучыні» — такую назву носіць мерапрыемства з удзелам юных талентаў і блогераў. Напярэдадні мерапрыемства будуць абраны дзесяць юных мастакоў, якія стануць пераможцамі конкурсу малюнкаў «Віцебск. Лета. Фестываль», — іх у якасці пачэсных гасцей таксама запросяць на канцэрт.

«У гэтым годзе нарэшце на галоўную сцэну паднімуцца ўдзельнікі дзіцячага вакальнага конкурсу, для многіх гэта мара. Пад купалам у сэрцы горада на Дзвіне адбудуцца лёсаванне і прэзентацыя канкурсантаў», — адзначыў Глеб Лапіцкі.

Для прыхільнікаў рок-музыкі арганізатары фестывалю таксама падрыхтавалі прыемны падарунак: на «Славянку» зноў вяртаецца «Рок-панарама». Сёлета на канцэрце 10 ліпеня будзе выступаць Сімфанічны аркестр Нацыянальнай тэлерадыёкампаніі Беларусі пад кіраўніцтвам Віктара Бабарыкіна. У яго выкананні прагучаць найлепшыя хіты сусветнай, савецкай і сучаснай рок-сцэны. Акрамя гэтага, у Віцебску выступіць Аляксей Гаршанёў з добра вядомымі ўсім песнямі гурта «Король и Шут». Яшчэ адным госцем канцэрта стане рускі трыб’ют гурта «Scorpіons».

Афіцыйнае адкрыццё фестывалю адбудзецца 11 ліпеня, а на наступны дзень у амфітэатры пройдзе гала-канцэрт «Саюзная дзяржава запрашае...». У ноч з 12 на 13 ліпеня «Залаты хіт» традыцыйна збярэ самых яркіх прадстаўнікоў сцэны 1990-х і 2000-х гадоў. Сярод артыстаў значацца Ваccara, «Винтаж», «Дискомафия» і спецыяльны госць Томас Н’эвергрын.

13-га чысла на сцэне амфітэатра стартуе 33 Міжнародны конкурс выканаўцаў эстраднай песні «Віцебск», у першым аддзяленні канкурсанты выканаюць славянскі хіт у суправаджэнні аркестра, другое аддзяленне адкрые хор Турэцкага.

14 ліпеня папулярныя каманды Вышэйшай лігі Клуба Вясёлых і Знаходлівых сыдуцца ў гумарыстычным паядынку за Кубак «Славянскага базару». Навінкай сёлета стане ўдзел у Кубку маладых беларускіх камандаў. Вечарам гэтага дня адбудуцца цырымонія ўрачыстага закрыцця форуму мастацтваў і другі этап конкурсу выканаўцаў эстраднай песні, падчас якога ўдзельнікі выканаюць сусветны хіт. Святочным акордам на галоўнай сцэне форуму стане канцэрт «Шансон ТБ — усе зоркі».

Дарэчы, квіткоў на адкрыццё і закрыццё «Славянскага базару», а таксама на ўлюбёныя гала-канцэрты амаль не засталося. Паспяшайцеся набыць свой пропуск у фестывальнае лета!

Танцы пад адкрытым небам

Фестывальная пляцоўка каля канцэртнай залы «Віцебск» задзейнічана толькі трэці год, але фармат open-aіr так моцна адгукнуўся ў гасцей і жыхароў горада на Дзвіне, што арганізатары сёлета пашыраюць яе магчымасці.

«Напэўна, у кожнага, хто трапляе ў Віцебск на адкрыццё фестывалю, пасля традыцыйнага святочнага салюта застаецца пачуццё, быццам бы чагосьці не хапіла? Хочацца цэлую ноч гуляць па горадзе, танцаваць і весяліцца. У гэтым сезоне мы стварылі новы праект «Танцпляцоўка з „Душэўным радыё“, які стартуе пасля цырымоніі адкрыцця», — распавёў дырэктар фестывалю. Да чатырох гадзін раніцы для гасцей будуць выступаць гурт «На-На», рэтра-вумэн-трыа «Розовые розы», гурт «Cosa Nostra» і іншыя.

Як доказ таго, што «Славянскі базар» не мае межаў і на ім можа выступіць кожны, дырэкцыя запусціла конкурс сярод кавер-бэндаў. Найлепшы зможа выступіць на начным канцэрце нараўне з зоркамі айчыннай і замежнай эстрады.

10-га чысла ўсіх жадаючых запросіць маладзёжны праект «Рытмы лета», у рамках якога на сцэну выйдуць Fіlatov&Karas, BURІTO, Арцём Качар і іншыя. 13 ліпеня на адкрытай пляцоўцы выступіць адна з мацнейшых вакалістак сучаснасці Ані Лорак, якая прывязе ў Віцебск шоу «The Best», напоўненае хітамі. Традыцыйна ў фармаце open-aіr пройдуць Дні моладзі.

Новы фестывальны год — у новай зале

Канцэртная зала «Віцебск» парадуе жыхароў і гасцей горада новым знешнім і ўнутраным абліччам. Плеяду фестывальных падзей на гэтай пляцоўцы 9 ліпеня адкрые VІ Міжнародны танцавальны праект «Dream Dance Fest». Увечары Ягор Дружынін там жа прадставіць свой пластычны спектакль «Усюды жыццё».

Днём 10-га чысла пройдзе першы дзень ХХІІ Міжнароднага дзіцячага музычнага конкурсу «Віцебск», крыху пазней канцэртная зала загучыць хітамі «Марачка», «Есаул», «Ясныя дні» — на сцэну выйдзе Алег Газманаў.

12 ліпеня адбудзецца цырымонія ўзнагароджання і гала-канцэрт па выніках дзіцячага музычнага конкурсу. «Нарэшце ў „Славянскага базару“ з’явіцца фестываль-пабрацім. Гэта той паказчык, што мы не замыкаемся толькі на славянскай культуры. Форум мастацтваў — гэта пляцоўка для адкрытага дыялогу ўсіх культур і народаў свету», — анансаваў Глеб Лапіцкі. Так, упершыню ў Віцебск прыедзе фестываль «KAVKAZ MUSІC FEST», які быў заснаваны ў Нальчыку два гады таму пад уражаннем арганізатараў ад віцебскага форуму. На сцэну паўночнай сталіцы выйдуць самыя папулярныя артысты каўказскай эстрады з Адыгеі, Дагестана, Паўночнай Асеціі і іншыя.

13 ліпеня ў КЗ пройдзе канцэрт у рамках Дзён Саюзнай дзяржавы, вечарам сваю праграму пад назвай «Шчаслівым быць!» прадставіць народны спявак Яраслаў Сумішэўскі. 14-га чысла на сольны канцэрт запрашае Вікторыя Алешка, а 15 ліпеня па шматлікіх просьбах зорка рускага шансона Любоў Успенская выступіць з юбілейным канцэртам.

Аляксандра ГВОЗДЗЕВА

Фота аўтара

Загаловак у газеце: 33-ці валошкавы сезон

Выбар рэдакцыі

Грамадства

Ірына Даўгала: Сям’я для беларусаў застаецца найвышэйшай каштоўнасцю

Ірына Даўгала: Сям’я для беларусаў застаецца найвышэйшай каштоўнасцю

«Сям’я закладвае ў чалавеку мараль, здольнасць спраўляцца з выпрабаваннямі, патэнцыял для развіцця, яна навучае любові, самаахвярнасці, культуры».

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.